BVÜKESHHU 24
24
Cenkethenjüh miwi Kishen kechi
1Apvüwa na Mosa wi khi, “No, Aaron, Nadab, Abihu, nu Israel nyi accülikesathu achentagü na ayikha wi shhugho hi wi kegholo; nu nthu na alen kesie wi ben nu kukedu kinyilo. 2No ketan khe kepa wi ikete wi nghola. Anyithu ya ayikha wi lela nshhugho thsüla.”
3Mosa na wa Apvüwa na ahza khukechi nu ayenkhukechi tsüdi khipi anyithu kiza, nu anyithu tsüdila gweghe khineng, “Ikhang na Apvüwa kekhi tsüdila saden.” 4Mosa na Apvüwa yenkhukechithu tsüdila zhüya. Ma tsü ghanenwa wi mitu na shagha ayikha ccü wi kekinyipen kesü saya, nu alon taghakeni pi Israel mizza taghakeni ghena shengya. 5Tsaseng wi ma anyi kepvünyi pahan kesun chi nu mathu na mecang pi kekinyi sa nu amesü süpon pi ahhansha sa nu kecca ghena kekinyi sapi Apvüwa cü. 6Mosa na ajjü tsü pahan khupi akhu wi chiya, nu pahan pi kekinyipen wi keghü chi. 7Tsaseng wi Apvüwa na khi kechi nie nu zhüketheng Cenkethenjüh Lesüshen tsü khuya nu tsü misikhhali si pi anyithu kizachi. Mathu khi, “Ikhang na Apvüwa jühkina den nu ma salo kekhi tsüdila saden.”
8 #
Mat 26.28; Mrk 14.24; Luk 22.20; 1 Kor 11.25; Ibr 10.29; Ibr 9.19-20 Tsaseng wi Mosa na ajjü pi akhu wi chiya nu tsüpi anyithu miwi keghü. Ma khi, “Hawa ha Apvüwa na ayenthu ha khukechi wi nthu ssinu cenkethenjüh jjüwa tsüle.”
9Mosa, Aaron, Nadab, Abihu, nu Israel nyi ccülikesathu achentagü na ayikha wi ki, 10nu mathu na Israel Nyizawa tsü mu. Ma ccü mpha kekhu tsüna safir lon pi zhüketheng atsena sapi akulu kemetha ti kesa. 11Anyiza na Israel nyi ccülikesathu ha patena nsa; mathu na Anyiza muya nu tsaseng wi wa dsa nu jjüya.
Mosa na Sinai Yikha miwi keben
12Apvüwa na Mosa kiza, “Ayikha wi shhughola hewi hi hieben lalo; hi alonpha keni miwi Israel nyithu ghena kecükegwe yenthu zhüketheng tsüpi no cüden.” 13Mosa nu ma kekiqawa Joshua manyi kidenya, nu Mosa #24.13: kheni zhükemilikechi kesü wi mathu na na kemetha yikha wi tsü ki. 14Mosa na accülikesathu wi kiza, “Ishinyi na kemnanpen hewi npi kegho neng chu ishinyi hieben lalo. Aaron nu Hur manyi na nthu gweghe ben, keujüla nthu jawi kicennali ben lethu manyi wi wa südheya mehai.”
15Mosa na Sinai Yikha wi ki nu akulukeshü na tsü kejibhon ya. 16-17Apvüwa tenle kesa kewegü na gho ayikha miwi ben wa. Irsael nyithu tuwi kewegü tsüna anni na ayikha miwi mecang keben ti mu. Akulukeshü na ghanan tugho ayikha tsü kejibhon, nu tagü ghanan wi Apvüwa na akulukeshü wina Mosa cichi. 18#Aye 9.9. Mosa na ayikha wi ki akulukeshü non wi dula ghanan nu ghaja jügha ben wa.
Currently Selected:
BVÜKESHHU 24: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
