Matyu 13

Kidee tazwa A̱tyu Khap Nai Zwá Yak

(Ma̱r 4:1-9; Luk 8:4-8)

1Ma̱ a̱tuk a̱kya, á̱ si̱ labeang bah, Yesu si̱ ghwon a̱li ka, a̱ si̱si̱ swan da̱ a̱beam a̱gba̱ndang jok Ga̱lili wu. 2Susot á̱kpa á̱niet ma̱ a̱di̱di̱t si̱ tung ba̱ si̱ tyong gu á̱ keang, ba̱ si̱ feap guu. Huhwa Yesu si̱ nwuo a̱ swan mi̱ kukwon a̱wak hu. A̱ si̱ tyiet susot á̱kpa á̱niet ji nang ba̱ yong di̱n khwong jok hu. 3Yesu si̱ shei mba nkhang ma̱ a̱di̱di̱t di̱ kidee, nang si̱ nani a̱ni,

“Nyi myiai a̱fufwuo nyi fa̱a̱k! A̱tyu khap a̱ghyang wa ghwut a̱ nat nai zwá yak. 4Nang gu nshya̱ di̱ nai zwá yak ji a̱ni, jhyáng si̱ kwa̱i di̱ gak, a̱ka̱man si̱ chyok, na̱ si̱ tang.

5“Zwá jhyáng si̱ kwa̱i da̱ a̱vwuo ka̱ yet kukwak a̱ni. Ji̱ si̱ ta ma a̱nggang, mat a̱vwuo ka byia̱ mbyin gba̱mgbam bah. 6A̱wot nang mam ntat jenjai a̱ni, yak hu si̱ shyuk ku si̱ khwu, mat á̱ni̱nan yak ba nwuo a̱byin shansham bah. 7Zwá yak jhyáng si̱ kwa̱i mi̱ sa̱kan. Nang sa̱kan ji ndaai a̱ni, ji̱ si̱ feap yak hu ku laai a̱ni, ji̱ si̱ tyia̱ tswá bah. 8A̱wot zwá jhyáng si̱ kwa̱i da̱ a̱vwuo ka̱ byia̱ bwum a̱ni. Ji̱ si̱ ta ji̱ si̱ laai, ji̱ si̱ tyia̱ tswá gba̱mgbam. Tswá jhyáng si̱ yet nswak ti̱ntat, jhyáng nswak a̱tataa, a̱wot jhyáng si̱ bu yet chyi chyi!

9“Konyan wa chat lyen a̱ni, a̱ myiai a̱fufwuo a̱ fa̱a̱k!”

Kyang ku mbyia̱ Yesu Tyiet di̱ Kidee a̱ni

10Mman ta̱m na si̱ bai da̱ a̱vwuo Yesu, ba̱ si̱ lyip gu nyia̱, “Yihwa mbyia̱ a ni̱ ndyiat ma̱ng á̱niet ba di̱ kidee ji?”

11Yesu si̱ nwuak ba shim nyia̱, “Á̱ shim nyin dyo nyi fi̱k a̱chuchuk a̱ shya̱ di̱ niat mi̱ Tyok Ma A̱gwaza tswazwa hu a̱ni, kang ma̱ng á̱kum á̱niet ka. 12Á̱niet ba̱ fwuong tyiet nung hu shansham a̱ni, á̱ na mbeang mba lyen hu, a̱wot ba̱ bu lyen gba̱mgbam. A̱wot á̱niet ba̱ lak fwuong tyiet nung hu a̱ni, ku a̱bankyang nang ba̱ fa ba̱ lyen a̱ni, á̱ na san nka á̱ ghwon mbaa. 13Huhwa mbyia̱ nang n dyiat ma̱ng a̱mba di̱ kidee jini, ma̱nang á̱ ndyuut a̱ni nyia̱,

‘Mat ba̱ nwuan,

da̱ mba, ba̱ li shansham bah.

Ba̱ myiai a̱fufwuo,

da̱ mba, ba̱ fa̱k ku ba̱ fi̱k bah!’#13:13 Ish 6:9.

14“Si̱ huni bai cha̱chaat ma̱ng kyang hu nang Ishaya a̱ta̱m a̱kwonu A̱gwaza wu ku lyiat a̱ni nyia̱,

‘Nyi na fwuong kyang hu nang n dyiat a̱ni.

Da̱ nyin, nyi si̱ mi̱n mak lyen hu bah.

Nyi na nwuan kyang hu nang n nyia̱ a̱ni.

