INṬANNA 50
50
1Chun, Josef chun a pa hmai a sik a, a ṭa a, a fâwp a fâwp a.
2Chun, Josefin a siehlaw damdawi thiemhai chu a pa ruong chu hmawntheilova siem dingin thu a pêk a: chuongchun, damdawi thiemhai chun Israel ruong chu hmawntheilovin an siem a.
3A ruong siemna dingin ni sâwmli an aw a, hmawntheilova siemna chun ni chuong zât chu a aw hlak hrim a nih; chun, ni sâwmsari sûng zet Aigupta mihai chun ama sûnin an ṭap a.
4Chun, ama an sûn zo hnung chun Josefin Pharao sûnghai chu a biek a, “In mi lunginsiet thei chun, lunginsiettakin Pharao hrieta chun,
5‘Ka pain, ngai ta, ka thi ding a ni ta a, Kanaan rama ka thlân ka chosaah, chutaka ngei chun mi hung phûm rawh,’ tiin a mîn khâmtir a. Chuleiin, tuhin lunginsiettakin, ka pa hi mi hang inphûmtir la, chu zo chun hung nâwk el ka tih,'tia mi lo hrilpêk dingin ka ngên cheu a nih,” a ti a.
6Chun, Pharao chun, “Ân khâmtir ang che chun i pa chu hang phûm raw chu,” a ti a.
7Chuongchun, Josef chu a pa phûm dingin a hang fe ta a. Pharao siehlaw po po, a sûnghai laia upahai leh, Aigupta ram upahai po po le,
8Josef sûnghai po po leh, a unauhai leh, a pa sunghai chu ama leh an fe ve a. An nauhai rawi le, an berâm ruolhai le, an bâwng ruolhai bak chu Gosen rama chun an mâksan a.
9Anni ruol chun tawlailîrhai le, sakawr chung chuong mihai an hang fe ve a; pâwl ruol lientak an nih.
10Chun, Jordan râla Atad hrizâwl chu an tlung a, chutaka chun nasatakin an ṭa a, ni sari a pa sûnna a siem a.
11Chu rama mi Kanaan mihai chun Atad hrizâwla an mithi sûn chu an hmu chun, “Hi Aigupta mihai mithi sûnna nasatak a ni hi,” an ti a; chuleiin, chu hmun hminga chun Abel-mizraim#Aiguptahai sûnna an inbûk ta a, chu chu Jordan râla um a nih.
12Chun, a naupasalhai chun a thupêk ang peiin an thawpêk a,
13 #
Tt 7.16
a naupasalhai chun Kanaan ramah an zâwn lût a, Abrahamin inphûmna hmun ro dinga, Hit mi Ephrona inthawka a lo puma a închâwk, Mamre zâwna Makpela loa pûka khan an phûm ta a.
14Josef chu a pa phûm zo chun ama le a unauhai le, a pa phûm dinga ama ruola hang fehai po po le chun Aiguptaah an kîr nâwk ta a.
Josefin a unauhai a thlamuon nâwkna
15Josef unauhai chun an pa thi chu an ngaituoin, “Josef hin mi theidâng a ta, a chunga thil ei suksuol po po phuba kha ei chunga hin la hung la kim nek el a ti aw,” an ti a.
16Chuongchun, Josef kuoma hril dingin thu an incha a, “I pa chun a thi hma khan,
17‘Hieng ang hin Josef kuomah, Lunginsiettakin i unauhai bawsietna le an suolna chu ngaidam rawh, i chungah thil chu an suksuol dea chu, tiin hril ro,’ tiin thu a mi pêk a: tuhin, lunginsiettakin i pa Pathien siehlawhai bawsietnahai chu ngaidam rawh,” an ti a. Chuonga a kuoma an hang hril chun Josef chu a ṭap ta a.
18A unauhai khawm chu an va fe a, a hmaa chun an bawkkhup tâwl a, “Ngai ta, i siehlawhai kan ni hi,” an ti a.
19Josef chun an kuomah, “Ṭi naw ro, Pathien aiaw am ka nih?
20Nangni chun ka chungah thil suol thaw in lungril a; nisienlakhawm, Pathien chun, vawisûna an um ang ngei hin, mi tamtak dama sanhimna dingin thil ṭhaa inchangtir a lo lungril lem a ni si a.
21Chuleiin, ṭi naw ro, nangni le in nau-le-tehai chu châwm pei ka tih,” a ti a. Chuongchun, a thlamuon a, bau ṭhatakin a biek tâwl a.
Josef thi thu
22Chun, Josef chu ama le a pa sûnghai leh Aigupta rama chun a um a: Josef chu kum za le sâwm a dam a.
23Josef chun Ephraim nau a tuhai khûp thum chen a hmu a, Manasse naupa Makir nauhai khawm Josef mal chungah an pieng a.
24Chun, Josefin a unauhai kuomah, “Ka thi ding a ni ta a, nisienlakhawm, Pathienin hung kan ngei ngei a ti cheu a, hi rama inthawk hi hung ṭhuoi suok cheuin, Abraham, Isak le Jakob hai kuoma inkhâma pêk a tiem ramah ṭhuoi a ti cheu,” a ti a.
25 #
Ex 13.9; Jos 24.32; Heb 11.22 Chun, Josef chun Israel mihai chu ân khâmtir a, “Pathienin hung kan ngei ngei a ti cheu a, ka ruhai hi hitaka inthawkin khitieng in zâwn ngei ding a nih,” a ti a.
26Chuongchun, Josef chu kum za le sâwm mi a niin a thi a; a ruong chu hmawntheilovin an siem a, Aiguptaah kuongin an sie ta a.
Currently Selected:
INṬANNA 50: HMOVBSI
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
