Ko fɔlɔfɔlɛ 11

Kuma mabasan koe Babɛli saa tɔ

1Wo tɛmuɛ, dunuya mɔgɛnu bɛ be kuma dɔndɔ le fɔla nun, anu bɛ ni ɲɔgɔn fahamu. 2Mɔgɛnu donu to bɔɔta anu tagata tele yɛlɛ mafanna, anu ka kɛnɛ banba yen Sineyari duge tɔ, anu sabatita ɲɔ. 3Lun do, anu ka a fɔ ɲɔgɔn ye, anu ko: «Bɛ ka na wo mɔ ni birike botege mɔ ni a bintan.» Wo tɛmuɛ, anu be boŋɛ sɔla birike nun dolo je le la, anu bele a sɔla kure nun mɔɔta la. 4Anu ko: «Wo mɔ taga saa labɔɔ wo mɔ fan ye, mɔ ni bon toireŋɛ sɔ min kuŋɛ si yɛlɛ han saŋɛ tɔ, alako mɔ ni tɔgɔ sɔtɔ. Mɔ kana ma mɔgɔ mafatandeŋɛ la ka tanbi sigila duge bɛ kunma.» 5Alatala jigita a nata saa nun bon toireŋɛ fɛlɛ, adamadeŋɛnu be min sɔla. 6A ko a fan ma: «Anu bata ma jama dɔndɔ la, a bɛ be kuma dɔndɔ fɔla. Wo butɔ, anu bata kɛ wale fɔlɔ. Ka n ma anu ladan wo ma, ka anu ka min natá, fenfen te anu kori wo mala. 7Mɔ ni jigi mɔ ni anu la kuma mabasan alako anu kana ɲɔgɔn na kuma fahamu bitugun.» 8Alatala ka anu mafatan ka bɔɔ wo dula tɔ a ka anu mafatan duge bɛ kunma. Wolo ka a ma, anu la bon sɔ koe danta. 9Wolo mu wo dula tɔgɔ sata Babɛli, bayi Alatala ka dunuya mɔgɛnu bɛ la kuma mabasan ɲɔ le, a ka anu mafatan duge bɛ kunma.

Sɛmi bɔnsɛ

10Awa, Sɛmi bɔnsɛ le kɛ la.

Banbaraŋɛ tanbi kɔma, Sɛmi la sɔtɛ ka san kɛmɛ bɔɔ tɛmuɛ min tɔ, a ka Aripasadi sɔtɔ. 11Aripasadi sɔtɔreŋɛ kɔma, Sɛmi ka san kɛmɛ loolu ma, a ka den kayireŋɛnu anun den musereŋɛnu sɔtɔ.

12Aripasadi la sɔtɛ ka san bi saba nun loolu bɔɔ tɛmuɛ min tɔ, a ka Selaha sɔtɔ. 13Selaha la sɔtɔreŋɛ kɔma, Aripasadi ka san kɛmɛ naani anun san saba ma, wo ka a taran a ka den kayireŋɛnu anun den musereŋɛnu sɔtɔ.

14Selaha la sɔtɛ ka san bi saba bɔɔ tɛmuɛ min tɔ, a ka Hebɛri sɔtɔ. 15Hebɛri la sɔtɔreŋɛ kɔma, Selaha ka san kɛmɛ naani anun san saba ma, wo ka a taran a ka den kayireŋɛnu anun den musereŋɛnu sɔtɔ.

16Hebɛri la sɔtɛ ka san bi saba nun naani bɔɔ tɛmuɛ min tɔ, a ka Pelegi sɔtɔ. 17Pelegi la sɔtɔreŋɛ kɔma, Hebɛri ka san kɛmɛ naani anun san bi saba ma, wo ka a taran a ka den kayireŋɛnu anun den musereŋɛnu sɔtɔ.

18Pelegi la sɔtɛ ka san bi saba bɔɔ tɛmuɛ min tɔ, a ka Reyu sɔtɔ. 19Reyu la sɔtɔreŋɛ kɔma, Pelegi ka san kɛmɛ fila anun kɔnɔntɔ ma, wo ka a taran a ka den kayireŋɛnu anun den musereŋɛnu sɔtɔ.

20Reyu la sɔtɛ ka san bi saba nun fila bɔɔ tɛmuɛ min tɔ, a ka Seruki sɔtɔ. 21Seruki la sɔtɔreŋɛ kɔma, Reyu ka san kɛmɛ fila san wɔrɔwila ma, wo ka a taran a ka den kayireŋɛnu anun den musereŋɛnu sɔtɔ.

22Seruki la sɔtɛ ka san bi saba bɔɔ tɛmuɛ min tɔ, a ka Nakɔri sɔtɔ. 23Nakɔri la sɔtɔreŋɛ kɔma, Seruki ka san kɛmɛ fila ma, wo ka a taran a ka den kayireŋɛnu anun den musereŋɛnu sɔtɔ.

24Nakɔri la sɔtɛ ka san mugan nun kɔnɔntɔ bɔɔ tɛmuɛ min tɔ, a ka Tera sɔtɔ. 25Tera la sɔtɔreŋɛ kɔma, Nakɔri ka san kɛmɛ san tan nun kɔnɔntɔ ma, wo ka a taran a ka den kayireŋɛnu anun den musereŋɛnu sɔtɔ.

26Tera la sɔtɛ ka san bi wɔrɔwila bɔɔ tɛmuɛ min tɔ, a ka Iburama sɔtɔ, anun Nakɔri, anun Haran.

27Tera bɔnsɛ le mu kɛ la: Tera ka Iburama sɔtɔ, anun Nakɔri, anun Haran. Haran ka Luti sɔtɔ. 28Haran fagata, a ka a baaba Tera balureŋɛ to. A fagata Kalide duge tɔ, Uri saa tɔ, a sɔtɔta ka min na. 29Iburama nun Nakɔri ka muse futu. Iburama la muse tɔgɔ Sarayi. Nakɔri ka Haran na den musereŋɛ do futu, min tɔgɔ Milika. Haran na den musereŋɛ do tugun tɔgɔ Isika. 30Sarayi mu den sɔtɔ bale le la nun: den bele a bolo nun.

31Awa, Tera ka a la den kayireŋɛ Iburama jigan anun a bitan muse Sarayi, Iburama la muse, anun a mamaren Luti, min mu Haran na deŋɛ la. Anu bɛ bɔɔta Uri saa tɔ, Kalide duge tɔ, taga koe la Kanana duge tɔ. Kɔnɔ anu la kereŋɛ Harani saa tɔ, anu sabatita ɲɔ. 32Tera la simaya bɛ labɛndeŋɛ mata san kɛmɛ fila anun san loolu le la. Wo kɔma a fagata Harani.

Currently Selected:

Ko fɔlɔfɔlɛ 11: MOG

ማድመቅ

Copy