Da̱ nyin, nyi si̱ mi̱n mak fi̱k hu bah.

15Mat nfwuo á̱niet nani tyia̱ gba̱pdok.

A̱wot a̱fufwuo mba ba si̱ lak fwuong a̱lyiat na.

A̱wot ba̱ si̱ nyim á̱ghyi mba ba.

Mat a̱nia,

á̱ghyi mba ba si̱ mi̱n nwuan ku ba̱ fi̱k bah.

Da̱ a̱fufwuo mba ba, ba̱ si̱ mi̱n fwuong bah.

A̱wot nfwuo mba na si̱ mi̱n fi̱k kyang bah.

Da̱ mba, ba̱ si̱ mi̱n bwuok á̱ bai da̱ a̱vwuo nung

n choot ba bah.’#13:15 Ish 6:9-10.

16“Nyi yet á̱niet a̱li̱ba̱rka bya, mat nyi nwuan ma̱ng á̱ghyi nyin ba, nyi si̱ fi̱k; a̱wot nyi si̱ myiai a̱fufwuo nyin ba, nyi si̱ fwuong. 17N tak nyin a̱tsak a̱lyiat, a̱yaata̱m a̱kwonu A̱gwaza ma̱ng á̱tsotswat á̱niet ma̱ a̱di̱di̱t gbangbang, ku chat ba̱ li kyang nyi nwuan a̱ni. A̱wot ba̱ si̱ shya̱ a̱wat ka bah. Ba̱ si̱ bu chat ba̱ fa̱k kyang nyi fwuong a̱ni. A̱wot ba̱ si̱ shya̱ a̱wat ka bah.

Yesu Wa̱i A̱lyiat tazwa Kidee A̱tyu Nai Zwá Yak

(Ma̱r 4:13-20; Luk 8:11-15)

18“Ma̱ninika, nyi myiai a̱fufwuo nyi fa̱k kyang nang kidee tazwa a̱tyu nai zwá yak ji fa a̱ni: 19Gak hu nang zwá yak ji nkwa̱i a̱ni,#13:19 Lyuut cha̱chaat: “Zwá yak ji, ji̱ kwa̱i di̱ gak hu a̱ni.” huhwa yet kidee nfwuo á̱niet na ba̱ fa̱k a̱lyiat Tyok A̱gwaza na, a̱wot ba̱ si̱ nwai fi̱k na a̱ni. A̱wot A̱ta̱nyeang ka si̱ bai, ka̱ si̱ ta̱wap A̱lyiat A̱gwaza na nang á̱ nai mi̱ nfwuo mba na a̱ni. Ka̱ si̱ ghwon mbaa.

20“Kukwak hu nang zwá yak ji nkwa̱i a̱ni,#13:20 Lyuut cha̱chaat: “Zwá yak ji, ji̱ kwa̱i di̱ kukwak hu a̱ni.” huhwa yet kidee nfwuo á̱niet ba̱ fa̱k A̱lyiat A̱gwaza na, ba̱ si̱ kin san na ma̱ng a̱gwai da̱ a̱ka̱nyiung a̱ni. 21A̱wot nang A̱lyiat A̱gwaza na mbyia̱ á̱ni̱nan ba̱ nwuo á̱ nat gbang mi̱ nfwuo mba na a̱ni bah. Ba̱ si̱ mi̱n dabeang mi̱ khwi hu bah. Ki̱ swuo a̱bung ba̱ bai, ku á̱ ta̱shuk baa mat A̱lyiat A̱gwaza na, ba̱ na bwuok lilyim ma a̱nggang.

22“A̱wot tyan sa̱kan ji nang zwá yak ji nkwa̱i a̱ni,#13:22 Lyuut cha̱chaat: “Zwá yak ji, ji̱ kwa̱i mi̱ sa̱kan ji a̱ni.” jija yet kidee nfwuo á̱niet ba̱ san A̱lyiat A̱gwaza na. A̱wot a̱fi̱fa swanta wuni, shyuo kurum, ma̱ng nkyang njhyang si̱ nwuo mi̱ nfwuo mba na. Nkyang nani si̱ feap A̱lyiat A̱gwaza na, na̱ si̱ tyia̱ a̱tan tswa bah.

