Tio 23
23
Uvaʼs iyajt quBʼaal Jesuus inqʼa fariseeo, atz inqʼa nikich txhusun ibʼekʼbʼal inqʼa tij imam Israeel
Kuxh 12.38-40; Luk 11.37-54; 20.45-47
1Yaʼne ech tal Jesuus te inqʼa xaol, atz te inqʼa nikich itxhus tibʼ s-kʼatza s-eche: 2—Eche inqʼa fariseeo tuchʼ inqʼa nik txhusun ibʼekʼbʼal inqʼa qumol s-tijaq imam Israeel, tan nik motx ikʼuqeʼv tu kʼuqeʼvbʼal uvaʼ ‹kʼuqeʼvbʼal tetz Moisees,› chich eʼli. Tan aʼ nik motx itxhus inqʼa bʼekʼbʼal uvaʼ tal quBʼaal Tiuxh itzʼibʼat ka Moisees.{*}#23.2 ¿Kam nik elkaʼp u yol ‹kʼuqeʼvbʼal tetz Moisees› nik tal u versiikulo uvaʼa? Aʼ nik elkaʼpun tiʼ vaʼl u kʼuqeʼvbʼal uvaʼ nikich ibʼitix tuul inqʼa kʼulbʼal ibʼ tetz inqʼa tij imam Israeel. Tul aʼ nikich kʼuqeʼvk inqʼa mam txhusunal s-tuul tiʼ talax el inqʼa bʼekʼbʼal viʼ inqʼa xaol. 3Pet toq val sete uvaʼ jankʼalxh inqʼa bʼekʼbʼal uvaʼ itzʼibʼa ka Moisees nik motx tal enimataʼ, tul nimavaq, atz bʼanvaq. Pet aʼ yeʼ ebʼan vikantxhaqla bʼanoʼm. Tan nik motx tal inimaleʼ, poro yeʼ nik motx inima. 4Tan ech nik motx ibʼan eche invaʼq u vinaq uvaʼ nik ibʼan tiqatz imol uvaʼ oqxh talale. Tul nik taqʼ tiqa vimol. Tul jitoq laʼ itxʼol tiqaleʼ.
Uvaʼs iyajt quBʼaal Jesuus inqʼa iqʼesal uqʼeʼybʼal tiʼ toksataq iqʼij, atz tiʼ taqʼtaq bʼen tibʼ s-nim
5Poro jankʼalxh uvaʼ nik ibʼan inqʼa fariseeo tuchʼ inqʼa nik txhusun ibʼekʼbʼal inqʼa qumol s-tijaq imam Israeel, tan aʼaq kuxh isaʼ tilix taʼn inqʼa xaol. Tan nik motx itzʼibʼa viyolbʼal quBʼaal Tiuxh tiʼ invaʼq kam, tul nik motx itxhʼunbʼa tipala. Atz nik motx iqitzoʼk tiqʼabʼ. Tul nimaqxh ibʼoy inqʼa iqinkin itxhas toksaʼm nik motx ibʼaneʼ.#Tio 6.1; Deuteronoomio 6.8; Nuumeros 15.38
6Tan chiibʼiyaq kuxhtuʼ uvaʼ, aʼ nik motx kuʼk t-inqʼa bʼaxa xhiila tuulbʼal inqʼa txʼaʼoʼm. Atz chiibʼiyaqxhtuʼ uvaʼ, aʼ nik kʼuqeʼvk t-inqʼa bʼaxa xhiila tuulbʼal inqʼa kʼulbʼal ibʼ. 7Tul chiibʼiyaqxhtuʼ uvaʼ nik taqʼax bʼaʼnil ikʼuul taʼn inqʼa xaol t-inqʼa kʼayibʼal. Atz chiibʼiyaqxhtuʼ uvaʼ: «Txhaql axh,» atz «Xeni, txhusul qetz,» chichaq eʼli.
