ADECHHÜ 30
30
1Isala Rachel tsü atsanga pvügha pi Jakob ncü, tsalina ma ma pvünonwa miwi anyonsa shagha nu Jakob wi khi, “Atsanga pi hi cülo, nyelethu hi shüa tendha.” 2Jakob na Rachel miwi ma leben minuya nu khi, “Hi Anyiza kuti saya nben. Ma no ya atsanga nmu thsüla kesawa tsüle.” 3Rachel na khi, “Imaghale Bilha hewi ben, no wa ma ssijen nu ma yala ighena atsa kesü muya thsülo. Tsütinu ma ghena hi ajja kesü sayaden.” 4Tsalina ma Bilha pi ma wuba cüa, nu Jakob na wa Bilha ssijen. 5Bilha na atsa-npvüya nu atsa kesü pvügha pi Jakob cüa. 6Rachel na khi, “Anyiza na hi nantizen cüdha; ma hi kekhie kina cü nu atsa kesü pi hi cüdha; ” tsalina ma nyan pi Dan#30.6: Dan: Anyan hawa ha Ibri jüh wina “kenen wi jühkaghaten kecü” kekhi hhai ti. cia. 7Bilha na kheneng atsa-npvüya nu atsa keniwa pvügha pi Jakob cüa. 8Rachel na khi, “Hi ipvünonwa ssikaghashen ntsa sa nu hi khangyadha; ” tsalina ma nyan pi Naftali#30.8: Naftali: Anyan hawa ha Ibri jüh wina “kesali” kekihhe hhai ti cia.
9Leah na ma npvüghadha kesa chükeya wi ma maghale Zilpa pi Jakob wubvü ti sa thsü. 10Zilpa na atsa kesü pvügha pi Jakob cü. 11Leah na khi, “Hi icenpvü bendha; ” tsalina ma nyan pi Gad#30.11: Gad: Anyan hawa ha Ibri jüh wina “acenpvü keben” kekhi hhai ti cia. 12Zilpa na atsa kepa wi kesü pvügha pi Jakob cü. 13Leah na khi, “Khatila inonghe nu! Nzathu na hi pi kemihhi jjawa isa ci tendha; ” tsalina ma nyan pi Asher#30.13: Asher: Anyan hawa ha Ibri jüh wina “anonkeghe” kekhi hhai ti cia.
14Awhengsu kewwitsü wi Reuben na alli wi wa nu atsueghe #30.14: atsueghe: ghalapvüza kesa wi aghangton kesü ha senthu azza mezighe waben kesa nondiden muya nu sengho ma jja Leah cü. Rachel na Leah wi khi, “Ntsawa na pvükegho atsueghe tsü pahan pi hi cülo.”
15Leah na luneng “No iwuba ssibvü kesa tsü lekete kwe? No khili itsawa tsueghe ha la sen bvüale ben kwe?”
Rachel na khi, “Keujüla no ntsawa tsueghe tsüpi hi cü lethu no shita wi Jakob ssijenya mehai.”
16Minulen wi Jakob na alli wina gho, Leah na shhu ma metu nu khi, “No shita wi hi gweghe njenthu yishü, kepaghenanye hi itsawa ji atsueghe pi no melliyadha.” Tsalina tsü ghaja Jakob na wa ma ssijen.
17Anyiza na Leah kekhie kina cü, nu ma atsa-npvüya nu atsa mangawa pvügha pi Jakob cü. 18Leah na khi, “Anyiza na akutimen pi hi cüdha, kepaghenanye hi imaghale pi iwuba cü kesalina:” tsalina ma tsawa nyan pi Issakhar#30.18: Issakhar: Anyan hawa ha Ibri jüh wina “kedenga nyi kesü” nu “ciwi akutimen ben” kekhi hhai ti cia. 19Leah na kheneng atsa-npvüya nu atsa tughowa pvügha pi Jakob cü. 20Ma khi, “Anyiza na aju kemehai ntsa pi hi cüdha. Iwuba na khilitsü hi ghaliwa tendha, kepaghenanye hi atsa tugho pvügha pi ma cüdha; ” tsalina ma nyan pi Zebulun#30.20: Zebulun: Anyan hawa ha Ibri jüh wina “khuya” nu “aju” kekhi hhai ti cia. 21Ma tsaseng wi anga kesü pvüghaya nu ma nyan pi Dina ci.