23“A̱wot a̱tsatsak a̱byin wu a̱ byia̱ bwum hu nang á̱ nnai zwá yak ji a̱ni,#13:23 Lyuut cha̱chaat: “Zwá yak ji, ji̱ kwa̱i da̱ a̱vwuo ka byia̱ bwum a̱ni.” kikya yet kidee nfwuo á̱niet ba̱ fa̱k A̱lyiat A̱gwaza na, ba̱ si̱ san naa, ba̱ si̱ nnyia̱ nta̱m, na̱ si̱ tyia̱ tswá ba̱t. Tswá jhyáng si̱ yet nswak ti̱ntat, jhyáng nswak a̱tataa, jhyáng si̱ yet chyi chyi.”

Kidee tazwa Á̱kwop ma̱ng A̱lka̱ma

24Yesu si̱ bu lyiat ma̱ng a̱mba di̱ kidee jhyang nyia̱, “Tyok Ma A̱gwaza tswazwa hu li nang a̱tyu khap a̱ nat nai a̱tan zwá yak ma̱ a̱byin gu a̱ni. 25A̱wot a̱tyetuk a̱tuk a̱kya, nang á̱niet nta̱m a̱tyu khap ba nshya̱ mi̱ nda a̱ni, a̱tyu lak li a̱tyu khap wu si̱ nat, a̱ si̱si̱ chyui ja̱m ma̱ a̱byin a̱lka̱ma ka, a̱ si̱si̱ nkat a̱ngga nggu. 26Nang a̱lka̱ma wu ba̱ nta a̱ ghwut a̱ni, ja̱m ji meang si̱ ma nta a̱ ghwut. 27Á̱niet nta̱m a̱tyu khap ba si̱ nat á̱ si̱ lyip gu nyia̱, ‘A̱tyoli, a̱byin a̱kya nang a nchyui a̱tan zwá yak a̱wa a̱ni, ka̱ byia̱ ja̱m ba̱t! Ja̱m ji neet a̱ji wa?’

28“A̱tyu khap wu si̱ nyia̱ ma̱ng a̱mba, ‘A̱tyu lak li nung a̱ghyang wa nyia̱ ta̱m a̱hwa!’

“Á̱niet nta̱m ba si̱ lyip gu nyia̱, ‘A chat zi̱ nat zi̱ si̱ nga ja̱m ji, turung a?’

29“A̱tyu khap wu si̱ nwuak ba shim nyia̱, ‘Kaai, kalak nyi na nga a̱lka̱ma wu dundung ma̱ng ja̱m ji. 30Nyi yok ba ba̱ laai dundung á̱ fwuong jen chak ji. Jen a̱ja ja n na ntyia̱ á̱niet chak ba, ba̱ ya nchak ja̱m ji, á̱ vwuoi da̱ a̱yaakpa ba̱ fwui nji. A̱wot a̱lka̱ma wu á̱ tung á̱ tyia̱ nung dyo ma̱ a̱gban.’ ”

Kidee tazwa Tswa Mustat

(Ma̱r 4:30-32; Luk 13:18-19)

31Yesu si̱ bu lyiat ma̱ng a̱mba di̱ kidee jhyang nyia̱, “Tyok Ma A̱gwaza tswazwa hu li nang tswa mustat nang á̱ ti̱p mi̱ ti̱tam a̱ni. 32Tswa mustat ji, jija yet a̱bada̱dei ka mi̱ zwá nkyang ji a̱ swak mi̱ swanta hu. A̱wot ki̱ ji̱ laai, ji̱ ni̱ tyia̱ a̱gba̱ndang a̱kwon a̱ swak á̱kum a̱ka̱kwon nang á̱ chyui á̱ si̱ keang a̱ni. A̱wot a̱ka̱man ni̱ bai, na̱ ba̱ nswan, na̱ ntat a̱ka̱le di̱ mbwak nka na.”

Kidee tazwa Yit

(Luk 13:20-21)

33Yesu si̱ bu lyiat ma̱ng a̱mba di̱ kidee jhyang nyia̱, “Tyok Ma A̱gwaza tswazwa hu laai á̱ mban nang yit wa nang a̱byii̱k kyiak, a̱ si̱si̱ nyia̱ burodi a̱ni. Ku nang gu nkyiai nkyuo yit na ma̱ a̱da̱dei ma̱ng a̱lka̱ma mundu tat a̱ni, nkyuo yit na si̱ teak á̱ kai a̱mgba̱m nkyuo a̱lka̱ma nang gu nuu a̱ni.”

