BINZEN 7
7
Zükemihen
1Npugü le Noah ka, “Nkaminyu aphu zen-o run günyu yülo; kazü aphu nyu nyu le njü yo tsü thyü kehü le n nti le kebin ale hyu lo laso. 2Nyukhu kenshün dan aphu peche nme lo tenu nme tse benshan tsenyünyü zenlo, ai nyukhu nshün kemvu dan we peche nme tenu nme tse benshan nme me zenlo. 3Tegü ko kecha cha kethyü benshan tsenyü zenlo. Tson-o nyukhu lo tegü lihi-e no rhün bin-o chwükenyeni pe kazü günyu shülo nrün genyu. 4Jon tsenyü siki ale n yhun keshü kerhün ronzin kebin aphu nke la nrün genyu ale tsangkenri nishüti, tsüle keben jon henzi lo kezün jon henzi nriti.” 5Tson-o Noah le Npugü le aka zokeshü dan aphu thyülo.
6Zükemihen le kazü so keryü tsüle Noah le a-keyhun chen tsi tsero la. 7Noah, a-nu, a-nyudan lo a-nyudan nunyu le zükemihen nrhilo titse run günyu yüla. 8Nyukhu lo tegü kenshün lo nshün kemvu metse lihi-e peche nme lo tenu nme tse, 9Sunggigü le zokeshü hontse Noah zen-o run günyu yüla. 10Tson-o jon tsenyü siki Zükemihen le kazü so ryü.
11Noah keyhun che tsitsero, shyehvu gü, jonryüo tsenyü nyü, Zükepen kü aphu nyu zü le nthün chwiryü la lo tsangge zü dan khinshe shüla. 12Tson-o keben jon henzi lo kezün jon henzi tsangrio kazü günyu tsüryü la. 13Tsünyü Noah lo a-nyu Shem, Ham, Jafet, Noah nu lo a-nyu dan nu tse le run günyu yüla. 14Lo nyukhu kechacha lihi-e, senru lo tehen thyü keda keshe lo tegü lihi-e a-nyu gun sin-o yüla. 15Rhünkehü lihi-e peche nme lo tenu nme me tse Noah zen-o run günyu yüla, 16Sunggigü le a-nyugun ka zokeshü hontse. Tsüselo Sunggigü le kakhin shü la.
17Zükemihen le jon henzi kazü gü so binla; tson-o zü güle chonkenye kü ryüo run gü penso pe kazü so shü lola. 18Zü gü le ntsun ketsintsin tse-o run gü chün sen züso phun tinla. 19Tsüle ntsun pe kazüthun dan ketetso tsin gü so-e küla; 20tsü le kazüthun soki tsu tseryü pvün küla. 21Tson-o kazü so kehü thyü-tegü, nyukhu-nyuru lo temi-e aphu sila. 22Kazü kesin nyu yhunkehü kehen teshe kebin lihi-e sila. 23Npugü le kazü so kehü kerhün ronzin kebin-temi, nyukhu lo tegü aphu nkela. Nsen kelo le Noah lo a-zen-o run günyu yü kelo dan nti. 24Zü gü le jon tsio henpvün semvu tse kazü so bin la.
Currently Selected:
BINZEN 7: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
