Yohana 19
19
Yesu atowiγwa afyulilwa.
1-2Ne Pilato ahomγuwa Yesu, azamtowa. Waja washilikali wazaluka bundu ja miwa, wazajimubadika mwe mutwi, tikibinda wazamzwika guni ja kizumbe, 3wazamwizila angwe: Mpongezi, zumbe ywa Wayuda! Wakibinda wazamtowa vibao. 4Pilato azalawa vituhu na uko se, azawati: Olelai! Namlavya na kunu se kwenyu, kangwe mtaile kuti: Sina masa, niyoona kwakwe. 5Yesu azalawila na kuja se aizwikile jiya bundu ja miwa na jiya guni ja kizumbe. Awati: Shuyu muntungwa! 6Wavikizi wakulu na wafunguwo wawe wakimwona wazakema angwe: Mkontele mwe muti! Mkontele mwe muti! Pilato awati: Mγuwei inywi, mkamkontele mwe muti! Hambu imi siona masa yakwe. 7Wayuda wazamlandula: Ishwi tina kitigo chetu, kwa ichi kitigo shuti akoṅwe, hambu azakiγalusha ṅwana Mulungu. 8Pilato akiiva inu mbuli azaisiiza kubulwa ni woγa, 9azaingila vituhu bomani, azamwuza Yesu: U ywa hi? Miya Yesu nkamlandule hata. 10Pilato azamγamba: Nkunilandula? Nkutaila kuti: Nina ufuṅwa wa kukushungula, kangi wa kukukontela mwe muti? 11Angwe ni Yesu: Anga nkuna ufuṅwa wa kunilaha, ati nkuuinkiγwe uko ulanga. Kwa ivyoho yuja aniinkileye na kwako ana masa yekula kuzinka yako. 12Ne Pilato aholonda, ndivyo amshungule. Miya Wayuda wazakema angwe: Ati watamshungula uyu, nkukundwa ni Kaiza. 13Pilato akiiva izi mbuli azamlavya Yesu na chengoi, azahita kwa ikala he kiti cha lahila masa hantu heitangwa Lukontelo lwa mawe, Kiebuleyo ndiho Gabata. 14Miya ne mushi wa kuliγanya Pasa saa mtandatu. Awaγamba Wayuda: Shuyu zumbe ywenyu! 15Waja wazakema angwe: Mwushe! Mwushe, umkontele mwe muti! Pilato awati: Nimkontele zumbe ywenyu mwe muti? Wavikizi wakulu wazalandula: Nkatina zumbe kushima Kaiza. 16Ne ahomwinkila na kwawe, kangwe akontelwe mwe muti. Wazamγuwa Yesu, wazamwiγala.
Yesu akontelwa mwe muti.
17-30.
17Azainula ṅwenye muti wakwe wa kukomelwa, azahita na haja hantu heitangwa He mazutwi, Kiebuleyo ndiho Gologota. 18Haja wazamkontela mwe muti haṅwe na watuhu waili, muṅwe kulume, muṅwe kumosho, Yesu gati. 19Pilato azagonda kabala, azakaika mwe uja muti, kaigondiγwe: Yesu ywa Nazaleti, zumbe ywa Wayuda. 20Unu ugonde Wayuda wangi wazaufyoma, hambu haja hantu, Yesu akontelweho mwe muti, ni hehi na kaya, kangi ugondiγwe Kiebuleyo, Kiloma, Kigiliki. 21Wavikizi wakulu wa Wayuda wazamγamba Pilato: Ushegonde: Zumbe ywa Wayuda, ugonde, kuti yuja azalonga: Imi ni zumbe ywa Wayuda! 22Angwe ni Pilato: Nigondilevyo ne nizabinda. 23Waja washilikali wakibinda kumkontela Yesu mwe muti wazaγuwa shuke zakwe, wazazilavya mafungu mane, kila mshilikaii fungu iṅwe, kuzashiγala nkazu yakwe; miya ija nkazu nkaina lushumo kuandiila ulanga mpaka shi, yoshe ngima nkaina. 24Wazaγambilana: Tisheipange! Miya tiitowele lusolo, ati neiγaluke ya ndai! Kangwe ugondengwa ubontoke uja wa kuγamba: Wazapangilana shuke zangu, nkazu yangu wazaitowela lusolo. Ne waja washilikali waγosholevyo.
Yesu alongilevyo akiholela mwe muti.
25Haja he muti haiγoloke nine ja Yesu na nduγuye ja nine mweitangwa Maliya, mkaza Kalofa, na Maliya Magadalene. 26Yesu akimwona nine na yuja mhina, ayemkundisha, aiγoloke haho, amγamba nine: Mlala, ṅwanao shuyu! 27Vikibinda azamγamba yuja mhina: Nyokwe shuyu! Haho ne yuja mhina ahomγuwa na kwakwe. 28Vikibinda Yesu akitaila, kuti vyoshe vizabontoka, kangwe ugondengwa uhontoke, aγamba: Nina nkilu. 29Kuna iγa jiikiγwejo, jiimemile mazi yenyeγela. Wazaγuwa fuli, wazajigisa yaja mazi yenyeγela wazajitunga mwe lasi, wazajikweza na kwe kanwa chakwe. 30Yesu akiγuwa yaja mazi yenyeγela azaγamba: Vizabontoka. Ne ahoinamya mutwi, azadwika moyo.
Yesu azalungwa he lubazu.
31-38.
31Kwa kuti ni mushi wa kuliγanya Pasa kangi nyemi ya ija sabato ni nkulu, kangwe viya vimba visheikale mwe miti mushi wa sabato, Wayuda wazamhembeleza Pilato, wahondwe viγa, wadaheushiγwa. 32Washilikali wazaiza, yuja ywa bosi wazamubonda viγa, hata yuja mtuhu akomiγweye haṅwe naye. 33Wakibula kwa Yesu, wakiona, kuti aibindile kufa, nkawamuhondile viγa, 34miya mshilikali muṅwe azamtunga na guha lie luhazu, viya du lushe mzalawa mpome na mazi. 35Yuja avieneye azalonga uwona, kangi uwona wakwe ni wa kweli, yuja ataila, kuti alonga vye kweli, kangwe hata inywi mtozeshe. 36Ivi vizaγosholwa, kangwe ugondengwa ubontoke uja wa kuγamba: Nkezeahondwe vuha! 37Vituhu ugonde utuhu waγamba: Newamwone, wamshomileye!
Yesu azikwa.
38-42.
38Yosefu ywa Alimatiya, ndiye ai mhina ywa Yesu, miya aivifishize kwa mbuli ya woγa na Wayuda, viya vikibontoka, azamhembeleza Pilato, amshungule kusheleza kimba cha Yesu. Pilato azamkundiza. Azahita, azasheleza chiya kimba chakwe. 39Nikodemo yohena azaiza, ni yuja ahitaye kwakwe kale na kilo, azaleta mafutilo ya mluziluzi yavanganyiγweyo na luza, ni ya shilingi magana maili. 40Wazaγuwa kimba cha Yesu, wazachikanta na shuke zeṅala, waimshishize yaja mafutilo, sa Wayuda wavyozwela kuzika. 41Haja hantu akontelweho mwe muti hana mγunda, mwe uja mγunda muna mbila mpya, mushilelemo muntu hata kale. 42Kwa kuti uja mushi Wayuda wakiteγa kwe mviko wa Pasa, wazamwika Yesu muja, hambu ija mbila i hehi.
Currently Selected:
Yohana 19: KISHNT05
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
New Testament in Kishambala © Bible Society of Tanzania, 2005.