8Pet ex, tan yeʼ laʼ utxhi laʼ etxhok tok eqʼij taʼn inqʼa xaol, tiʼ uvaʼ, ech laʼ alax sete s-eche: «Txhaql axh,» atz «Xeni, txhusul qetz,» chaq eʼl ex. Tan jankʼalxh ex sekaqaayil, etitzʼin etatzik kuxh etibʼ sinvatz. Tul vaʼl kuxh u txhusul etetz. Aʼetz ine, uvaʼ alel ka u vulebʼal taʼn quBʼaal Tiuxh, in, u Kriisto.{*}#23.8 Eche inqʼa yol nik tal quBʼaal Jesuus, tiʼ uvaʼ yeʼ laʼ motx tal itxhaqli ixeni vaʼq u txhusunal. Aloq jitetz aʼ nik tal quBʼaal Jesuus uvaʼ yeʼxhkam koq kuxh vet qutxaʼk s-quvatzaq, pet aʼ nik tal uvaʼ yeʼ laʼ taqʼ bʼen tibʼ inqʼa iqʼon iviʼ s-nim xoʼl inqʼa niman tetz Jesuus. Pet ayaʼl bʼaʼn s-te laʼ ibʼana. Tul jit kuxh mam oksa qʼij laʼ ok s-tiʼ oq laʼ alax itxhaqli ixeni taʼn inqʼa niman tetz Jesuus.
9Atz yeʼlat laʼ isaʼa uvaʼ laʼ kuxh ebʼaalai invaʼtoʼq vinaq tzitza vatz txʼavaʼ. Tan vaʼl kuxh quBʼaal ati; aʼe u quBʼaal Tiuxh, uvaʼ een tu amlikaʼ. 10Atz yeʼlat laʼ isaʼa uvaʼ laʼ motx tal ex inqʼa xaol s-txhusul tetz. Tan taʼn kuxh ine, u txhusul etetz, in, uvaʼ alel ka u vulebʼal taʼn quBʼaal Tiuxh. 11Atz jabʼiste ex, uvaʼ laʼ saʼon tiqʼol iviʼ xoʼl inqʼa emol, tul aʼetz exe, uvaʼ ech ex eche kʼuulanal laʼ ebʼana.#Tio 20.26-27; Kuxh 9.35; 10.43-44; Luk 22.26 12Tan jabʼiste ex, uvaʼ laʼ etaqʼ bʼen etibʼ s-nim, tul aʼetz exe, uvaʼ yeʼ laʼ oksal eqʼij taʼn quBʼaal Tiuxh. Pet jabʼiste ex, uvaʼ laʼ etiqʼo kuʼl etibʼ, tul aʼetz exe, uvaʼ laʼ oksal eqʼij taʼn quBʼaal Tiuxh.#Luk 14.11; 18.14
Uvaʼs talt quBʼaal Jesuus tul u kʼaxbʼichil tiibʼa inqʼa iqʼesal uqʼeʼybʼal tiʼ inqʼa kantxhaq nikich ibʼan vatz quBʼaal Tiuxh
13Poro ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik ebʼan tuchʼ vetatineʼ! Tan aʼ vetxumbʼal yeʼ nik kuyun tok inqʼa xaol kʼatz quBʼaal Tiuxh, tul laʼ ibʼan quBʼaal Tiuxh iqʼesalil t-taanima. Tan ech nik ebʼan eche laʼ ibʼan vaʼq xaol uvaʼ laʼ ijup u jubʼal vatz vimol. Tan jitoq nik esaʼeʼ laʼ ibʼan quBʼaal Tiuxh iqʼesalil tetaanima. Tan ech nik ebʼan eche vaʼq u xaol uvaʼ juntxh laʼ ikatxʼu u jubʼal s-vatz, tul jitoq laʼ paloʼk.
