LUK 22
22
Jisu Boshvula Titse Tedorhi Kethyü
(Mt 26:1-5; Mk 14:1-2; Jn 11:45-53)
1Tsüselo Nken kechwi Nga kebu no shümvuo tensü ketyü Nga gü kho nni ryü zhü. 2Lo peshükeda ju lo lesükeshatsin ju le anyugun kenyun rhün-o Jisu dushvu kela rhi sola; kechamvule anyugun le temi dan nshvu kela genyu.
Judas Le Jisu tenshü ti tse A-kendo Kela
(Mt 26:14-16; Mk 14:10-11)
3Tsükatsü Satan le Judas Iskariot tsekethyü tseryü kenyhun che dan nme nyun ka yüla. 4Lo a-le gü peshükeda ju lo shüpahü so keda ju n thon-o Jisu ten pe anyugun tsü titse kethyü tedo zope anyugun hishü. 5Tsüselo anyugun le anyugun shekerhün thyüo raka pe a-tsü titse kethyü anyugun kejoshü la. 6Tsükatsü a-ko a-kendola njüo temi dan le hü kemvu bin ka Jisu ten pe anyugun tsü titseo nyu cheka lo gwa tiyo tsekethyü rhi sola.
Jisu Le Nkenkechwi Chvü Ketyü Ndokelo
(Mt 26:17-25; Mk 14:12-21; Jn 13:21-30)
7Lo Nkenkechwi Nga kebu no shü kemvu tensü ketyü jon le ryülo ntsin, a-le Pitor lo Johan au kolo. 8Tson-o, “Nkenkechwi Nga gü tsü n gun kengüo nga nrün genyu hai le gü ndolo chi,” tsonshü.
9Tsontsin au le, “Nle ayi no gü dikipon ndoshü lotse hü nla?” tson-o ketsoshü.
10Tsükatsü a-le au ka, “Hai le rünyi nyu keyü ka temi nme le laki nyu zü pen-o hai zen keteno tile; hai a-sithen gü a-le ka nme nyu yülo yatselo hai ko a-sithen yü nye. 11Lo yügü ka tsünyu npugü ka, ‘Senkethyü güle nka tesin bin ano senthyükelonyu dan zen-o Nkenkechwi Nga gü ngalo nrün bin tsüle dikipon bin nla? tson-o ketso hü nle,’ tsonshü chi. 12Tsonlo a-le tesoki ketsü pe bin kenjü katsen keda nme tsin pe hai hishü tile; tsügenyu tsünyu ndolo chi,” tsonshü.
13Tson-o au le gun ntsin, gü Jisu le au ka kezo hontse kebin hyulo; tson-o au le Nkenkechwi Nga tsü ndolo.
Npugü Keho
(Mt 26:26-30; Mk 14:22-26; 1 Kor 11:23-25)
14Tsükatsü a-gwünkho le ryü ntsin a-le apostelnyu dan zen-o tyütsü titseo dun lo. 15Tson-o a-le anyugun ka, “Ale kenjünthyü nrün mhundyü hagun zen-o Nkenkechwi Nga higü hi nga nyüri tsin ryü le. 16Kechamvule ale hagun ka zoshü ti, Sunggigü keda nyu tsü thyü penlo kemvuthen ale hagun zen-o tyütsü sin loho kethyü si genyu.”
17Tson-o a-le honpen gü khipenlo njüo Sunggigü shwen shüo zo, “Hagun le hi khipe kenjüntsülo nye. 18Kechamvule ale hagun ka zoshü ti, Sunggigü keda kethyü le ryü kemvuthen ale ntsoka gerhonyu vain zü tsü sinlo keho si genyu.”
19Tsüsika a-le tensü khisolo njüo Sunggigü shwen shüo, “Hile hagun genyu khikeshü amin le; hagun a rüchün hü nrün genyu hi tyü tyü tse nye,” tsonshü. 20Lo tsühontse chvü tyü kelo sika a-le honpen gü ko khi pe anyugun tsü shüo zo, “Honpen higü hile hagun genyu tsunchwikeryü azi gü, jopenron kelo tejvü keshün gü le.
21“Ai hire, a tenshü nrün gü ben ko miz higü ge bin nyo. 22Lo Temi Nyugü rüla we nchwenyu thyü titseo ndo pe bin kenjü hontse thyü tiso; ai che, a tenshü nrün gü we thyülo tiso!”
23Tsonshü ntsin anyugun le segü le hithyü tiyo tsekethyü anyugun npvü khinyunyu ketso sola.