34Kuzang jen Yesu ku tyiet á̱kpa á̱niet ka di̱ kidee ja ma̱ng nkhang nang si̱ nani a̱ni. A̱tsak a̱lyiat, a̱ ku shei mba nkyang di̱ mi̱ kidee bah. 35A̱lyiat nani bai da̱ a̱nu ka ma̱ cha̱chaat ma̱ng kyang nang A̱gwaza ku hyia̱ a̱bwonu a̱ta̱m a̱kwonu nggu ka a̱ni, nyia̱,

“N na ndyiat ma̱ng a̱nyin di̱ kidee ja.

N na ntyai nkyang na̱ shya̱ di̱ niat,

neet nang á̱ mmat swanta hu a̱ni.”#13:35 Za̱b 78:2.

Yesu Wa̱i A̱lyiat tazwa Kidee Ja̱m ma̱ng A̱lka̱ma

36Nang Yesu nghwon á̱kpa á̱niet ka a̱ta̱usa a̱ni, a̱ si̱ nwuo mali ka nang gu nkhwat a̱ni. Mman ta̱m nggu na si̱ neet á̱ ba̱ shya̱ nggu. Ba̱ si̱ nyia̱, “A̱tyoli, ma̱sa̱kut, wa̱i nzi̱t a̱lyiat na tazwa kidee ja̱m ji mi̱ bibyin hu.”

37Yesu si̱ nwuak ba shim nyia̱, “A̱tyu khap a̱ chyui a̱tan zwá yak wu a̱ni, nggu wa yet kidee Nggwon A̱tyubishyi#13:37 Wa̱i a̱lyiat: Nggwon A̱tyubishyi ngyet a̱lyoot tyok nang Yesu ku ngyei a̱pyia̱ nggu. Mat 8:20. ji. 38A̱wot a̱byin kikya yet kidee swanta hu. A̱tan zwá wu wa yet kidee mman Tyok Ma A̱gwaza tswazwa na. A̱wot ja̱m ji ja si̱ yet kidee mman A̱ta̱nyeang na. 39A̱tyu lak li wu a̱ chyui ja̱m ji a̱ni, nggu wa yet kidee A̱ta̱nyeang ka. Jen chak yak ji ja yet kidee a̱tuk kuut a̱byin ka. A̱wot á̱niet chak yak bibya yet kidee a̱yaata̱m tswá A̱gwaza ba.

40“Ma̱nang á̱ ni̱ ntung ja̱m ji á̱ fwui mi̱ ndong a̱ni, ma a̱nia wa ku na ndi a̱tuk kuut a̱byin ka. 41Nggwon A̱tyubishyi ka na ta̱m a̱yaata̱m tswá nggu ba, ba̱ ti̱n kuzang kyang ku tyei á̱niet a̱ka̱tuk nyia̱ a̱ni, ma̱ng a̱mgba̱m á̱niet ba̱ lak khwi doka A̱gwaza a̱ni mi̱ Tyok nggu hu. 42A̱wot a̱yaata̱m tswá A̱gwaza ba na tang mba mami a̱nga̱ngak ndong sang sangba̱p. A̱ja wa ba̱ na ntwei á̱ ntsa á̱ nywai a̱nyunyung. 43A̱jawa á̱tsotswat á̱niet ba na nsai nang mam a̱ni mi̱ Tyok A̱tyia̱ mba hu. Konyan wa chat lyen a̱ni, gu myiai a̱fufwuo gu fa̱a̱k!

Kidee Zwá nang Á̱ Niat a̱ni

44“Tyok Ma A̱gwaza tswazwa hu li nang zi̱nariya mi̱ gumaat nang á̱ niat ma̱ a̱byin, a̱wot a̱tyok a̱ghyang si̱ ta̱taat a̱ni. Mat a̱gwai a̱tyok a̱nia, a̱ si̱ shyak a̱vwuo niat ka. A̱ si̱ nat a̱ si̱si̱ lyap a̱mgba̱m nkyang nang gu byia̱ a̱ni, gu ka shya̱ kurum gba̱mgbam gu nsan a̱byin a̱kya.

Kidee tazwa Á̱tsatsak Nfang

45“Tyok Ma A̱gwaza tswazwa hu bu li nang a̱tyu a̱bwuang a̱ ghwut chat á̱tsatsak nfang na̱ byia̱ kurum a̱ni. 46Nang gu nshya̱ á̱tsatsak nfang wu a̱ byia̱ kurum a̱ni, a̱ si̱ nat a̱ si̱si̱ lyap kuzang nkyang nang gu byia̱ a̱ni, a̱ si̱ nsan naa!