14[Tul ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan eqʼaqʼal, tul nik motx taqʼ tzaqatz txakay ixoq totzotz. Tul nik kuxh etxhok txha vet txumbʼal, tul sibʼxh tuul venatxhkʼuulat Tiuxh nik ebʼaneʼ. Tan aʼ kuxh esaʼ isotz ikʼuul inqʼa xaol. Tiʼetz vekantxhaqla txumbʼal nik motx ebʼaneʼ, tul mam kʼaxkʼo laʼ motx bʼenk ex.]{*}#23.14 ¿Kametz nik elkaʼpun u yol uvaʼ iqʼaqʼal inqʼa iqʼesal uqʼeʼybʼal, tul nik taqʼ inqʼa txakay ixoq inqʼa totzotz? Aʼ nik elkaʼpun uvaʼ tira nikich motx iyaʼlu inqʼa iqʼesal uqʼeʼybʼal inqʼa xaol tiʼ taqʼax ipuaq, uvaʼ vaʼl te laval laʼ motx taqʼa. Tul kaqaayil xaol nikich motx iyaʼlu tiʼ taqʼaxeʼ, kʼuxh meebʼaʼxhtuʼ, atz kʼuxh txakay ixoq, tan tetxhal nikich motx taqʼeʼ. Tan oq yeʼl vipuaq u txakay ixoq laʼ txheji, tul tetxhal laʼich motx taqʼ jaʼ t-tzeʼ. Echetz aʼ nikich talax vet te u txakay ixoq uvaʼ laʼ ikʼayi vet totzotz tiʼ itxhojtaʼ. Tul kamal aʼ nikich titzʼa inqʼa iqʼesal uqʼeʼybʼal tiʼ kam inqʼa nikich isaʼon tuulbʼal u tostiuxh, tul bʼaʼnichetz kuxhtuʼ. Atz invaʼt paqte uvaʼ, aʼ nikich motx txʼaʼonk inqʼa iqʼesal uqʼeʼybʼal viʼ inqʼa nikich ikʼul tibʼ tu tostiuxh. Pet aʼe tan, tira nikich motx ipal vet paʼl tiʼ tabʼil inqʼa puaq. Tul txajetz vet vatz quBʼaal Tiuxh uvaʼ nikich motx ibʼaneʼ. Tan tetxhal kuxh nikich ikʼayi vet tzaqatz txakay ixoq tzaqatz totzotz tiʼ taqʼt u puaq. Tul mam natxho Tiuxh nikich motx ibʼan inqʼa iqʼesal uqʼeʼybʼal vatz inqʼa xaol, nimal kuxh oora nikich motx tiqʼo s-tiʼ. Tul aʼichaq kuxh isaʼ isotz ikʼuul inqʼa xaol. Atz aʼichaq kuxh isaʼ ijupt ivatz inqʼa xaol tiʼ yeʼ ikʼutxht inqʼa kantxhaqla txumbʼal nikich motx ibʼan tiʼ tabʼil inqʼa puaq. Aʼetz uvaʼe, nik tal quBʼaal Jesuus tzitza, tiʼ uvaʼ bʼan vatz kuxh nik ibʼaneʼ. Echatetz uvaʼe nik tal t-Kuxh 12.40 tuchʼ Luk 20.47.
15Atz ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan jankʼal ivatz txʼavaʼ nik exaj tiʼ itxhokox emol tiʼ vetuqʼeʼybʼal. Poro oqetz nik etoleʼv vet tiʼ itxhej emol, tul aʼl nik ipal vet iviʼ u yeʼbʼaʼn nik ibʼan vemol viʼ uvaʼ nik etxhus s-te.