Kedathyü Nrün Zo Kenyi Kethyü
24Lo anyugun le segü no kedatsin thyü tiyo tsekethyü zo kenyi sola. 25Tsügenyu a-le anyugun ka, “Sunggigü shakemvunyu we anyugun raja nyu no anyugun so keda thyü hünyo; lo anyugun so kekvu kebin nyu no sunphen nyu me pepvünyu thyü hünyo. 26Ai hagun we no tson loho; tsüntimvule hagun dan nyu kedagü no aphu dan nyu nchegü hontselo; lo sharhi gü no me gonyu hontselo. 27Kha, tsonlo dun-o ho kebin gü le, keho nyu melo thyü kebin gü le gonla? Tsü le dun-o ho kebin gü le gon mvu ole? Tson-e ako hagun dan nyu me lothyü kebin gü hontse kebin lela.
28“Lo ale tson yatse-e mele a kesemen aphu kae hagun le azen ryüo ti; 29lo apvü le a keda bin ndo njüo a ketsü hontse, hagun ko no akeda nyu azen-o miz nme ge tyütsülo nrün genyu ako hagun no gonlo nrün bin nme ndo pe bin njü nyo. 30Tsügenyu hagun ko no keda bin ge bin-o Israel nyu tsipwen tseryü kenyhun dan jün kera kethyü nyu thyü ti.
Pitor Le Jisu Zan Zomvu Nrün Rüla
(Mt 26:31-35; Mk 14:27-31; Jn 13:36-38)
31“Hire! Simon, Simon! Satan le tho zinkehü hontse hagun pe a-hon thyülo titseo hagun zin titse kethyü hilo laso. 32Ai n ketenyen no ndila mvu nrün genyu ale n genyu hishü sele nye; lo nle n nyunkeluni kelo siki npvünyu ju nyun thyü pechelo nye,” tsonshü.
33Tsüselo Pitor le, “Npugü, ale nzen-o doka nyu metse lo kesi nyue gü titse-e gü logwa le!”
34Tsükatsü Jisu le a-ka, “Pitor, ale nka zoshü tile, nle ashamvu letse kethyü gwünshen ge zokemvuthen ntsoje tero le khun loho,” tson.
Pisakhin, Jola, Lo Zhethon
35Tsüselo a-le anyugun ka, “Ale hagun no rakakhin lo jola lo phaje sen mvuo hagun nikeshü ka hagun le tha peha rhodyü hü le?” tson-o anyugun ka ketso shü.
Lo anyugun le, “Thame rhodyü mvu.”
36Lo a-le anyugun ka, “Ai ntsoka we raka khin kebin nyu no khisenlo, lo tsühontse thakvue senlo, lo tsühvu nme-e kendinyu no a-mirün-e jwen pe zhethon nme-e heilo. 37Kechamvule ale hagun ka zoshü tile, ‘A-swü pe tejvü gwün kerhonyu sin loso,’ tson kethyü nduka thu kenjü gü age tsü thyü penlo mvulo keshvu genyu. A rüla jo tsüdan thyü penlo güzhü la ketsin le.”
38Lo anyugun le, “Npugü hire, hika zhethon kenyhun le bin nle,” tson. A-le anyugunka, “Tsühvu nti-e gwa le,” tson.
Jisu Le Getsemane Chwi Nyu Kehikethyü
39Tsüselo a-le chwiryüo nduka jvü hontse Oliv kazüthun ge küla; lo senthyükelonyu dan ko a-zen-o tsünyu gunla. 40Tson-o a-le tsünyu gunlo ntsin a-le anyugun ka, “Hagun kesemen nyu yüla mvu nrün genyu hibinlo chi.”
41Tsonshüo a-le anyugun nyeki tso shwegwa kho ka npha gü khosenlo njü kehithyüo, “Apvü, nle nkendo yatselo, honpen higü no a nrhila lo. 42Ai akendo nyu mvule nkendo hontselo chi,” tsonshü. 43Tsonshü ntsin tsangge lokethyünyu nme le tsangge a-ge tsüryüo a-thyü nkvu shü. 44Tsüselo a-le kenjün thyü sa-o hi pe a-yhen thyüsin sola; lo a-ketseyhün le tezi hontse jen pe kazü nyu ketetsin thyü tsüryü la.
45Lo a-le tsühontse kehithyü shü njüo senthyükelonyu dan ka niryü ntsin, anyugun le anyugun nyun kenjün kethyü pvüo zhütin kela hyulo. Tsükatsü a-le anyugun ka, “Hagun le nyuthyüo zhü bin nla? 46Hagun kesemen nyu yü lamvu nrün genyu solo-o kehithyü binlo chi,” tsonshü.
Jisu Tenkelo
(Mt 26:47-56; Mk 14:43-50; Jn 18:3-11)
47Lo a-le jo tsü zokebin ka, hire, temi dan me lo anyugun mhundyü tseryü kenyhunche dan nyu nme, Judas tsekethyü gü le hü; lo a-le Jisu nboshü titseo a-khoka ryü. 48Ai Jisu le a-ka, “Hire, Judas, nle Temi Nyugü nboshüo a-ten shü titse bin nle?” tson.
