ADECHHÜ 44
44
Ahyi Bhatagha kesa
1Josef na ahza pi ma jjen wi amagha kediwa cü, “Asu pi mathu pvüya kemehai chu akhhisa cülo, nu mathu pisa pi kesüsü khhi pang wi chi theng cülo. 2Iji rükatssü hyiwa tsüpi asu men pisa gweghe pi ghanyi ntsawa khhi pang wi chi theng cülo.” Amaghawa kekiza ti ma tsü sa. 3Ghanenwa mitu na acünyuthu na mathu gadathu ssinu whalo kesun pi bvü thsüa. 4Mathu na anyunuti teshi nu alen kesie npi wayala Josef na ma jjen wi amagha kediwa wi kiza, “Wan, anyi katsüthu jügü walo; nu mathu jügüya lethu mathu wi kiza, ‘Nthu mangkesa na nkemehai pi kemehaiwa dhi neng ten nu? 5Nthu mangkesa na ipvüwa rükatssü hyiwa tsü ghanfüya nu? Ma tsüpi chi jjüden, nu ma tsü sen nu akezen wwiden. Nthu na sazzi ntsa sadha le!’ ”
6Amaghawa na wa mathu jügüya nu ma ajüh tsü makesü khi. 7Mathu na ma luneng “Kediwa, no ha mangwa jjügi khi ben nu? Ikhang na kishen ben, ikhang tsüti mangla nsale. 8Ikhang na Kanaan yyi wina ikhang khhi wi mukeya pisa tsü pvü nu no wi gho neng kesa tsü no chüben. Isathu ikhang na khatinu npvüwa jjen wi rükatssü nyelela suna ghanfüya nu? 9Kediwa, keujüla ikhang meshu kesü tsü pvü keten muya lethu ma pi shü thsülo, nu ikhang kepathu na nmagha sa wa na.”
10Ma khineng “Nthu kekhi ti sa na; isala thowa na tsü pvü keten muya khe ma imagha sa waben, nu nthu kepa wi whaya mehai le.” 11Tsalina mathu kaghajila akhhi piesha pi ayyi wi chi nu papa khhi lisha wa. 12Josef maghawa na mehaitsü keqhai ntsawa wina sasen ghanyi ntsawa khhithu wi tsü bha wa nan Benjamin khhi wi ahyiwa tsü muya. 13Acünyuthu ahathakina wina mathu thsü zanqhe, mathu gada khhithu saya theng nu anyunutiwa wi kheneng wha.
14Judah nu ma cünyuthu na Josef jjen wi gho nan ma ciwi la ajjen wi benla. Mathu na ma tuwi kukedu, 15nu Josef na mathu wi khi, “Nthu khati sadha nu? Nthu na anyi hi ti kesa ha akezen wwi nu nthu ghanya benle kesa nchü kwe?”
16Judah na luneng “Kediwa, Ikhang no wi mangwale khiyadha nu? Ikhang mangwale khi nu? Ikhang na khiya kemehai mangla nmidha. Anyiza na ikhang kesami pi ccücadha. Ahyi pvü keten mu keyawa tsü ketan nyela ikhang tsüdila khili nmaghathu sawa tendha.”
17Josef na khi, “Nyele! Hi tsüti sa nben. Ma khhi wi ahyi mu keyawa tsü ketan imagha saben. Nthu kepa wi kemehai sa nthu ba wi wha nenglo.”
Judah na Benjamin ghena Kekhie
18Judah na Josef wi wha nu khi, “Kediwa, hi yala ntuwi ajüh kesü khi thsülo. Imiwi aghepvü nsala, no kadimiwa ti kesa. 19Kediwa, no ikhang keüla, ‘Nthu ba nu nthu cünyu kepa wi benla nmi nu?’ khi. 20Ikhang na luneng ‘Ikhang ba na qhai wadha nu ma keqhai seng wi pvügha keya ikhang cünyu ghanyi ntsawa kesü benle. Ghanyiwa cünyuwa na shüdha, nu ma jja tsa ma ketan hangben; ma ba na ma ghali ntsa saden.’ 21Kediwa, no ma ghangchile kesalina ikhang ma ssinu hewi gholo kiza, 22nu ikhang no lunengla ghanyiwa na ma ba teshiya nbenle; ma tsüti sa lethu ma ba na shüaben. 23Tsaseng wi no ‘Nthu cünyu ghanyi ntsawa tsü ssisen nkegho chu nthu na ituwi gho thsü nten,’ isa khi.
24“Ikhang kheneng ikhang ba wi whala no mangwale ikhang kiza khe pi ma kizale. 25Tsaseng wi ma ikhang kheneng wa asu keu shü pvü gholo kiza. 26Ikhang na khineng ‘Ikhang waya nben; ikhang cünyu ghanyi ntsawa na ikhang nkegweghe chu ikhang na anyi tsüwa tuwi wa thsü nben. Keujüla ikhang cünyu ghanyi ntsawa la wa lethu ikhang waya mehai.’ 27Ikhang ba na ikhang wi khi, ‘Nthu chüben iwubvü Rachel na atsa kenitan pvügha cü. 28Manyi kesü na hi teshidha. Aghangsa nkemehai na ma zandhi-zanghe benla metsi, kepaghenanye ma kepvü seng wi hi ma nmuladha. 29Keujüla nthu na khili hi wina ghanyiwa ha ssi bvü nu ma miwi sakeyishü sathu nthu na hathakina sen keghowa tsüna hi keqhai hati ha pathiaben.’
30-31“Tsalina kediwa, keujüla hi ghanyiwa nssila iba wi wha neng lethu ma na hi ghanyiwa nssila keten muya meyi shüaben. Ma ma kahangli tsüna ghanyiwa kahang miwi ben, nu ma sashü qhaidha, tsalina ikhang hathakina sen keghowa tsüna ma pathiaben le. 32Tsü miwila ghanyiwa ghena hi kahang pi iba tuwi dhabi theng. Hi ma kizala keujüla hi ghanyiwa ssigho no ncü nengla lethu hi kahang tsüdi wi kemeshensa tsü pvüben. 33Tsalina kediwa, hi ma mithon wina hewi nmagha sa wa na; ma yala ma bithu gweghe wha neng thsülo. 34Hi ghanyiwa nssila khati wha iba metu dha nu? Hi iba na ketizenkesa tsü ghang pvü benya nbenle.”
Currently Selected:
ADECHHÜ 44: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.