Uvaʼs iyajt quBʼaal Jesuus inqʼa qʼesal uqʼeʼybʼal, tiʼ uvaʼ kam kuxh nikich tiqʼo tzaan tiʼ inimal inqʼa iyol
16Atz ¡txumlebʼalxh evatz, tan ech kuxh vetxhusun eche invaʼq tzot uvaʼ laʼ iqʼon bʼey vatz invaʼtoʼq tzot! Tan ech nik etal s-eche: «Oq aʼ u tostiuxh laʼ etiqʼo tzaan tiʼ inimal invaʼq eyol, oqetz yeʼ laʼ enima, yeʼletz epaʼv s-tiʼ. Pet oq aʼ u ooro, uvaʼ at tuul u tostiuxh, laʼ etiqʼo tzaan tiʼ inimal invaʼq eyol, oqetz yeʼ laʼ enima, tul atetz epaʼv s-tiʼ,» chich etxhust inqʼa xaol.{*}#23.16 Aʼ nikich tal inqʼa fariseeo, inqʼa iqʼesal xoʼl inqʼa tij imam Israeel, uvaʼ bʼaʼn laʼ motx tiqʼo tzaan inqʼa xaol ibʼij u ooro, u viqbʼal tetz u tostiuxh, tiʼ ikʼuqbʼat invaʼq iyol te vaʼq imol. Tan oq uvaʼ laʼich ijaq ipuaq s-kʼam te invaʼq imol, tul tetxhal kuxh laʼich tiqʼo tzaan inqʼa xaol vibʼij u ooro tuchʼ u tostiuxh tiʼ inimat viyol. Poro ech koqe, tan taʼnxh u tostiuxh nikich motx tiqʼo tzaan inqʼa xaol tiʼ inqʼa iyol. Yaʼne nikich ixeʼt vet inqʼa fariseeo tiʼ ibʼekʼex inqʼa xaol uvaʼ jit kuxh taʼn u tostiuxh laʼ tiqʼo tzaan tiʼ inqʼa iyol, pet ant u ooro laʼich tiqʼo tzaan inqʼa xaol tiʼ viyol. Xaʼtetze tal quBʼaal Jesuus inuqul te inqʼa fariseeo, atz te inqʼa xaol, uvaʼ jitich bʼaʼn uvaʼ laʼich toksa tzaan inqʼa xaol kam kuxh invaʼq tiʼ inimat invaʼq iyol. Pet taʼnxh bʼaʼn uvaʼ taʼn kuxhte laʼ tal u xaol viyol tul laʼ inima.
17Pet ¡tira bʼak sotznaʼql ekʼuul! Tan ¡ech ex eche tzot! Tan ¡keʼch talaxeʼ uvaʼ, aʼ u ooro palnaʼql tiqleʼm viʼ u tostiuxh nik etaleʼ! Atz aʼ atil u ooro tuul u tostiuxh. 18Atz echat nik etal s-eche: «Oq aʼ u natxhkʼuulabʼal laʼ etiqʼo tzaan tiʼ inimal vaʼq eyol, oqetz yeʼ laʼ enima, tul yeʼl epaʼv s-tiʼ. Pet oq aʼ u oya, uvaʼ viʼ u natxhkʼuulabʼal, laʼ etiqʼo tzaan tiʼ inimal vaʼq veyol, oqetz yeʼ laʼ enima, tul atetz epaʼv s-tiʼ,» chich etxhust inqʼa xaol.
19Pet ¡tira palsan yol kuxh ex! Tan ¡ech ex eche tzot! ¡Keʼch talaxeʼ uvaʼ, aʼ u oya palnaʼq tiqleʼm viʼ u natxhkʼuulabʼal nik etaleʼ! Atz aʼ atil jaʼ u oya viʼ u natxhkʼuulabʼal. 20Tan jaʼl invaʼq xaol uvaʼ nik oksan tzaan u natxhkʼuulabʼal tiʼ inimal vaʼq iyol, tul antetz vet nik toksa tzaane jankʼal uvaʼ at viʼ u natxhkʼuulabʼal.
