BINZEN 27
27
Isak le Jochü pe Jakob Ketsü
1Ntsoka we Isak le thenla, lo a-yhütyü zünla. Tsügenyu a-le a-nyu peshü gü Esau koshüo a-ka, “Anyugü!” tsonshü laryü a-le “Whe” tse khinshü.
2Isak le, “Ale then laso lo akesi jon shamvu. 3Tsügenyu n levü lo a-tsi khilo njio tsügü tehen thyü nme gapfü ryüo a tsülo. 4Tson-o ale akenyü kehü thyükeyhün tsü ni senryü atsü lo. Ale tsü tyülo-o, sila kemvu ka a jochü kenkhin gü pe ntsü tile,” tsonshü.
5Isak le Esau nthon kebin Rebeka le nyülo la. Tson-o Esau le thyühü gükela ka, 6A-le Jakob ka, “N pvü le Esau ka, 7‘Agenyu thyü nme ga pfüryü nishülo. Ale tsü tyülo njio, ale sikemvu ka Npugü mhundyü nyu jochü pe ntsüti tsonzo kebin ale nyülo laso.’ 8Tsügenyu, anyu, ajozen-o ale nno thyülo tse keshü gü thyü shü lo. 9Ntsoka tenyü dannyu gü tenyü nyu a-phu kegwa kenyhun sen ryülo, tson-o ale n pvü le a-kenyüsa kehü a-genyu ketyüketsü nda shü tile. 10Nno sen gü a-tsü shüo no tyülo njio a-le sikela mhundyü jochü pe ntsü nrün genyu.”
11Ai Jakob le a-jvü ka, “Esau le temi a-hü tsü mebu kethyü nme ai awe agi le shwü tse gwenzin le. 12A pvü le akesü shwio ale a-sa kebin shalo la ti ado; tsonya tselo ale jochü mvu le shochün senryü a npfü age shülo loshvu le.”
13Tsontsin a-jvüle, “Shochün pe nketsü lihi-e no age ryü la, anyu; ale nka kezo hontse gü tenyü nyuhvu senryülo.” 14Tson-o a-le gü tsü senryü a-jvü tsüshü, lo a-jvü le a-pvü le a-kenyü kehü ketyü ketsü bonnilo. 15Tson-o a-le Esau phinya kegwatsin a-le pe kanyu bin kenjü khipe Jakob nbenshü. 16A-le tenyü hvu gi khipe a-buthun lo a-gunda a-hü kendi bin ka jeshü. 17A-le ketyüketsü keyhün gü pe a-le ro kelo tensü sin-o khi pe a-nyugü Jakob ben ka shüshü.
18Tson-o Jakob le gü a-pvü ka, “A pvü!” tse koshü.
Laryü a-le, “Whe.” “Nle anyu digü la?”
19Tsontsin Jakob le, “Ale nnyuri gü Esau le; nle aka zokeshü hontse ale thyüshü laso. Ncheno-e soryü dun-o, ale ngenyu sen ryü kebin tyütsü lo njio, jochü pe atsü shülo.”
20Isak le, “Nle dihontse tsü hyu whü lola ola, anyu?”
Jakob le, “Npugü n Sunggigü le a keche shüo hyulo le.”
21Isak le Jakob ka, “Akho nniryülo ale nkese shwi tile.” “Nle Esau ketsin le?” 22Jakob le a-pvü kho nni gü, A-pvü le a-kese shüo, “Nkhwe le Jakob khwen hontse ai nbu kese kethyüle Esau bu laso.” 23A-le Jakob letse shalo mvula, a-bu le Esau bu hontse a-hü le bin kela genyu. A-le a-jochü pe tsügü jü, 24ai ketso nio, “Nle Esau ketsin le?”
Tsontsin a-le, “Ele” tsonla.
25Isak le “Thyü peha senryü atsü shülo. Ale tsü tyülo rio a jochü khipe ntsü tile.” Tson-o jakob le tsü senryü a-tsüshü lo a-le Vainsha zu ko senryü a-la shü. 26Tsüselo a-pvü le a-ka, “Akho nniryü a nbo shülo, anyu.” 27A-le a-pvü nboshü titse ryü laryü, Isak le a-phi rünyü shüo jochü pe a-tsüshü. A-le, “nyugü rünkegwa le tehen nyu Npugü le jochü pe a-ketsü hontse le.