49Tsontsin Jisu zen kehü senthyükelo ju le tha dihontse titse bin yo tsekethyü shalo njüo, anyugun le, “Npugü, agun no zhethon pe me du ti mon?” tson-o a-ketso sola. 50Tson-o anyugun nme le a-zhethon sütho pe peshükedagü gogü duso ntsin a-nyetin nzhüzin duthü la.
51Ai Jisu le anyugun ka, “Anyugun no tson bin chi; khela chi,” tson-o a-le temi tsügü nyetin kesü shüo a-nyetin thyü ngwa shüla.
52Tson-o Jisu le a-ten titse ryü kejü peshükeda ju lo pelünyu dan ka, “Hagun le zhethon lo senkethü sen-o mehon seketyünyu keten hontse ryü zhü nle? 53Ale khenyütsen hagun zen-o Kershvuka nyu bin hüe, hagun le tsüka we hagun ben keto pe aten titse kethyü rüchün hümvu; ai ntsoka we hagun gwünkho le penla so, lo kezüngüe a-kekvu le bin laso.”
Pitor Le Gwünshen Ge A-shamvu Letse Kela
(Mt 26:57-58,69-75; Mk 14:53-54,66-72; Jn 18:12-18,25-27)
54Tsükatsü anyugun le a-tenlo njüo a-nrhisü zen-o peshükedagü kanyu gunla. Lo Pitor le me kho nni sarimvu tse a-sithen gun. 55Tson-o gü mele khenpvü ka mah thyüo temi dan me le kehun bin laryü, Pitor ko yügü temi tsüdan zen-o dunlo. 56Tsükatsü me gonyu nme le Pitor le mah ngvü kebin hyushüo a-nriryüo, “Temi higü hi ko Jisu zen hü le,” tsonso.
57Ai a-le nmvu letseo, “Tenunyu, ale a-shamvu shü le,” tsonla.
58Tsüsika sun khe bin ntsin, kechanyu nme ko a-hyushüo a-ka, “Nko tsüdan nme hile!” tsonni.
Ai Pitor le, “Temi gü, ale shamvu letselo!” tsonnila.
59Tson-o tegi kevüja nme siki tsü kechanyu nme ko tenge tseo, “Temi higü hiko a-zen hü ketsin le, a-le Galilnyu nme le.”
60Ai Pitor le, “Temi, nle kezo gü tsü ale shamvu le!” tsonnila.
Lo tsü zo nsen ketseka tero le khun whütse soryü la. 61Lo tsükatsü Npugü le raniryüo Pitor nrishü. Tsüselo Pitor le Npugü le a-ka, “Nle ntsoje tero kekhun mhundyü ashamvu letse kethyü zo kenshen ge tile,” tsonkethyü kezo jo tsü rüchün lo. 62Tson-o a-le kamhun ki chwigü chü pe ketetsin thyü sola.
Jisu Shwinyüo A-vü Kethyü
(Mt 26:67-68; Mk 14:65)
63Tsükatsü Jisu nrhisü zen kehü temi dan le a-shwinyüo a-vü sola. 64Tson-o anyugun le phi khipe a-yhütyü jelo njü a-vüo, “Kha, tsüle segü le nvü shüyo pe agun ka sidyükesha jo zoshü lo!” 65Tson-o anyugun le a-kesüo a-ge jo kechon zo sola.
Jisu Zen-o Pelünyu Kehun Ka Kegun
(Mt 26:59-66; Mk 14:55-64; Jn 18:19-24)
66Lo tsangben chwiryülo ntsin, peshükeda ju lo lesükeshatsin nyu dan-e sin tseo anyugun rünyi pelü kehun nyu ngü kequenlo. 67Lo anyugun le a-nrhisü zen gü tsüdan kehun nyu gun-o, “Nle Khrista gü yatselo, agun ka zo shülo?”
Ai a-le anyugun ka, “Ale hagun ka zoshüe, hagun le tenyen loho; 68lo ale hagun ka tha nme ketso shüe hagun le tsüe pe aka zoshü loho. 69Ai ntsoka gerhonyu Temi Nyugü le Kekvutsin gü ben njüzin bin tinla tiso,” tsonla.
70Tsontsin anyugun aphu a-ka, “Tsonlo nle Sunggigü Nyugü ole?” tson-o a-ketsoni.
71Tsügenyu a-le anyugun ka, “Ele, hagun kezo tsü le,” tsonshü. Tsüselo anyugun le, “Ngun nyu tsekethyü jünkezo füsin bin semon? Nle a-mün nyu shalo kela sile,” tson sola.
Currently Selected:
LUK 22: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
