BINZEN 28
28
1Isak le Jakob ko shüo jochü pe tsüo a-ka, “Kanan nyu lü lonya nye. 2Ai Mesopotamia ki nbon Bethuel ka nyu gun gü, n min Laban nyugi nme lolo. 3Kekvutsin Sunggigü no jochü pe nsunkethyü ge shü lo nnyenyu kechon khishü nda, tson-o nno senye kechon pvü thyülo tile! 4Tson-o a-no Abraham jochü gü pe n-e lo n tsipwen tsülo. Lo nle a-nyu yhun kebin Sunggigü le khipe Abraham ketsü kazü gü hi nno gwenlo!” 5Tson-o Isak le Jakob nipe Mesopotamia ki Aramean nyu Bethuel nyugü Jakob lo pe Esau au jvü Rebeka tsügü Laban ki shüla.
Esau le tenu Kecha Lonikelo
6Isak le jochü pe Jakob tsüshüo a-no Mesopotamia ki tenu nme lolo tse nishü kela Esau le shalo. A-le Isak le jochü pe Jakob ketsü ka no Kanan nyu tenunyu lonyalo tsezo keshü ko shalo. 7Jakob le a-pvü a-jvü hvu jozen-o Mesopotamia ki gü kela rüla shalo. 8Tson-o Esau le a-pvü Isak le Kanan nyu tenunyu le a-kenda kemvu shalo. 9Tsügenyu a-le Abraham nyugü Ishmael ki gü a-nyugi Mehalath lolo, tsügi le Nebaioth lügi.
Bethel ka Jakob Min
10Jakob le Beersheba nken-o Haran ki gun zhü. 11Yhüko keche ki a-le bin kenshün nme nyu ryüo tsüka nsenlo. A-le tso nme pe a-pekhün thyüo jübin. 12A-minki lobin nme le kazü nyu rhun-o kügü tsang ti, lo tsanggelonyu jule kükejü lo tsenryü kejü hyu. 13Lo Npugü le a-khoka so-o, “Ale Npugü, Abraham lo Isak Sunggigü le,” tsonzoshü. “Nle a-sozhü kebin kazü higü pe nle lo n tsipwen tsüti. 14N tsipwen no kazü nyu nnyokenphü hontse swülo bu keho thyüti. A-nyugun le anyugun kazü nmhun sen-o lizin hizin aphu güti, lo n ge lo n tsipwen ge ale jochü pe kazü senye aphu tsüti. 15Rüchünhülo, Nle lika hika güe ale nzen hüti, lo n ntsen hüti, lo ale nzen niryü kazü higü nyu shüti. Ale nka zokeshü dan aphu thyüla kemvuthen ale nkhela loha.”
16Jakob le chonsoryüo, “Npugü le hika hünyo! Ale shamvu bin laryü, A-le bin hika kebin hile!” 17A-le nshvula-o, “Hile bin kenrin kethyü nme le! Hile Sunggigü ka gi so; hile tsangge chwida gü giso.”
18Jakob le lonyü nshwe soryüo, a-le a-pekhün kethyü tsogü tsü rüchün hü nrün genyu khipe senshü. Tson-o Oliv terzü jape tsüge shüo thyü kenshün pe Sunggigü tsü. 19A-le bin tsügü pe Bethel tse kolo. (Nduka we rünyi tsüle Luz tsehü.) 20Tson-o Jakob le Npugü ka keswe nme thyüo: “Nle a kenjwen hinyu azenhü lo a ntsen-o achvü lo a keben kenya khishü hüo, 21ano gwa bin-o a pvü ka ki nigun ryü kelo we, Nno a Sunggigü thyüti. 22Rüchün hü nrün genyu ale pe sen keshü tso higü bin hipe nkershvubin thyüti, lo ale nle khipe a ketsü lihi-e jüntseryü jüme pe ntsüti.”
Currently Selected:
BINZEN 28: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
