Mt 24

Jezu Devmondirachea Nisonttona vixim Uloita

(Mk 13:1-2; Lk 21:5-6)

1Jezu Devmondirantlo bhair sorun vetastanam, Devmondirachê bandavollicher lokx lai mhonn Taka sangunk Tache xis lagim sorle. 2Tannem zap diun tankam mhonn’lem: “Hem sogllem tumi polletat nhoi? Hanv tumkam khorench sangtam: hanga nisontton zaun fatrar fatôr urcho na.”

Koxtt ani Dhumalle

(Mk 13:3-13; Lk 21:7-19)

3To Olivet dongrar bosun aslo, tedna ekvodde ieun xisamnim Tachê kodde vicharlem: “Hem kedna ghòddtelem tem, ani Tujea ienneachi ani kallachea xevottachi khunna konn ti, amkam sang.” 4Ani portipallun Jezun tankam sanglem: “Tumkam konnem fottoinam zaunk chotraien ravat; 5kiteak sobar zann Mhojem nanv gheun ani apunn Krist mhonnun ietele, ani zaiteank fottoitele. 6Tumi zhuzancho avaz ani loddaianchi khobor aikotelet. Uchamboll zaina zaunk chotrai dhorat; tôr hem sogllem ghoddon ieunk zaik; punn xevôtt rokddoch ieuncho na. 7Kiteak raxttr raxttracher ani raj rajeacher uprastelim. Hanga-thõi bhuk poddteli ani bhikamp zateli. 8Punn hem sogllem fokot porsuttvenninchi survat. 9Tedna piddapidd diunk tumkam dhorun ditelim ani tumkam jivexim martelim ani Mhojea nanva pasot sogllim raxttram tumkam zolltelim. 10Tedna sobar zannancho bhavart haltolo; mon’xam ekamekak lavun ditelim ani ekamekak zolltelim. 11Sobar khotte provadi uprastele ani zaiteank fottoitele; 12ani kaido-modd’ni vaddta tea mapan zaiteancho môg xellmoddo zatolo. 13Xevottak porian thir ravtit tankam Dev taronn ditolo. 14Ani heam soglleam porzank ek sakxi mhonn hea Rajeachi hi bori khobor akhea sonvsarant porgott zateli. Ani tea uprant xevôtt ietolo.

Vhodd Sontap

(Mk 13:14-23; Lk 21:20-24)

15Daniel provadean sangun dovorlolo to ‘Sotianasacho kanttallo’ polletat tedna, (konnui vachta tem taka somzun ieum-di)#24:15 Antiokus Epifanes, hea Xiriechea Grik razan, Kristi Iuga adlea 167-vea vorsa, Jeus devachi murti Jeruzaleachea Devmondirant vedicher ubarun dovorli. Hea kortubachi gozal Daniel provadi aplea pustokar korta mhonn dista (Dan 9:27; 11:31). Romi foujen Kristi Iugachea 70-vea vorsa Jeruzalem-xar aplea tabeant ghetlem, tê ghòddnnek Matêv Danielachem utor (“Sotianasacho kanttallo”) laita. (Toxench Mk 13:14 polle) povitr zagear ubo aslolo tumi polletôch (vachtat tãnnim hem somzunchem), 16Judeiant asleleamnim dongracher pollun vechem; 17pattsar aslelean aplea ghorantlem kitench vhorunk sokla denvchem nhoi; 18xetant aslelean aplem avoronn vhorunk porot ieunchem nhoi. 19Te dis ietôch gorbest bailanchem ani dud diteleanchem kotta! 20Tumchi pollapôll hinvalleant vô Sabbatha disa zaina zaunk magat; 21kiteak tedna sonvsarachea orombak thaun tem atam porian zaunk na ani hea fuddem zauncho na toslo êk vhôdd sontap ietolo. 22Ani te dis unne korunk nasle zalear, konnuch vattavoncho naslo; punn vinchun kaddloleam khatir te dis unne keleat. 23Tedna, ‘polle, Krist hanga asa’ vô ‘To thõi asa’ mhonn konnuch tumkam sangit zalear, tumi tem sotmani nakat; 24kiteak lottik Krist ani lottik provadi upzotele ani zata zalear, vinchun kaddleleank porian fosounk, vhoddleô khunna ani ochoriam korun dakhoitele. 25Chotrai dhôrat, Hanvem tumkam hem adinch sangun dovorlam. 26Dekhunuch oxem konn tumkam mhonntit zalear, ‘ho polle to oronneant asa’, tumi bhair soronakat; vô ‘ho polle to ghorant bhitôr asa’, tem tumi sotmaninakat; 27kiteak zoxem zhogla-nnem udentik marta ani ostomtek porian zhogzhogta, toxench Mon’xachea Putachem iennem zatelem. 28Moddem asa thõi gid-ui ektthovtele.

