ADECHHÜ 41
41
Josef na Kadimiwa man Khikemilikechi
1Amapi keni seng wi Ejipt kadimiwa ma man wina ma Nil Ghaku katen wi nganben. 2Ciwi amesü kekunon dende kesa tagü aghaku wina shhugho aghang maha dsa wa. 3Tsaseng wi amesü qan-yi nu ma gü ketan kesa tagü na shhugho. Tsüthu na shhugho amesü kepathu kete aghaku katen wi nganya, 4nu amesü qan-yi kesathu tsüna kekunonthu ghan dsa. Tsaseng wi kadimiwa na shaghaya. 5Ma kheneng jen wa nan aman kesü mu. Asu tsang tagü na ma ton kesü wi shhugho ma bi kejon bün nu nyünben. 6Tsaseng wi asu tsang kepa wi tagü ma bi zeng nu ayyikeshü meghü na mo pi jü wa kesa na shhugho. 7Ma tsang bi kezengthu tsüna kejon kebenthu meji ya. Kadimiwa na tsüna ma man le kesa chü. 8#Dan 2.2. Ma ghanenwa wi shagha ma leben güccüya, tsalina ma Ejipt wi demathu nu kemetsathu cighu chi. Ma ma man keni tsü khipi mathu kiza, isala thola tsü jjügi khipi ma kiza keya nmila.
9Tsaseng wi ahyi kepiewa na kadimiwa wi kiza, “Hi nansü sazzidha le nkhishithu yishüdha. 10No amesa gü keten miwi kediwa ishinyi miwi aghepvü nu ishinyi pi kadipen kehiethu meza miwi kediwa jjen wi atssüzü sa thsüa. 11Ghaja kesü ishinyi qho aman kesüsü man, nu aman tsüna ma jjügi kepapa kesa. 12Ciwi Ibri pvüza kesü kadipen kehiethu meza miwi kediwa maghawa na ishinyi gweghe ben. Ishinyi man tsü khipi ma kiza, nu ma tsüthu jjügi khikemili pi ishinyi kiza le. 13Ma kekhi jjügi tsüti sale: no hi pi ipen wi ben neng thsü, isala amesa gü ketenwa tsüpi hanthia.”
14Kadimiwa na Josef ssinu gholo kesun chi, nu mathu atssüzüjjen wina wan ma ssinu gho. Josef na ma pang kenye ca nu ma thsümeni kemiliya nu kadimiwa tuwi gho. 15Kadimiwa na ma wi khi, “Hi aman kesü man, nu thola tsü jjügi khi meya. No aman jjügi khiya mehai le kesa nyu hi kiza le.”
16Josef na kadimiwa wi khineng “Hi tsü khiya nben, isala Anyiza na kadimiwa kenenwa khikemili cüben.”
17Kadimiwa na Josef wi khi, “Aman wina hi Nil Ghaku katen wi ngan ben, 18ciwi amesü kenon dende kesa tagü aghaku wina shhugho aghang maha dsa wa. 19Tsaseng wi amesü qan-yi nu ma gü ketan kesa tagü na shhugho. Tsüthu na amesü qan-yi ntsa kesa hi Ejipt wi khiela tsüti kesa npi mu. 20Amesü qan-yi kesathu tsüna kekunonthu ghan dsa, 21isala thola tsü chüya nben, kepaghenanye mathu na khili lela kishi makesü. Tsaseng wi hi shaghaya. 22Hi kheneng iman wi asu tsang tagü na ma ton kesü wi shhugho ma bi kejon bün nu nyün keben muya. 23Tsaseng wi asu tsang kepa wi tagü na ma bi zeng nu ayyikeshü meghü na mo pi jü wa kesa na shhugho, 24nu ma tsang kezengthu tsüna kejon kebenthu tsü meji ya. Hi aman keni tsü khipi demathu kiza. Isala thola tsü jjügi khipi hi kiza keya nmila.”
25Josef na kadimiwa wi kiza, “Aman keni tsüna ajjügi kesütan; Anyiza na ma mangwa sale ben khe pi no kizadha. 26Amesü kekunon tagü tsüna amapi tagü, nu asu tsang ma bi kejon keben tagü tsü lela amapi tagü; manyi jjügi kesü. 27Amesü qan-yi kesa tagü, nu asu tsang tagü ma bi zeng nu ayyikeshü meghü na mo pi jü wa kesa asakhenwa keshhugho tsüna azeng amapi tagü sa keten tsü le. 28Tsüna hi no kekiza tile — Anyiza na ma mangwa sa wale ben khe pi no kizadha. 29Ejipt yyi tsüdi wi amapi tagü jü pala meshumena ntsa saben. 30Tsaseng wi amapi tagü azeng sa nu amapi kemehaithu tsüdila maliaben, kepaghenanye azeng tsüna diyyiwa yasaben. 31Meshumena kesa mapi tsüdi maliaben, kepaghenanye azeng sa ketenwa tsüna qhethiketen saden. 32No keni tughu mang kesa tsüna Anyiza na tsü ssan pi thengdha, nu ma wan tsü senghoaben.
