Matayo 7

Mpola za kualamula naĩngĩ

(Lk 6:37-38, 41-42)

1“Lekilamulĩ koona mulekilamulua. 2Kuitĩ uulamuli uo namukulamulaa, uuo mũjililamulĩlua; nĩngele ĩo namukugelelelaa, ĩĩo-ĩĩoo mukigelelelua niniinie. 3Nikĩ ukukalaaa ĩkapalala muliiso Iya munũna waako, numugamba naukoolĩ muliiso liako sikukuukeesagiaa? 4Katia wishũũma mbii kukumuĩĩla umunũna waako, ‘Ndeka nĩkaleegie ĩkapalala muliiso liako;’ kusĩnaga ukoolĩ umugamba muliiso liako? 5Ue munamampĩlu, leegia tangua umugamba muliiso liako; paapo ukiona iiza kukukaleegia ĩkapalala muliiso Iya munũna waako.

6“Muleke kuzipeela imbua#7:6 Imbua: Mpiani ya antu natĩĩte, ulugendo na lubĩĩ. nakielu, sunga muleke kuzigumĩla ingũlũĩ inshanga zaani za lũũlũ#7:6: Lũũlu: Pigue pya ngele nankaku. koona zileke kuzitilangĩla kumĩgulu yaao, nukukumugomokeela zumulume.”

Kwikamia nkolo muulompi

(Lk 11:9-13)

7“Lompĩ gua, mukipeegua; dũũmĩ gua, mukiona, ũgiĩ gua, mukakigyuĩlua. 8Kuitĩ wensi nukulompaa ukuanũnkulaa; nduyo nukudũũmaa ukuonaa; nduyo nukuũgagiaa ukigyuĩlaguaa. 9Muntu kĩ kumiani, kanga muana waakue wamulompe ugalĩ ukakumupeelane igyũe? 10Katia walompe nsiĩ, ukakumupeelane ĩnzoka? 11Malĩ uniinie gua, namuabĩĩ, mumanile kukuapeela ĩaana aani ipeegua naiiza, sika nangũlũne uTata waani nukoolĩ kwigyulu ukakuapeelaa naiiza naakumulompaa!”

Lyagĩĩlio nikyulu

(Lk 11:9-13)

12“Iio gua, tũlũ mensi namumasiiile mutendelue nĩantu niniinie muatendele iio-iioo; kuitĩ uu wau Ulagĩĩlio nĩAnakĩdagu.”

Nzĩla zibĩlĩ

(Lk 13:24)

13“Ingĩlĩlĩ kumulango namupinĩ; kuitĩ umulango ingĩ mugalĩ nĩnzĩla ngalĩ nĩlunziĩ kuulimĩĩli, nĩaasio naakuingĩlĩlaa muasio akoolĩ iingĩ. 14Kuitĩ umulango ingĩ mupinĩ nĩnzĩla ĩtunĩnkĩĩle nĩlunziĩ kuupanga, nĩaasio naakumĩonaa akoolĩ akeei.”

Tai nuulongo

(Lk 6:43-44)

15“Ĩkendegeelĩ kuanakĩdagu a ulongo, naakumuagaanaa ĩkũmbile mĩkunza ya nkolo, ĩpa munkolo zaao iyĩngi naataki. 16Mukakualĩngĩla kunkali zaao. ĩAntu akukalaane izabiibu mwikyota Iya miigia, katia inkuu mumĩtula?

17“Itĩ yoi ikyota liensi naliiza lyukupĩaa inkali nanziiza, nikyota nibyĩĩ lyukupĩaa inkali nambĩĩ. 18iKyota naliiza sika lĩsũũmile kwipĩa inkali nambĩĩ, sunga ikyota nibyĩĩ kwipĩa inkali nanziiza. 19iKyota liensi nasika lyukupĩaa ĩnkali nanziiza lyukudumulaguaa nukwitaagua mumooto. 20Kuluulo gua, kunkali zaao mukakualĩnga.”

Nkaani nuutendi

(Lk 13:25-27)

21“Sika wensi nukumbuĩla, ‘Shekulu, Shekulu,’ nũjiliingĩla muutemi wa kwigyulu; ĩpa wayu dũũ nukuutendaa uulooa wa kĩTata waane nwa kwigyulu. 22Iingĩ ijilimbuĩla palutondo luasio, ‘Shekulu, Shekulu sika alĩ kukupũnagiaane uunakĩdagu kuliina liako, nukuliina liako kwiĩnga ĩmasĩĩmuĩ, nukuliina liako kwitenda ĩmakula mingĩ!’ 23Paapo nijile kuaĩĩla kualiĩ, ‘Sika alĩ numuĩzĩ inie kainiino; legĩ kumuane, namukutendaa namabĩĩ.’”

Mĩkũlĩla ĩbĩlĩ

(Lk 6:47-49)

24“Luulo gua, tũlũ wensi nukũigagiaa inkaani izi ĩzaane nukukuzitenda, ukakĩpiana numuntu nwa masala naaluzengile ĩnumba yaakue mwipyampa. 25ĩMbũla nĩkua, ĩmaazĩ namĩlunda, ĩnzega nĩkũnka, nyĩmĩkua ĩnumba niasio; sika nĩgua, kunsooko ĩmĩkũlĩla yaakue alĩ yĩĩlĩ mukiania ipyampa. 26Wensi nukũigagiaa inkaani izi ĩzaane, wasiite kuzitenda, ukakĩpiana numuntu nwĩulu, naaluzengile ĩnumba yaakue mumunsanga. 27Mbũla nĩkua, maazĩ namĩlunda, nzega nĩkũnka, nyĩmĩkua ĩnumba niasio; nĩgua, nuugui waakue alĩ ukulu.” 28ũYesu pĩna nukondia kwitambula inkaani izi ĩanamulundo naakũmĩkia kuumania waakue. 29Kuitĩ alukuamania zĩ mukola usũũmi, sika kĩna ĩalangi aao.

Currently Selected:

Matayo 7: KNT09

ማድመቅ

Copy