ADECHHÜ 38
38
Judah nu Tamar
1Tsü tsüwi Judah na ma cünyuthu teshi nu wa anyi kesü Adullam nyunuti wina keghowa Hira gweghe ben wa. 2Ciwi Judah na Kanaan nyi Shua nga kesü metuya. Ma nzawa tsü yaya, 3nu ma atsa kesü pvügha cü, nu ma nyan pi Er ci. 4Nzawa kheneng atsa-npvüya nu atsa kepa wi kesü pvügha cü, nu ma nyan pi Onan ci. 5Kheneng ma atsa kesü pvüghaya nu ma nyan pi Shela ci. Atsa tsü kepvügha tsüwi Judah na Akhzib wi ben.
6Judah na ma tsa tssütsewa ghena awubvü ma nyan Tamar kesa yapi cü. 7Er na anyi nmehai, ma Apvüwa nkenen sa kesalina Apvüwa na ma pathia. 8Tsaseng wi Judah na Er cünyuwa Onan wi kiza, “Wala ncü denyilewa ssijenlo. Ma miwi ma wuba cünyuwa kekuli tsü sa chi nu ncünyuwa ghena ashicü muya thsülo!” 9Isala Onan na atsangathu tsü ma ji sa nben kesa chüya nu ma wa ma cü denyilewa ssimehai kesa wi ma gwotssü pi ayyi wi khatsü thsüa, isanu ma biwa ghena ashicü nben thsüla. 10Ma kekuli tsüna Apvüwa nkenen sa nu Apvüwa na ma la pathia. 11Tsaseng wi Judah na ma cünyiewa Tamar wi kiza, “Itsawa Shela na npi pvüza keya chu whala nba jjen wi denyi ben lalo. Ma cünyuthu pathi kesa ti Shela la pathi nashe kemessi ghena ma ha khi. Tsalina Tamar na ma ba jjen wi wha neng.”
12Matsü pahan seng wi Judah wubvü na shüa. Judah na ma nonke-ü tsü cenya theng nu ma pvüshangwa Hira, Adullam wina keghowa, manyi Timnah wi ma khaghaneni ssen han keben witsü wa. 13Nyu na Tamar wi n-myi na Timnah wi ma khaghaneni ssen han watenle kiza. 14Tsalina Tamar na ma denyile thsümeni mphi keten tsü kemili, nu alikeshanthsü kesü pi ma mmi shanbhonya nu wa Timnah wi kewalen anyuti kesü Enaim kedulen wi donki wa. Judah tsa pvükhenwa Shela na pvüza wadha kesa ma chüben, isala ma pi Shela wubvü npi sa thsü.
15Judah na ma mukeya wi ma mmi shanbhon pvü keten lina keqheza menkedsa nza kesü le meshen. 16Judah na alen katen wi ma kete wi wha nu khi, “No amen khaju ya ben nu?” (Nzawa tsüna ma cünyiewa le kesa ma nchü.)
Nzawa na khi, “No mangwa pi hi cü ben nu?” 17Ma lunneng “Hi aneni zza kesü kesun chi cüben.”
Nzawa na khi, “Isalethu no aneni npi kesun kechi chu pala pahan pi hi dhabi ntheng lathu yishü.”
18Ma keü, “Hi mangwa pi no wi dhabi thengla nu?”
Nzawa na khineng “Nkwen keqhan, n-geshi keqhan nu nkwen wi akhhatssü tsüle.” Tsalina ma tsüthu tsüpi nzawa cü nu wa ma ssimehai, nu nzawa na atsa-npvüya. 19Tamar na ajjen wi whala ma likeshonthsü khupia, nu ma denyile thsümeni tsü mphi neng ya.
20Judah na ma pvüshangwa Hira na aneni sen nu walo, nu nzawa wi ma atsanqai pi dhabi ketheng tsü sen gholo kesun chi, isala Hira na nzawa mu meyala. 21Ma Enaim wi anyi pahan keü, “Keqheza menkedsa nzawa alen kete ha keben tsü khiewa wadha nu?”
Mathu luneng “Keqheza menkedsa nza kesüla hewi ben ntenle.”
22Ma Judah wi ghoneng nu khi, “Hi ma mu meyale. Apen ciwi anyithu na keqheza menkedsa kesüla ciwi nbenle khi.”
23Judah na khi, “Ma ya itsanqaithu pi thengya thsülo. Ishinyi nyu ya ishinyi nan-nkeqhe thsü mvu. Hi ma men pi ma cüale sa, isala no ma mu meya ladha.”
24Asha kecheng seng wi nyu pahan na Judah kiza, “Ncünyiewa Tamar na keqheza menkedsa nza ti sa nu ma khili atsa-npvü tendha.”
Judah kekhi na, “Ma kushi pi nu ssi wa mecangthi thsülo.”
25Nzawa ssinu shhu keten wi ma ajüh kesü pi ma myiwa Judah wi kesun chi; “Hi atsa-npvü keten ha atsanqai hathu pvüwa na le. Hathu ha thowa ji khe ghangchilo — akwen keqhan, ageshi keqhan nu akhhatssü.”
26Judah na tsüthu chüya nu khi, “Nzawa tsüna meshonle. Hi ma tuwi kesau nsa ladha — hi itsawa Shela pi ma meya thsülale.” Nu Judah na ma gweghe njen neng la. 27Ma kepvügha tsü kegho wi ma gweghetsa pvügha ben kesa chüya. 28Ma aggüsanaa keben wi atsa kesü ma kwen changshi chi nu noncca kebenwa na tsü zanya nu anan kenmie pi tsü khün nu khi, “Hawa ha atuwa pvügha le.” 29Isala ma ma kwen zan nengya nu ma cünyuwa na atuwa pvüghaya. Isanu noncca kebenwa na khi, “No hatinu nlen pvükhhi shhughodha.” Tsalina ma nyan pi Perez#38.29: Perez: Anyan hawa ha Ibri jüh wina “pakhhi shhugho” cia. 30Tsaseng wi ma cünyuwa na anan kenmie pi ma kwen khün kepvü pvüghaya, nu ma nyan pi Zerah #38.30: Zerah; Anyan hawa ha Ibri jüh wi ‘tsathang keshhugho kenmie’ kekhi hhai ti cia.
Currently Selected:
ADECHHÜ 38: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.