21Atz jaʼl invaʼq xaol uvaʼ nik oksan tzaan u nimla atibʼal tuulbʼal u tostiuxh tiʼ inimal vaʼq iyol, tul antetz vete u quBʼaal Tiuxh nik toksa tzaan s-tuul. Tan tatibʼal quBʼaal Tiuxh u nimla atibʼal tuulbʼal u tostiuxh. 22Atz jaʼlat invaʼq xaol uvaʼ nik oksan tzaan u amlikaʼ tiʼ inimal vaʼq iyol, tul antetz vet nik toksa tzaane u tatibʼal quBʼaal Tiuxh tal uvaʼ nik ibʼanvat viqʼesalil.#Isaiias 66.1; Tio 5.34
Uvaʼs iyajt quBʼaal Jesuus inqʼa qʼesal uqʼeʼybʼal, tan yeʼ nikich ibʼan inqʼa bʼekʼbʼal uvaʼ sibʼ itxakunbʼal vatz quBʼaal Tiuxh
23Atz ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan kʼuxh nik etaqʼ juunil te txhaq laalavil oxvatzul inqʼa txʼumbʼisabʼ tetz inqʼa etxhbʼubʼal, u meenta, u eneeldo tuchʼ u komiino, poro aʼ yeʼ nik ebʼan jolt inqʼa ibʼekʼbʼal quBʼaal Tiuxh, inqʼa sibʼ itxakunbʼal. Aʼetze inqʼaa: Vebʼant u jik, atz vetxumt ivatz emol, atz vekʼuqbʼat ekʼuul tiʼ quBʼaal Tiuxh. Aʼetz inqʼae, tetxhal laʼ enima, tul jitoq laʼ etanbʼa taqʼax txhaq juunil te txhaq laalavil inqʼa tzeʼ, eche uvaʼ nik motx ebʼan s-txheel.#Leviitiko 27.30 24Tan ¡ech ex eche u tzot uvaʼ laʼ iqʼon bʼey vatz invaʼtoʼq imol s-tzotil! Tan aʼ nik etal s-nimla paʼv inqʼa jit paʼv. Pet aʼ yeʼ nik etal s-paʼv inqʼa nimla yeʼbʼaʼn. Tan ech nik ebʼan, eche invaʼq xaol uvaʼ, aʼ nik itxaʼu ka invaʼq tal us tuul invaʼq vaaso, tul aʼ nik ibʼiqʼ invaʼq u kameeyo uvaʼ at tuul u vaaso.{*}#23.24 ¿Kam telaʼpun u yol nik talax xoʼl inqʼa tij imam Israeel tiʼ?: ‹vitxaʼul ka invaʼq us tuul u vaaso› tuchʼ ‹vibʼiqʼix u kameeyo.› Aʼ nik elkaʼpun uvaʼ eenxh ivatz inqʼa iqʼesal uqʼeʼybʼal tiʼ invaʼq tal yol, uvaʼ kantxhaq, atz tiʼ invaʼq tal yol, uvaʼ tetxhal laʼ nimal vibʼekʼbʼal quBʼaal Tiuxh s-vatz. Pet aʼ, yeʼ nik tel taanima tiʼ invaʼq u nimla yol, jankʼal eche vibʼanax invaʼq mam yeʼbʼaʼn te invaʼq xaol. Tan kʼuxh tijxh u yol, poro jitoq aʼ nik motx tilix inuqule taʼn inqʼa iqʼesal.
Uvaʼs iyajt quBʼaal Jesuus inqʼa qʼesal uqʼeʼybʼal, tiʼ uvaʼ bʼan vatz kuxh nikich ibʼan vatz inqʼa xaol, tul jitxh aʼ vinuqul nikich motx ibʼan tiʼ inatxhax Tiuxh
25Poro ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan ech ex eche u vaaso tuchʼ u laq uvaʼ nik motx etxʼaj tiʼ. Tul bʼaʼn veteʼ nik etileʼ. Poro yeʼbʼaʼn u tuul. Echetze vetatineʼ, tan mamala elaqʼ nik motx ebʼaneʼ, atz mamala inqʼa jitxh inuqul nik ebʼaneʼ. 26¡Tzotla txhaq fariseeo! Aʼ bʼaxa eteesa el inqʼa yeʼbʼaʼn uvaʼ tetaanima, echetz toq ekʼutxhte u bʼaʼn tuchʼ vetatineʼ. Eche laʼ itxʼaax tuul u vaaso, atz tuul u laq, yaʼne laʼ txʼajp u tiʼ.