22Tsaseng wi Anyiza na Rachel meshenchi, nu ma kekhie kina cü nu ma sapi atsa muya kemehai sa thsüa. 23Ma atsa-npvüya nu atsa kesü pvüghaya. Ma khi, “Anyiza na atsa kesü pi hi cü nu hi wi nyu pangbi kesawa tsü sen bvüdha. 24Apvüwa na hela atsa pi hi kecüwa sa; ” tsalina ma nyan pi Josef#30.24: Josef: Anyan hawa ha Ibri jüh wina “ma kepa wila pi kecüwa sa” nu “ma khusen bvüdha” kekhi hhai ti cia.
Jakob na Laban Ssinu Keccünengli
25Josef pvügha keya seng wi Jakob na Laban wi kiza, “Hi teshichi nu hi ya ijjen wi wha thsü yilo. 26Hi no kekuli sa nu mellikeya iwubvü keni nu itsangathu pi hi cü nu hi wha thsülo. Hi no kekuli mehaitsü kesa tsü no chüben.”
27Laban na ma wi khi, “Hi yala ha khi thsülo; hi chükeya Apvüwa na nghena sawegü pi hi cüdha. 28Mangwa pi nkutimen sa cüten khe khilo, hi pi no cüaden.”
29Jakob na khineng “Hi khati no kekuli sa nu hi nmesüsithu kenoncca ghena jikayi ya khe no chüben. 30Hi npi kegho witsü keu sa keben tsüna jikayi ntsa sadha, nu Apvüwa na hi khiewa wa khe sawegü pi no cü. Khili ha hi ketanla ighena kidenkeya tsü sadhale!”
31Laban na khi, “Hi mang pi no cü nu?”
Jakob na luneng “Hi akutimen mangla ya nten. No hi kekhi ha sa lethu hi nsahangthu noncca benden. 32Hi yala nansü nsahangthu jawi wa thsü nu khaghaneni zza kenimegho, aneni zza kishenki nyelela kinaqhe tsüdi khuya thsülo. Ikutimen keyamvu tsüdi tsüna tsüdha. 33Tsaseng wi hi atsentsa sala nye khe no muya mehai. No ikutimen tsü ghang kegho wi keujüla hi aneni kinaqhe nyelela kishenki nkenye na benla nyelela khaghaneni kenimegho nkenye na benla lethu tsüna hi ghanfü yale kesa no chüyalo.”
34Laban na khineng “Tsüna mehaiben. No kekhi tsüti sa na.” 35Isala Laban na tsü ghanan aneni süpon mathu miwi kinaqhe nyelela kishenki keben, nu aneni ghala mathu miwi kinaqhe nu kishenki nyelela kemiki keben; nu kenimeghothu tsüdila khupi makepa sa nu ma tsathu yala tsüthu hie thsü. 36Tsaseng wi ma Jakob teshi theng nu ghanan kecheng lenketsen wi wa; nu Jakob na Laban neni kepathu tsü noncca. 37Jakob na alicü, mcüshüli, nu amton chan cünathu khuya nu tsüthu kwe pahan shipi nkiqhe-nkighe sa thsüa. 38Ma achan cünathu tsüpi anenithu na atssü jjüketen khu tuwi chi, kepaghenanye anenithu na atssü jjü kegho wi jigü ketenlina. 39Isanu anenithu na achan tsüthu kete wi jigüthu mathu zza nkiqhe-nkighe, kishenki nu kinaqhe tsüti ca cü.
40Jakob na anenithu nu khaghanenithu kepapa sa thsü nu tsüthu kupi Laban ji nkiqhe-nkighe nu kenimeghothu wiwa peghe thsü. Tsütinu Jakob na ma sahang kuya nu pi Laban ji manyi kepapa sa.
41Asahang kekunonthu na jigü lethu Jakob na achan cüna tsüpi mathu atssü kejjükhu tuwi chi isanu tsüthu ya achan cünathu jawi ca thsü. 42Isala ma achan cünathu tsüpi asahang qan-yi kesathu tuwi tsü nchi. Matsü keu jüna asahang kekunon tsüdila Jakob ji sa, nu qan-yi kesathu tsüna Laban ji sa. 43Tsütinu Jakob na keban ntsa saya. Ma amesüsi, nssümagha, sunsiesa, nu gadathu kejon ben.
Currently Selected:
ADECHHÜ 30: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.