Kidee tazwa A̱ka̱li Bwoi Fa̱n

47“Tyok Ma A̱gwaza tswazwa hu bu li nang a̱ka̱li nang á̱ nnat bwoi fa̱n ma̱ a̱gba̱ndang jok, á̱ si̱ mbwoi kuzang tangka̱i fa̱n a̱ni. 48Nang a̱ka̱li ka nhyat ma̱ng fa̱n hu a̱ni, á̱niet bwoi fa̱n ba si̱ kwak a̱ka̱li ka á̱ ghwut ndyo di̱ khwong hu. Ba̱ si̱ swan, ba̱ si̱ khai á̱tsatsak fa̱n wu á̱ tyei ma̱ a̱yaakumbwu. A̱wot si̱ ku nwai yet a̱tan wu a̱ni, ba̱ si̱ weam. 49Ma a̱nia wa ku na ndi a̱tuk á̱ na nkuut a̱byin ka a̱ni. A̱yaata̱m tswá A̱gwaza ba bye bai, ba̱ khap á̱ka̱tuk á̱niet ba zan ma̱ng á̱tsotswat ba. 50A̱wot ba̱ tang á̱ka̱tuk á̱niet ba mami a̱nga̱ngak ndong sang sangba̱p. A̱ja wa ba̱ na ntwei á̱ tsa á̱ nywai a̱nyunyung.”

51Yesu si̱ lyip mman ta̱m nggu na nyia̱, “Nyi fi̱k a̱mgba̱m tyiet huni a?”

Ba̱ si̱ nwuak gu shim nyia̱, “Ii, zi̱ fi̱k hu.” 52A̱ si̱ bu nyia̱ ma̱ng a̱mba a̱ni, “Mat a̱nia, kuzang a̱tyu tyiet doka a̱ bwuak a̱ si̱ yet nggwon ta̱m mi̱ Tyok Ma A̱gwaza tswazwa hu a̱ni, a̱ yet kidee a̱tyoli a̱ ghwut ma̱ng a̱chuchuk tyiet fai, mbeang a̱chuchuk a̱khwukhwop tyiet mi̱ tutu mumwang nggu hu a̱ni.”

Á̱ Lak Yesu ma̱ A̱keang nggu ka Na̱za̱ra̱t

(Ma̱r 6:1-6; Luk 4:16-30)

53Nang Yesu ntyak lyiat di̱ kidee ma̱ng nkhang na a̱ni, a̱ si̱ ghwon fam a̱byin a̱hwa. 54A̱ si̱ bwuok a̱ nat a̱keang gu ka Na̱za̱ra̱t. Nang gu ntyiet mi̱ tutu a̱tung A̱yahudawa hu a̱ni, konyan a̱ja si̱ tyia̱ ma̱ tai. A̱wot ba̱ si̱ nyia̱, “A̱ji wa nang a̱tyu wuni nshya̱ mumwang ma̱ng chet nyia̱ nkyang a̱ri̱bi̱di huni?”

55A̱wot ba̱ si̱ mai Yesu mai lihyat. Ba̱ si̱ nyia̱, “Nggu wa yet nggwon a̱tyu shap nkyang ka baa? A̱yang nggu wa á̱ ngyei Ma̱ryamu wu baa? A̱wot á̱na̱nyiuk á̱sam nggu ba, bibya yet Yakubu, Yosi#13:55 Lyuut ghyang mbyia̱: Isuu., Siman ma̱ng Yahuda baa? 56A̱mgba̱m á̱na̱nyiuk á̱nap nggu ba, bibya shya̱ a̱ji ma̱ng a̱nzi̱t. Á̱ nyia̱ ni wa gu si̱ shya̱ tyok tyiet nkyang nani?”

57Ba̱ si̱ fa̱k a̱lyia̱ ya, ba̱ si̱ lak li Yesu. A̱wot ba̱ si̱ lak nwuak fwuo da̱ nggu.

Yesu si̱ nyia̱ ma̱ng a̱mba, “Á̱ nwuat a̱ta̱m a̱kwonu A̱gwaza shi mi̱ kuzang a̱vwuo, kang ma̱ng a̱keang nggu ka ma̱ng kyang mbwak nggu hu.” 58A̱wot mi̱ nkyang a̱ri̱bi̱di ma̱ a̱da̱dei nia, nang Yesu ku nyia̱ a̱ja, mat nwai nwuak fwuo mba hu da̱ nggu.

Currently Selected:

Matyu 13: TyapNT

ማድመቅ

Copy