Uvaʼs iyajt quBʼaal Jesuus inqʼa qʼesal uqʼeʼybʼal, tiʼ uvaʼ bʼan vatz kuxh nikich motx ibʼan tuchʼ u tatineʼ, tul ibʼan quBʼaal Jesuus eela tuchʼ u tiibʼa kamnaʼq
27Atz ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan ech etatin eche tiibʼa inqʼa kamnaʼq. Tan kʼuxh oqxh isaqal u tiʼe, atz kʼuxh josqʼilxh tilixeʼ, poro mamalaxh ibʼaqil kamnaʼq s-tuul. Tul oqxh ixevale.#Vibʼanoʼm inqʼa Apoostol 23.3
28Echetz etatine, tan kʼuxh jikxh ex vatz inqʼa xaol nik etaleʼ, poro mamala yeʼbʼaʼn tetaanima. Tul bʼan vatz kuxh nik motx ebʼan vatz inqʼa xaol.
Uvaʼs taqʼt jaʼp quBʼaal Jesuus yol tiibʼa inqʼa qʼesal uqʼeʼybʼal, tiʼ vikamebʼal inqʼa qʼexsanich tetz viyol quBʼaal Tiuxh s-naʼya
29¡Echetz txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan nik ebʼit tiibʼa tal uvaʼ muqel inqʼa qʼexsanich tetz viyol quBʼaal Tiuxh. Atz nikat motx eviq tiibʼa jolt inqʼa jikla txhaq vinaq, inqʼa naʼy ikameʼ.{*}#23.29 ¿Kam s-tiʼil nik iyolox inqʼa txhusul tetz ibʼekʼbʼal inqʼa tij imam Israeel tuchʼ inqʼa fariseeo taʼn quBʼaal Jesuus tiʼ ibʼitix tiibʼa inqʼa qʼexsanich tetz viyol quBʼaal Tiuxh tuchʼ viviqix tiibʼa inqʼa jikla txhaq vinaq? Tiʼ uvaʼ tan, jitoq nik motx inima inqʼa fariseeo kam uvaʼ alel ka taʼn inqʼa qʼexsanich tetz viyol quBʼaal Tiuxh, eche Moisees, Isaiias, Joeel, Amoos. Pet tzʼeqo tzij kuxh nik motx ibʼan inqʼa fariseeo tiʼ ibʼitix tiibʼa inqʼa vinaq inqʼae. Tan ech txhan vete niman tetz laʼ ilixi. Pet aʼaq kuxh isaʼ toksal iqʼij taʼn inqʼa xaol. 30Tul ech nik motx etal s-eche: «Atich koq vet oʼe uvaʼs itzʼlich inqʼa kʼuy qumam, tul yeʼlebʼ oʼ lotxhon oʼ tiʼ iyatzʼax el inqʼa qʼexsanich tetz viyol quBʼaal Tiuxh,» chich ex.
31Poro ech koqe, tan antxh inqʼa etxumbʼal nik kʼutxhun uvaʼ echat kuxh vetitzʼabʼal eche inqʼa kʼuy emam, uvaʼ motx yatzʼon el inqʼa qʼexsanich tetz viyol quBʼaal Tiuxh. Tan jitoq nik motx enima viyol quBʼaal Tiuxh, uvaʼ alel tzaan taʼn inqʼa qʼexsanich tetz viyol quBʼaal Tiuxh. 32Pet ¡ex toq ilon oq antxh toq ebʼan jankʼal u yaabʼla txumbʼal uvaʼ nikich ibʼan inqʼa kʼuy emam!