Mon’xachea Putachem Iennem

(Mk 13:24-27; Lk 21:25-28)

29Team disancho sontap iena fuddem suriacher kallôk poddtolo, chondrim’ aplo uzvadd diuncho na, noketram mollba velim sokla poddtelim ani ontralla veleô xokti kolkolteleô. 30Ani tedna Mon’xachea Putachi khunna mollbar dixtti poddteli; sonvsarantlim kullam dhuk kortelim ani podven ani vhoddê mhoimen mollba-cheam kupancher ieto Mon’xachea Putak dekhtelim. 31Ani kornneachea eka mottea avazan To Apleam dutank dhaddtolo, ani sonvsaracheam char-ui dixam veleam, ontrallachê êkê ximê thaun dusrê ximê porian asleleam Tacheam vinchleleank te zomoitele.

Anjirachea Zhaddachi Xikovnn

(Mk 13:28-31; Lk 21:29-33)

32Anjirachea zhaddachi vopar somzun gheiat: tacheô khandiô rosbhorit zatat ani tankam kombreô futt’tat tedna, gim’ lagim pavla mhonn tumkam kollon ieta; 33têch porim tumi hem sogllem pollelea uprant, To lagim pavlo, darachea umbrear asa mhonn zanno zaiat. 34Hanv tumkam khorench sangtam: hem sogllem ghòddlea bogor hi pinddka ontorchi na. 35Ontrall ani prithum’ sortelim, punn Mhojim utram kednanch sorchim nant.

Dis Toxi Ghoddi Konnuch Nokllo

(Mk 13:32-37; Lk 17:26-30,34-35)

36Punn ekleach Bapak kaddun, anink konnakuch, sorgincheam dutank vô Putak legun, tea disachi ani tê ghoddiechi khobor na. 37Noacheam disamnim zoxem zalem, toxench Mon’xacho Put ieta tedna zatelem. 38Buddtê adleam disamnim Noa pett-tarvant bhitôr sorlo to dis meren lôk khata-pietalo, logn zaun ani logn korun diun aslo, 39ani poriallo ieun tancho soglleancho nas zait porian, tankam kãi ek koll’lem na; toxench Mon’xacho Put ietolo tedna zatelem. 40Tedna xetant asleleam dogam dadleantlea ekleak vhortele, dusreak sanddtele; 41dantear dollunk asleleam dogam bailantlê eklêk vhortele, dusrêk sanddtele. 42Mhonntôch, tumcho Somi khõichea disa ietolo tem tumi nokllot dekhun zagrut ravat. 43Punn hem mat monant dhôrat: konn-ui ghorkar ratichea khõichea parar chôr ietolo mhonn zanno aslo zalear, to zagrut ravto aslo ani aplem ghor foddun nagounk diuncho naslo. 44Mhonntôch tumi-i toiar ravat, kiteak tumi chintinant tê ghoddier Mon’xacho Put ietolo.

Visvaxi vo Ovisvaxi Chakôr

(Lk 12:41-48)

45Ghorant asleleam heram chakrank vogtar jevonn diunk dhoni aplea ghorabeacher chakrak odhikar dita to visvaxi ani xanno chakor konn zait? 46Aplo dhoni ieta tea vellar taka oxem korto mell’tolo to chakor subhagi. 47Hanv tumkam khorench sangtam: to taka sogllê aplê dovloticher odhikar ditolo. 48Punn baskôll chakôr apnnach bhitôr oxem mhonnot zalear: ‘Mhozo dhoni ieunk kallav korta’, 49ani apleam boraborcheam chakrank marunk ani bebdeam borabôr jevunk ani pieunk lagot zalear, 50to ravonaslolea disa ani to nokllo aslelê ghoddier tea chakracho dhoni pavtolo; 51ani taka koddok xikxa ditolo, ani tachi gôt ddhongiam sarki zai-xi kortolo. Thõi sogllim rudon korun ani dant korkoraun astelim.”

Currently Selected:

Mt 24: KONKABSI

ማድመቅ

Copy