28Sunggigü no tsangge khezü pe ntsü lo n kazüthyü nbweshü nda! A-no shye lo Vainsha zu kesü kela khipe ntsü nda! 29Senye dan no ngo thyü lo temi kechon no nkhün nkelu nda. Nno nkami aphu so kedathyü, lo njvü tsipwen dan no nkhün nkelu nda. Shochün pe nketsü nyu no shochün pfü, lo jochü pe nketsü nyu no jochü pfülo nda.”
Esau le Isak Ka Jochü Kehi
30Isak le jochü pe Jakob tsü shüo a-le tin la nyemhun, atsagü Esau le thyühü güo ryü. 31A-ko ketyüketsü keyhün bonni lo-o khisen a-pvü ki ryü. Tson-o a-le, “A pvü ncheno-e soryü dun-o ale thyüni senryü kebin tyülo-o njochü pe atsü shülo.”
32“Nle següla?” Isak le tsonketso shü.
Tsontsin a-le, “Nnyuri gü Esau le.”
33Tsüselo, Isak le a-ke nsü ndün-o, “Tsonlo, thyü gape ni senryü a-ketsü gü tsüle segü ola? Nle keryü mhundyü ale tyülo laso. Tson-o jochü pe a-tsü laso, tsüle kethonthen a-honso.”
34“A pvü n jochü pe ako atsüta!” tsonso.
35Isak le, “Nsikezen gü le ryü asa lo laso. A-le njochü sen tin laso.”
36Esau le, “Nthu hile a-le asalo kela gwen hvu ge güso. A-zan le Jakob thato. A-le ale nyuri gü kethyü akenjü ko khilo la, lo ntsoka ko a-le ajochü sen tin laso. A genyu jochü nme-e ndila se ole?”
37Isak le, “Ale a-khipe nsa npu thyü laso, lo a-shvunye aphu pe a-go thyüshü laso. Ale Shye lo vainsha zu pe a-tsü laso. Ntsoka we ale ngenyu thame thyü keloi ndila so, anyu!”
38Esau le a-pvü ka, hi tengeo, “Njochü nme nti ole, a pvü? Ako jochü pe atsü ta, a pvü!” Tson-o a-le chü sola.
39Tsontsin Isak le a-ka,
“Ngenyu tsangge khezü ndi laso,
Ngenyu kazü kebwe ndi laso.
40Nle njenthon sen yhun loti,
Ai nsikezen gü go thyüti.
Tson-e nle a-ntsun keso ka
Nle a-le nkhinsen kebin nyu chwi loti.”
41Esau le a-pvü le jochü gü pe Jakob tsü kela genyu Jakob shwirüchünla. Tson-o a-le, “A pvü kesi chechü nrün khonni bin laso, tson lalo ale Jakob dushvu lati tson rüchün bin.”
42Ai Rebeka le Esau le rhikebin shalo ntsin Jakob ko shüo a-ka, “Nyulo, ntsagü Esau le nhyu lolo ndushvu kela nda bin laso. 43Tsügenyu anyu nle ntsoka ajozen-o, Haran ki atsügü Laban khoki whütse gun lalo. 44Tson-o ntsagü le a-nyunkenta ponlo kemvu ka a-zen bin gwa tin lalo, 45lo a-le nle a-ge thyükeshü tsü nmhinla. Tson yatselo ale temi peha nishüo no ryü nzen nilo la tile. Ano nyuthyüo khenyü me jon anyu peche mihvu nkela bin mon?”
Isak le Jakob nipe Laban Ki Keshü
46Rebeka le Isak ka, “Esau le tesin lü kelo a-nu hvu genyu adyüzinri laso. Keshanyu laka Jakob ko Hitnyu lünyu hi nme lo ya tse kethyü we, ale sikela we gwaso,” tsonshü.
Currently Selected:
BINZEN 27: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
