ADECHHÜ 27
27
Isak na Sawegü pi Jakob kecü
1Isak na khilitsü qhai wa nu ma nyon nmuladha. Ma ma tsa keqhaiwa Esau cichi nu ma wi khi, “Itsa!”
Ma nusha, “Hi hewi benle.”
2Isak na khi, “Hi qhai wadha nu wan shüa tendha. 3Nlamugho nu nlakusü khuya nu wa agheja wi ighena asa kesü gathi pvü gholo. 4Nu hi dsa mvu ketenwa tsü nyankate shvu sengho hi cülo. Hi tsü dsakeya seng wi hi npi keshü wina kesawegü sakhenwa pi no cüten na.”
5Isak na Esau ccüneng keben witsü Rebeka na kinaben. Tsalina Esau na asajügü kewa seng wi 6Rebeka na Jakob wi khi, “Nba na nbi Esau wi hati khi keben hi zayale, 7‘Ighena asa kesü gathi pvügho nu nyankate shvu sengho hi cülo. Hi tsü dsakeya seng wi hi npi keshü wina Apvüwa tu wina sawegü pi no cüten na.’ 8Tsalina itsa, hi khili mangwale no kiza khe no tsü salo. 9Anenithu jawi ma zza asa kemehai keni pathi sen gholo, hi tsüpi nba na nen ketenwa nyankate shvu cü na. 10No tsü sen wa ma dsa thsülo, nu ma npi keshü wina sawegü pi no cü thsülo. 11Isala Jakob na ma jja wi khi, ‘Ibiwa Esau na ma gwo wi assen kejon ben, isala igwo tsü chenchen. 12Iba na hi mejjen nan nu hi ma mechu benle kesa chüyathu kesawegü nyela hi ketanla kishen-keshiwa sengho imiwi chiyaben.’ ”
13Ma jja na ma wi khineng “Nghena kishen-keshiwa tsü ya imiwi gho thsülo, itsa; no ijühkina nu wa aneni ssigho hi kekhi ti salo.” 14Tsalina ma wa tsüthu khuya nu sengho ma jja cü, nu ma jja na ma ba kenenwa atsse tsü kiden pi ma cü. 15Tsaseng wi Rebeka na Esau thsü kemehai ntsa pi ajjen wi ketheng tsü khuya nu tsüthu pi Jakob mphiya thsüa. 16Ma aneni hyu pi ma hacü nu ma sun chenchen kesa miwi chi cü. 17Atsse nyankate sa ketheng nu amesa gü ketheng tsü saghu pi Jakob kwen wi chi cü.
18Tsaseng wi Jakob na ma ba wi wa nu khi, “Iba!” Ma luneng “Hi he wi benle. No itsa thowa nu?”
19Jakob na ma luneng “Hi ntsa keqhaiwa Esau le; no hi kekiza ti hi tsü sa senghodha. Donki nu hi nghena asa sen kegho ha dsayalo, isanu no sawegü pi hi cülo.”
20Isak na khi, “Itsa, no khati nu wan muya nu?” Jakob khineng “NPvüwa Anyiza hi kiqa chi nu hi wan muyale.” 21Isak na Jakob kiza, “Hi tetsaki gholo hi no pa nan na. No ntsakhiwa Esau kwe?” 22Jakob na ma ba tetsaki wha nu ma ba na ma pa nan nu khi, “Nhhai na Jakob hhai ti, isala nhacü tsü Esau hacü tile.” 23Ma Jakob chüshi meyala, kepaghenanye ma hacü na Esau hacü ti assen sha kesalina. Ma sawegü pi cüle keben wi, 24kheneng keü, “No ntsakhiwa Esau kwe?”
Ma khineng. “Hi Esau le.”