33¡Tiyiilaq kan! Tan ¡ex kuxh aj tialaq kʼuul! Tan ¡echatxh vetxumbʼal eche vebʼaal u Satanaas! Tul kam koq laʼ etulbʼe ekolt etibʼ vatz u kʼaxkʼo. Tan tetxhal laʼ bʼen ex tu xamal.{*}#23.33 ¿Kam talax u yol uvaʼ tal quBʼaal Jesuus tiʼ u ‹tiyiil kan› tuchʼ uvaʼ, aʼ ‹Satanaas vibʼaal› inqʼa fariseeo? Aʼetz nik elkaʼpun, tiʼ uvaʼ ant kuxh pal tiqʼo kam vitxumbʼal u Satanaas tiʼ vitzʼeqon tzij, eche uvaʼ ibʼant Satanaas tiʼ ikʼamax u kan tiʼ itzʼeqex tzij te Eeva tuchʼ Adaan, uvaʼs atichaq tuul u bʼaʼnla xhoraal. Tan aʼ nik motx tal inqʼa fariseeo uvaʼ bʼaʼnla vinaqich inqʼa qʼexsanich tetz viyol quBʼaal Tiuxh. Pet yeʼ nik motx ibʼan kam uvaʼ tzʼibʼamal ka taʼn. Tio 3.7; 12.34; Luk 3.7 34Tul toq val sete: Toq intxhaq bʼen qʼexsan tetz viyol quBʼaal Tiuxh sexoʼl tuchʼ inqʼa at tootzaqibʼal s-bʼaʼn, atz tuchʼ txhusulaq etetz. Poro at inqʼa toq eyatzʼeʼl. Atz at inqʼa toq etaqʼ jaʼ vatz kurus. Tul at inqʼa toq motx etzʼuʼma tuulbʼal inqʼa kʼulbʼal etibʼ. Atz at inqʼa toq motx etojqeʼla t-junun tenam. 35Echetz toq tule u kʼaxkʼo setiibʼa tiʼ viyatzʼax el inqʼa jikla txhaq qʼexsanich tetz viyol quBʼaal Tiuxh. Tan een xeʼtinaʼq tzaan u yol, tiʼ uvaʼs iyatzʼax el Aveel, uvaʼ jikichxh itxumbʼal vatz quBʼaal Tiuxh, tul tetxhal topoon, tiʼ uvaʼs iyatzʼax el Sakariias, vikʼaol Verekiias. Tan aʼ yatzʼaxik el Sakariias vatz viqʼanalil u tostiuxh, vatz okaʼp u natxhkʼuulabʼal, tal uvaʼ nik tzʼeʼk inqʼa oya.#Jeenesis 4.8; 2 Kroonikas 24.20-21
36Echetz toq valte sete uvaʼ, aʼ toq ulk vet inqʼa mamala txhaq kʼaxkʼo setiibʼa tiʼ jankʼal inqʼa yeʼbʼaʼn uvaʼ bʼanel tzaan taʼn inqʼa kʼuy emam.
