Ko fɔlɔfɔlɛ 2
2
1Ala ka saŋɛ nun duge daɲa lakamali kaa le, anun a butɔ feŋɛ bɛ la. 2A to ka a la wale lakamali, tele wɔrɔwila luŋɛ a ka a sulen a la wale la. 3Ala ka barikɛ sa wo tele wɔrɔwila luŋɛ la ko tɔ, a ka wolo kɛrɛkɛrɛ a fan ye, bayi a la wale lakamalireŋɛ, a ka a sulen wo lun de.
Edɛn laakɔɛ
4Dunuya da tarigu le mu kɛ la.
Marigi Alatala ka duge nun saŋɛ da tɛmuɛ min tɔ, 5bapɛ yo bele duge tɔ nun, kifen yo bele bularen nun duge kunma bayi Marigi Alatala ma sange laboe duge tɔ. Mɔgɔ yo bele daren nun min si duge lawali. 6Fɔ tenge min be yɛlɛla duge tɔ, a je ni sa duge kunma bɛ ma. 7Wo kɔma Marigi Alatala ka Adama da bangue la. A ka fɔɲɔ balunɛŋɛ ladon a sun foronta la. Adamadeŋɛ mata foofinɛŋɛ la ɲɔgɔnna le. 8Wo kɔma, Marigi Alatala ka laakɔɛ labɔɔ Edɛn jamanɛ tɔ, tele yɛlɛ mafanna. A ka Adama min da a ka a to wo laakɔɛ butɔ. 9Marigi Alatala ka lɔgɛ mɔɔle bɛ lafɛtɛn ɲɔ, lɔgɛ min majabuta, lɔgɛ min wole si dɔmɔ a ɲinma la. Wo laakɔɛ tɛma, lɔgɔ fila be ɲɔ: dɔndɛ tɔgɔ malakisi lɔgɛ, doe tɔgɔ ko ɲinma anun ko koroŋɛ lɔn lɔgɛ.
10Kɔɛɛ do bɔɔta Edɛn jamanɛ tɔ, ka na don wo laakɔɛ butɔ ka je dii kifeŋɛnu ma, a bɔɔ tɛmuɛ laakɔɛ butɔ, a fatanta bolin naani la. 11Wo bolin fɔlɛ tɔgɔ Pisɔn. Wolo be woyila ka Hawila jamanɛ lamilin, sanuɛ be ka min na. 12Wo sanuɛ kaɲin han. Tulu kuɲɛ diyama tugun be ɲɔ, min tɔgɔ Bedeleyumi, anun kuru ɲinma min bɛnta, ale kure tɔgɔ Oniki. 13Wo kɔɔ filaɲɔgɛ tɔgɔ Giyɔn. Wolo be woyila a ni Kusi jamanɛ bɛ lamilin. 14Wo kɔɔ sabaɲɔgɛ tɔgɔ Tigiri. Wo be woyila a ni tanbi Asuri saa tele yɛlɛ mafanna. Wo kɔɔ naaniɲɔgɛ tɔgɔ Efirati.
15Marigi Alatala to ka Adama jigan a ka a to Edɛn laakɔɛ tɔ, a ni a lawali, a ni a dankun. 16A ka yamɔre don Adama bolo, a ko: «Lɔgɔ wole min bɛ be kɛ Edɛn laakɔɛ butɔ, i si nɔ a bɛ dɔmɔla. 17Fɔ ko ɲinma nun ko koroŋɛ lɔn lɔgɛ wole, i kana wo dɔmɔ. Ka i ka wo dɔmɔ lun go lun, i si naa faga.»
18Marigi Alatala ko: «A ma bɛn Adama ni to yan a dɔrɔn. N si naa a dɛmanna dali a ye, a nun min si bɛn ɲɔgɔn ma.» 19Marigi Alatala ka burun butɔ subenu bɛ da bangue la, anun kondeŋɛnu minnu be kantɔ. A ka anu doni Adama bata, a ni a lɔn a be anu kelela ki min na. Adama ka tɔgɛ min sa anu kunma dɔndɔ dɔndɔ, wo mata anu tɔgɛ la. 20A ka kolofeŋɛnu bɛ tɔgɔ sa, anun kondeŋɛnu minnu bɛ be kantɔ, anun burun butɔ subenu bɛ. Kɔnɔ wo ka a taran, Adama ma a dɛmanna sɔtɔ, a nun min si bɛn ɲɔgɔn ma. 21Wo butɔ, Marigi Alatala ka kinnɔgɛ latanbi Adama ma, min sɛnbɛ kolo, a kinnɔgɔta. A ka a bɛsɛ kolo dɔndɔ bɔɔ, a mɛn ka ɲɔ tatagun. 22Marigi Alatala ka wo bɛsɛ kole jigan a ka a ɲiɲa muse la, a ka a dii Adama ma. 23Adama to ka muse yen, a ko:
«Ha, kɔtɛ n ɲɔgɔn de mu kɛ la,
a kole bɔɔren n kolenu le tɔ,
a bale bɔɔren n bale le ma.
A tɔgɔ be sala le ‹Muse›
bayi a be bɔɔren kaye le tɔ.»
24Wolo mu kaye si bɔɔ a baaba nun a nɛɛnɛ kunma, anun a la muse ni to ɲɔgɔn na, anu ni ma mɔgɔ dɔndɔ la.
25Adama nun a la muse bali makoloŋɛ le mu nun, kɔnɔ wo ma anu malu ɲɔgɔnna.
Currently Selected:
Ko fɔlɔfɔlɛ 2: MOG
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