25Isak na khi, “Asa sengholo. Hi tsü dsakeya seng wi sawegü pi no cüden.” Jakob na tsü pie nu ma wi gho, nu kisengtssü pahan sengho ma jjü thsü. 26Tsaseng wi ma ba na ma wi khi, “Itsa, hi tetsaki gho hi kimang cülo.” 27#Ibr 11.20. Ma ma ba kimang kegho wi Isak na ma thsü kahan nan — isa nu sawegü pi ma cü. Ma khi, “Itsawa, hankedemvu na Apvüwa na sawegü pi alli kesü miwi kechi han kemehai tile! 28Apvüwa na tang wi akejan pi no cü nu alli sapi ayyi mehai keyawa sa. Ma asu nu kisengtssü kejon pi no kecüwa sa! 29#Ade 12.3. Mizzatentithu na nmagha sa nu anyi kejon no kekinyiwa sa. No nshilithu tsüdi miwi kekhang sen nu njja shicüthu na no kekinyiwa sa. No kishenkecüthu na kishen-keshi pvükeyawa sa, nu sawegü pi no kecüthu na kesawegü pvükeyawa salo.”
Esau na Isak Kesawegü Kekhie
30Isak na ma kesawegü khidhi nu Jakob na bvü meyi Esau na asajügü wa nu gho. 31Ma la atsse nyankate saya nu pie nu ma ba wi wa. Ma khi, “Iba, donki nu hi nghena asa sen kegho ha dsayalo, isanu no kesawegü tsüpi hi cülo.”
32Isak na keü, “No thowa nu?”
Ma khineng “Hi ntsa keqhaiwa Esau le.”
33Isak na kedheggüwa nu khi, “Tsüna thowa na asa pathi nu shvu sengho hi cü nu? Hi khili hatu no npi kegho wi dsayadha. Hi sawegü pi ma cüdha, nu tsüna anuphanla ma ji sadha.”
34Esau na ha zakeya wi sashü na magha ntsa qai nu khi, “Iba, no kesawegü pi hi la cülo.”
35Isak na khineng “Ncünyuwa na gho hi mechuyadha. Ma no kesawegü sen pvüdha.”
36 #
Ade 25.29-34. Esau na khi, “Ma nansü ha keni tughuwa hi mechu bendha. Ma nyan pi Jakob ci jiketsü. Ma hi tssütsewa shei khuya nu khili la hi kesawegü sen bvüdha. No ighena kesawegü kesüla mesha pi ntheng kwe?”
37Isak na khineng “Hi ma sapi nmiwi apvüwa sa thsüdha, nu ma shilithu tsüdi pi ma maghathu sa thsüdha. Hi asu nu kisengtssü pi ma cüdha. Khili mangla nmidha nu hi nghena mangla sa meyadha, itsawa!”
38 #
Ibr 12.17. Esau na ma ba wi khie khvu sa; “Iba, no ighena kesawegü kesütanla nmidha kwe? Sawegü pi hi la cüne, iba!” Esau na qai wa.
39 #
Ibr 12.20. Tsaseng wi Isak ma wi khi,
“Tang wi nghena akejan nmidha,
nu nghena ayyi lli kemehai la nmidha.
40 #
Ade 36.8; 2 Kad 8.20. No njünnu ghena hangben,
nu ncünyuwa magha saben,
isala no matang #27.40: matang; nyelela ccen ben meyala keshagha wi keshagha wi no ma kekhang wina pvükhhi bvü shaben.”
41Esau na Jakob nanmeghü, kepaghenanye ma ba na kesawegü pi Jakob cü kesalina. Ma ketanla khi, “Iba keshü ghena nonke-ü tsü tsakidha; tsaseng wi hi icünyuwa Jakob pathi cüden.”
42Isala Rebeka na Esau na acho kiden keben tsü zakeya wi Jakob cichi nu khi, “Kinalo, ncünyuwa Esau na no pathi cüle kidenben. 43Tsalina itsa, hi kekhi ti salo. Shagha nu Haran wi ibaghawa Laban jjen wi bvü walo, 44-45Ncünyuwa na ma leben keminu npi kagha chu, nu no ma miwi kuli kechi tsü npi kemali chu no Laban gweghe benlalo. Tsaseng wi hi anyi pahan kesun pi no ssi neng gho thsüaben. Mangsale hi itsa keni qho ghanan kesütan dedi thsüa nu?”
Isak na Jakob Kesun pi Laban wi Kewa thsü
46Rebeka na Isak wi kiza, “Hi Esau wubvü Hitti nyiwa ghena inonhi nu iccükwenshüdha. Keujüla Jakob la Hitti nyi ghala kesü yalethu hi shü kesawala mehaile!”
Currently Selected:
ADECHHÜ 27: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.