Uvaʼs itxumun quBʼaal Jesuus tiʼ u tial ikʼuul inqʼa aj tenam Jerusaleen
Luk 13.34-35
37¡Ex, aj tenam Jerusaleen, ex inqʼa nik motx yatzʼon inqʼa qʼexsan tetz viyol quBʼaal Tiuxh, atz ex inqʼa motx kʼonin inqʼa qʼexsan tetz viyol quBʼaal Tiuxh s-sivan, inqʼa junun itxhaqax tzaan sexoʼl tiʼ talax viyol quBʼaal Tiuxh, tan jatpaqx kuxh val inmolt ex sinkʼatza, eche nik imoltoʼk vaʼq u txutx kaxhan tzaqatz tal jaqʼ ixichʼ! Poro ¡tira yeʼ nik esaʼeʼ! 38Pet toq val sete: Yeʼl vet quBʼaal Tiuxh laʼ atin sexoʼl tuulbʼal u tostiuxh.{*}#23.38 ¿Kam nik elkaʼpun u yol?: —Yeʼl vet quBʼaal Tiuxh laʼ atin sexoʼl tuulbʼal u tostiuxh, —chiche. Ech nik tal tu Viivlia tu kastiiya s-eche: —Vuestra casa os es dejada desierta, —chiche. —Tira laʼ amatxh vet ka vetotzotz, —chiche. Atetz kaʼvaʼl nik elkaʼpun u yol uvaʼa. Aʼ u bʼaxa telaʼpun, uvaʼ yeʼl quBʼaal Tiuxh laʼ kaj vet kaj tu tostiuxh tu tenam Jerusaleen. Tan ixval u quBʼaal Jesuus, viKʼaol quBʼaal Tiuxh, taʼn inqʼa tij imam Israeel. Tul echatetz laʼ tixval inqʼa tij imam Israeele taʼn u quBʼaal Tiuxh. Tul tzoqpxh elaʼp u yol uvaʼa. Tan qʼixm u bʼuʼq uvaʼ atich jaʼ s-jatxbʼal tetz u tostiuxh uvaʼs ikam Jesuus. Aʼetz nik elkaʼpun uvaʼ jununil vet inqʼa niman tetz Jesuus laʼ natxhon Tiuxh, pet jiten vet vaʼtoʼq oksan yol vatz Tiuxh laʼ oksan vatz Tiuxh. Tul yeʼlat vet itxaʼk u tostiuxh uvaʼ atich xoʼl inqʼa tij imam Israeel tu tenam Jerusaleen, tan een vet atil quBʼaal Tiuxh t-taanima junun inqʼa niman tetz. Tul jit vet een tu tostiuxh t-Jerusaleen. Aʼ vikaʼv telaʼpun, uvaʼ laʼ amatxh kaj totzotz inqʼa tij imam Israeel, tuchʼ vitenam, atz kʼuxh vitxʼavaʼ. Tul antxhtuʼ. Tan elaʼpunxh inqʼa yol uvaʼ taqʼ jaʼp quBʼaal Jesuus tiibʼa inqʼa tij imam Israeel. Kʼuxh u bʼaxa, atz kʼuxh vikaʼv, tan tzoqpi. Tan ikuy quBʼaal Tiuxh tokebʼel u txʼavaʼ tetz inqʼa tij imam Israeel taʼn inqʼa isol u tenam Rooma. Aʼ ibʼanvat tu yaʼbʼ 70 m.t.J.; maʼtich ibʼant kaʼviinqil yaʼbʼ ibʼen quBʼaal Jesuus t-amlikaʼ. Tul mam yol ibʼan inqʼa sol tu tenam Jerusaleen. Tan mamala xaol iyatzʼa. Atz iqʼol inqʼa xaol s-pereexhoil. Tul ijinpu ka u tostiuxh. Tul mamala otzotz ijinpu ka inqʼa sol. Tul tira motx itzʼeq tibʼ inqʼa xaol; yeʼxhabʼil vet invaʼq kajka: Jitoq vet alkaalte; jitoq presideente; jitoq atich vet aqʼol kuʼ yol tinuqul; atz jitoq kajka iqʼesal uqʼeʼybʼal. Tan tira motx itzʼeqaq tibʼ. Echetz vet tamatxh kaje u tenam Jerusaleen, tan ech u yole uvaʼ taqʼ jaʼp quBʼaal Jesuus s-tiibʼa. 39Tul yeʼl vet inpaqt laʼ etil in. Pet opoon nal invaʼl qʼij uvaʼ ech laʼ motx etal s-eche: «¡Chiibʼebʼalxh avul s-quxoʼl tuchʼ u tiqleʼm u quBʼaal Tiuxh!» chaq ex, —xeʼt Jesuus.#Saalmo 118.26
Currently Selected:
Tio 23: ixlC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2016, Wycliffe Bible Translators, Inc. All rights reserved.
