ADECHHÜ 16
16
Hagar Nu Ishmael
1Abram wubvü Sarai na atsanga nmi. Isala ma Ejipt nyi maghale kesü ma nyan Hagar kesa na ben, 2tsalina ma Abram wi kiza, “Apvüwa na hi yala atsa npvügha thsüladha, no wa imaghalewa gweghe jenlo. Isathu ma ighena atsa kesü pvügha cü benle.” Abram na Sarai kekhi jüh tsü kinaya. 3Tsalina ma Hagar pi Abram wubvü meshibvüwa sa thsüa. (Hana Abram na Kanaan yyi wi kahang amapi tagha seng wi sa.) 4Abram na Hagar ssijen nu ma atsa-npvüya. Hagar na atsa- npvükeya wi kapvü nu Sarai nkhichila shagha.
5Tsaseng wi Sarai na Abram wi khi, “No kesazzi ghena Hagar na hi n-ghang chüla saben,#16.5: No kesazzi... saben; nyelela Sazzi pi hi shun keben ha ghena no ketizen kesawa salo. Hi ma khupi no cü nu ma atsa-npvüya meyi hi nkhichila wadha. No la hi wa meshon khe Apvüwa na ishinyi ghan kenanwa salo.”
6Abram na luneng “Ma ncakhu wi nmaghale, no ma miwi mangwa samvu khe saya mehai.” Sarai na Hagar nkhichila nmehai ntsa sa nu ma yala bvü thsüa.
7Shur wi kewa len yyikeshü tssükebvüpen kesü wi Apvüwa nyilo kesü na gho Hagar metuya 8nu khi, “Sarai maghalewa Hagar, no khiewa na gho nu khiewa wa ten nu?”
Nzawa na luneng “Hi ipvüwale Sarai wina bvü tendha le.”
9Nyilowa na khi, “Npvüwale wi whanenglo, nu ma maghale sabenlo.” 10Nyilowa kheneng ma kiza, “Hi ashicübvügha kejon pi no cüden, thola tsüthu siyakhi nben. 11No atsa kesü muyaden, nu ma nyan pi Ishmael #16.11: Ishmael: Anyan hawa ha Ibri jüh wina “Anyiza zaben.” cilo; kepaghenanye no n-gükeccü wi kiqai hhai tsü Apvüwa na zayadha. 12Isala ntsa tsüna aghangsa gada ti hangben; ma anyi tsüdi shun nu anyi tsüdila ma shunben. Ma ma shilithu tsüdi gweghe hang nben.”
13Hagar na ma ketanla ma ccüneng nu khi, “Hi ntsakhiwa Anyiza mukeya seng wi hangben nu tsü cüki khipi nyu kizaya mehai kwe?” Nzawa na Apvüwa ma keccünengwa tsüpi “Muketenwa Anyiza” isa ci. 14Tsalina Kadesh nu Bered manyi jüwi atssükhang tsüpi “Hangben nu hi mukebenwa tssükhang” isa khiden.
15 #
Gal 4.22. Hagar na atsa kesü pvügha pi Abram cü nu ma nyan pila Ishmael ciya. 16Tsü tsüwi Abram na ma kahang mapi achentazen nu tugho sadha.
Currently Selected:
ADECHHÜ 16: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.