ADECHHÜ 33
33
Jakob na Esau Metukeya
1akob na Esau ma nyithu meza mejü ssinu gho keten muya nu ma Leah, Rachel, nu ma wubvü meshipvü keni tsangathu gishü pi kepapa saya. 2Ma wubvü meshipvü keni nu manyi tsangathu pi atuwa sa thsü, Leah nu ma tsangathu pi tsashiwa sa, nu Rachel nu Josef manyi pi aseng ntsawa sa thsü. 3Jakob na mathu tu wina wa ma cünyuwa metu nu ma tuwi tagü tughu kukedu. 4Tsalina Esau na bvügho ma khenteggüya nu ma kimang. Manyi qho qai wa. 5Esau na ghang kevüli chi nu nza nu ghanyithu muya nu keü, “Anyi no gweghe ketenthu ha thothu nu?”
Jakob na khineng “Atsanga hathu ha Anyiza na nantizen ntsa nu pi nmaghawa kecüle. 6Tsaseng wi awubvü meshipvü keni nu manyi tsangathu gho, 7tsashi Leah nu ma tsangathu, nu asakhenwa Rachel nu Josef manyi gho; mathu tsüdi gho ma tuwi kukedu.”
8Esau na keü, “Anyi akhang kepa wi hi metu kesathu tsü ma jjügi mangwa nu?”
Jakob na khineng “Tsüna no kenen pvüyale kesalina le.”
9Isala Esau na khi, “Hi kejonla benle, manu; no keben tsüpi nghena thengyalo.”
10Jakob na khi, “Nyele, keujüla hi no kenen pvüyadha lethu no ikwen wi aju ha khuyalo. N-mmi mukeya ha hi Anyiza mmi mukeya ti sadha, no khili anonghe nu hi ssiyadha. 11Tizenthu hi nghena aju sen kegho ha ya cülo; Anyiza na hi nantizen nu hi nsenthu keyishü tsüdi pi hi cüle.” Ma tsü npi khukeya chu Jakob na khi khvu sa.
12Esau na khi, “Kiden-keshaya nu wa na! Hi ntuwi wa tenla na.”
13Jakob na ma luneng “No chüben, ghanyithu na nkhang nu nzü, nu hi asahangthu nu mathu zzathu tsü n-nonccathu yishü. Keujüla mathu ya ghanan kesütanla alentsenmi thsü lethu asahangthu tsüdila shüaben. 14Ituwi wa tenlalo, hi ashisa nsen nie ghaten. Hi asahangthu nu ghanyithu ssi sen nu mijükila gha Edom wi no jügüya ben na.”
15Esau na khi, “Isalethu hi inyithu pahan pi no gweghe thsü na.”
Isala Jakob na luneng “Tsü nsenthu keyishü nmi, isala hi no kenenwa tsü pvüya mvu benle.” #33.15: hi no kenenwa tsü samvu benle; nyelela keujüla tsüna no ghena meshon ben lethu 16Tsalina Esau na tsü ghanan na Edom wi wha nengle alentsen chia. 17Isala Jakob na ma ghena nu asahangthu ghena kemnanpen ajjen kesü sa ketheng Sukkoth wi wa. Tsalina apen tsü nyan pi Sukkoth#33.17: Sukkoth: Anyan hawa ha Ibri jüh wina “akekhwen” cia.
18Jakob na Mesopotamia wina kemehai sa kheneng gho Kanaan yyi wi anyunuti Shekhem tsü cuya, nu anyunuti kete alli kesü wi ma kemnanpen saya. 19#Jos 24.32; Jhn 4.5.Ma rükatssü meza kesü pi Shekhem ba Hamor tsangathu wi tsü shüya. 20Ma ciwi kekinyipen kesü saya nu tsü nyan pi El, Israel Nyizawa cia.
Currently Selected:
ADECHHÜ 33: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.