BVÜKESHHU 14
14
Kenmie Tssükedone Kepvüdhi
1Tsaseng wi Apvüwa na Mosa wi kiza, 2“Israel nyithu na kheneng wa Megdol nu Kenmie Tssükedone manyi jü Baal Zefon kete Pi Hahiroth wi kemnanpen sayalo kizalo. 3Kadimiwa na Israel nyithu na diyyiwa wi kegoedeja nu ayyikeshü wi shhugho meyala benle meshenben. 4Hi ma sapi leben dhu thsü, nu ma nthu jügü ghaben, nu hi kadimiwa nu ma süpahizi miwi khangkeyawa tsüna inyankethang senghoben. Tsaseng wi Ejipt nyithu na hi Apvüwa le kesa chüyaben.” Israel nyithu na mathu salo kekiza ti sa.
5Nyu na Israel nyithu na bvüdha le khipi Ejipt kadimiwa kekiza wi ma nu ma kekhu wi kedithu na mathu kemeshen kemili nu khi, “Ikhang khati sadha nu? Ikhang na Israel nyithu ya bvü thsü, nu mathu pi ikhang nssümaghathu nsa thsü ladha!” 6Kadimiwa na aghi ghena ma gorugari nu süpahizi kidenya. 7Ma gorugarithu, kemehai ntsathu meza tugho, nu Ejipt wi gorugari kepathu mathu kessithu ssiya nu wa. 8Apvüwa na kadimiwa sapi leben dhu thsüa, nu ma Israel nyithu na khang ntsa bvüketen tsü jügü wa. 9Ejipt nyi süpahizi na goru, gorugari, tsü kessithu ssiya nu wa Kenmie Tssükedone katen Pi Hahiroth nu Baal Zefon kete wi Israel nyithu na kemnanpen wi keben mathu jügüya.
10Israel nyithu na kadimi nu ma süpahizi na mathu jügü keten mukeya wi mathu qhethiketen nu magha pi Apvüwa wi kekiqa khie. 11Mathu na Mosa kiza, “Ejipt wi ithu kevhüpen nmila khati nu no mangkesa na ithu ssi shhugho he ayyikeshü wi shü thsüale ben nu? Ghangchilo, no Ejipt wina ithu ssi shhugho khati sadha khe! 12Ithu Ejipt npi keteshi wina hati sa benle no nkiza kwe? Ikhang teshi pi ikhang yala Ejipt nyithu nssümaghathu saben thsülo no kiza kwale. Hewi ayyikeshü wi shü kesatsü ciwi nyu nssümaghathu sa kebenwala ikhang ghena mehai kesale.”
13Mosa na khineng, “Nmessila nu zükeqhe ngan yalo. Nthu nansü Apvüwa na khati sa nu nthu hangshaya ten khe nthu na muyaben. Nthu khiela Ejipt nyithu nmu nengdha. 14Nthu tsüdi ceenben, Apvüwa na nthu ghena aghisaden.”
15Apvüwa na Mosa wi kiza, “Nthu mangkesa na kekiqa ghena magha benten nu? Anyithu na atujügü walo kizalo. 16Nkhhatssü zanki pi Tssükedone miwi chilo. Atssü na gishü zighethu Israel nyithu na ayyi keqha miwi na atssükedone tsü pvüdhiya mehai. 17Hi Ejipt nyithu sapi leben dhu thsü nu mathu na Israel nyithu jügü ghaten. Hi kadimiwa, ma süpahizi, ma gorugari, nu goru kessithu miwi khangkeya ghena inyankethang muyaden. 18Hi mathu miwi khangya lethu Ejipt nyithu na hi Apvüwa le kesa chüyaben.”
19Anyiza nyilowa Israel süpahizi tu sa ketenwa tsüna apen ketsen sen nu mathu seng wi wa. Akulukeshü cüwa tsü la apen ketsen sen wa 20Ejipt nyithu nu Israel nyithu jüwi ben wa. Akulukeshü tsüna Ejipt nyithu ghena kejang sa thsüa, isala kewegü pi Israel nyithu cü, isanu aghaja thangthang süpahizithu na khokho ketsakili gho meya.
21Mosa na ma kwen zanki pi atssükedone miwi chi, nu Apvüwa na nishu meghü kekhang pi atssükedone mo neng thsüa. Tsüna aghaja thangthang sho nu atssükedone tsüpi ayyi qhayi sa thsüa. Atssü na gishü zighe, 22#1 Kor 10.1,2; Ibr 11.29. nu Israel nyithu na ayyi keqha wi atssü na ghapeli qho ajjen-keshon ti sa nu atssükedone wina shhua. 23Ejipt nyithu na goru, gorugari, nu goru kessithu tsüdi ssinu mathu seng wi mathu jügü sen atssükedone wi wa. 24Ghanenwa tsantheghi tuwi Apvüwa na anni nu akulukeshü cüwa wi ben nu Ejipt süpahizi ghangchi, nu mathu pi agükeccü wi khalachia. 25Ma mathu gorugari ccü sapi shunten thsü nu mathu agüccü ntsa sa. Ejipt nyithu na khi, “Apvüwa na Israel nyithu ghena ikhang ssisa nu shunben, ikhang na mathu tuwi na bvü wa na.”
26Apvüwa na Mosa kiza, “Nkwen zanki pi atssükedone miwi chi, isathu atssü na Ejipt nyithu nu mathu gorugari nu goru kessithu miwi gho neng shaben.” 27Tsalina Mosa na ma kwen zanki pi atssükedone miwi chi, nu ghanenwa wi atssü na ma pen wi gho neng. Ejipt nyithu na atssü wina shhuale sa, isala Apvüwa na mathu pi atssükedone wi cüchia. 28Atssü na kheneng gho Israel nyithu nie sen nu atssü wi duketen Ejipt gorugari, goru kessithu, nu süpahizi kesüla nheila meyenbhon ya. 29Isala Israel nyithu na ayyi keqha wi atssü na ghapeli qho ajjen-keshon ti sa nu atssükedone wina shhua.
30Tsü ghanan wi Apvüwa na Ejipt nyithu kwen wina Israel nyithu hangsha cü, nu Israel nyithu na mathu atssükedone ghüsa wi shü keben mu. 31Israel nyithu na Apvüwa ma kekhang wina Ejipt nyithu miwi khangya kesa mukeya wi mathu na Apvüwa messi, nu mathu na Apvüwa nu ma maghawa Mosa nondi ya.
Currently Selected:
BVÜKESHHU 14: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