33“No khili kemetsa nu kemeshen kemehai nyi kesü kessiya nu ma pi Ejipt yyi tsüdi kaghangwa sa thsülo. 34No kedi nyi pahan yala meshumena kesa mapi tagü jü tsü asu kegishü manga wi kesü saghuya thsü. 35Mathu ya gho keten mapi kemehai jüwi kedsakejjü tsüdi saghuya thsü, nu asu tsüpi anyunutiwa wi tsanqai nu hieyalo kesa kekhang pi mathu cülo. 36Ejipt wi azeng amapi tagü gho keten tsü jüwi senle kesalina diyyiwa ghena kedsakejjü pi tsanqai yalo. Tsüti sayathu anyithu na azeng ghena khhwen nben.”
Josef pi Ejipt miwi Ahng saya thsü
37Kadimiwa nu ma kekhu wi kedithu na kemeshen hawa ha mehai le khi, 38nu ma mathu wi khi, “Ithu na Josef Anyiza ghamu na ma miwi kebenwa ha miwi kemehaiki mu meyadha le.” 39Kadimiwa na Josef wi kiza, “Anyiza na ha tsüdi pi no ccücadha, tsalina no nyu miwi kemetsa nu kemeshen kemehai ben le kesa muti yadha. 40#Kek 7.10.Hi no pi diyyiwa ha miwi ben thsüden, nu inyithu tsüdila njühkina thsüden. No kekhang sen nu ishiwa saden. 41Hi khili nten no pi Ejipt tsüdi miwi Ahng sa thsüdha.” 42#Dan 5.29. Kadimiwa na ma kwenzza wi kadimi kemechan ma miwi keben kwenzzakeqhan tsü khushiya nu pi Josef kwenzza wi chi cü. Ma linen gwomejuwa kaghazu pi ma pvü thsü nu suna yan pi ma meyan thsü. 43Ma gorugari kadimi shiwa ji tsüpi ma pvü thsü, nu ma nyuwakekü ghikehiethu ya ma tuwi wa “Tankhu chilo! Tankhu chilo! isa jisha thsü.” Tsütinu Josef pila Ejipt tsüdi miwi ahng sa thsüa. 44Kadimiwa na Josef wi khi, “Hi kadimiwa — nu Ejipt tsüdi wi anyi thola njüh nkekhuchi tsü accü akwen zankiya nben.” 45-46Ma Josef pi Ejipt nyi nyan wina Zafenath Paneah ci, nu Heliopoli nyunuti wi keqhaikedi kesü Potifera nga Asenath pi ma wubvü sa thsüa.
Josef na ma kahang mapi changha wi Ejipt kadimiwa kekuli sa wa. Ma kadimi kadipen teshi nu ayyi tsüdi wila wa. 47Meshumena kesa mapi tagü jüwi alli na apvüya ntsawa sa. 48Josef na tsüdi saghuya nu pi anyunutithu wi tsanqai. Ma anyunuti tsüdi wi nu tsü kevü alli wi mukeya asu tsüpi tsanqaiya. 49Ciwi asu na ji ntsa sa kesalina Josef na kede meyakhila nu nkedela — tsüna atssükedone wi ahachan ti sa.
50Azeng npi kegho wi Josef na Asenath wina atsa keni muya. 51Ma khi, “Anyiza na hi sapi igükeccü tsüdi nu iba theghi tsüdi mali thsüdha,” tsalina ma tsa tssütsewa nyan pi Manasseh #41.51: Manasseh; Anyan hawa ha Ibri jüh wina ‘mali thsü kesa’ ci. 52Ma kheneng khi, “Agükeccü kesa yyi wi Anyiza na atsanga pi hi cüdha,” tsalina ma tsa keniwa nyan pi Efraim #41.52: Efraim; Anyan hawa ha Ibri jüh wina ‘atsanga pi kecü’ ci.
53Ejipt yyi wi amapi tagü meshumena kesa matsü tsüna asakhen sa, 54#Kek 7.11. nu Josef na kekhi ti amapi tagü azeng tsüna gho. Ayyi kepa wi tsüdila azeng sa, isala Ejipt yyi tsüdi wi kedsakejjü na ben. 55#Jhn 2.5. Ejipt nyithu na ghamaya lethu mathu kadimiwa wi wa kedsakejjü khie. Tsalina ma mathu na Josef wi wa nu ma mangwa le mathu kiza khe salo kiza. 56Azeng nkemehai na diyyiwa maben wila sa wa kesalina Josef na asabe tsüdila sha nu asu pi Ejipt nyithu wi jeü cü. 57Ayyi tsüdi wi anyithu na Ejipt wi gho nu Josef wi asu shü, kepaghenanye apen tsüdi wila azeng na nmehai sa wa.
Currently Selected:
ADECHHÜ 41: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.