ADECHHÜ 13
13
Abram nu Lot Manyi Kezighe
1Abram na ma wubvü ssiya nu ma keben tsüdi sen nu Ejipt na aghawa shu Kanaan cülawa wi wa, nu Lot la ma nie wa. 2Abram na keban kesü, ma khaghaneni, anenithu, nu amesüsi, rükatssü nu suna kejonla ben. 3Ma ciwi na ketsen sen apen kesü na kesü wi wala Bethel kepeghe wi wa. Ma ciwi wa Bethel nu Ai manyi jüwi kheni ma keben pen tsü cuya, 4nu kekinyipen kesü saya. Ciwi ma Apvüwa kinyi.
5Lot la khaghaneni, anenithu, amesüsi, ma theghi nu amaghathu na ben. 6Ciwi ayyi kemehai na manyi gweghe keben qo nmi, kepaghenanye manyi qho asahang sha ntsa keben ghena. 7Tsalina ciwi Abram nu Lot sahang noncca ketenthu jawi kitagha shagha. (Tsü tsüwi Kanaan nu Periz nyithu na ayyi ciwi hangben.)
8Tsaseng wi Abram na Lot kiza, “Ishinyi ashili, n-nyi nu inyithu kitagha thsü yishü. 9Tsalina ishinyi zighea na. Ayyi no kenen penwa kessiyalo. No alen kesü wi wathu, hi alen kepawa wi wana.”
10 #
Ade 2.10. Lot na ghang kevüli chinan Jordan yyiketijü maben, Zoar wi kewa len tsüdi atssü kejon ben nu Apvüwa Sanku#13.10: Apvüwa Sanku: tsüna Eden Sanku tsü khiben, nyelela Ejipt yyi ti kesa muya. (Hawa ha Apvüwa na anyunuti Sodom nu Gomorrah tsü npi keyasa tsüwi.) 11Tsalina Lot na ma ghena Jordan yyiketijü maben kessiya nu nishuwa wa. Tsütinu manyi zighe. 12Abram na Kanaan yyi wi ben wa, nu Lot na wa Sodom kete yyiketijü anyunuti jawi hang wa. 13Ciwi anyithu na gheshighena nu sami pi Apvüwa shunden.
Abram na Hebron wi kewa
14Lot kebvü seng wi Apvüwa na Abram kiza, “No keben pen wina mehaitsü ghang kevüli chilo. 15#Kek 7.5. No ayyi mukeben tsü tsüdi hi pi no nu nshicüthu cüden, nu tsüna anuphanla nji sa ben. 16Hi ashicübvügha kejon pi no cüden, nu thola mathu sikhiya nben; tsüna ayyinikhu sikhi keyawa la le ben. 17Shagha nu wa ayyi maben ghangchilo, kepaghenanye hi tsü tsüdila pi no cüaden.” 18Tsalina Abram na ma keben pen ketsen sen nu wa Hebron wi Mamre ji chan kemetha kete wi ben wa, nu ma ciwi kekinyipen kesü sapi Apvüwa wi chi.
Currently Selected:
ADECHHÜ 13: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.