Matayo 26

Machabuli ga kunkoma Yesu

(Maluko 14:1-2; Luka 22:1-2; Yohana 11:45-53)

1Yesu apajomola kubola genia goa, ngabalengela akinapunji bakwe, 2“Mmanyangite kube gaigi machoba mabena kupakube na Mpapala gwa Pasaka, na Mwana jwa Mundu apangigwa ibe abambigwe munchalaba.”

3Kingobu chenie Akakung'i akolo na akananhota mundu ngabakongana pamwe panganya ja Kayafa ojwakiba Nkung'i nkolo. 4Ngabapanga ndela ja kunkamula Yesu bankome kukuiya. 5“Nambu ngabalenga kile chimwe, chakakamuligwaje kingobu cha mpapala gwa Pasaka ukapitije ukomo kati ja bandu.”

Yesu apakaigwa mauta ku Betania

(Maluko 14:3-9; Yohana 12:1-8)

6Yesu akiba ku Betania, kachakwe Simoni, ojwakiba juna maloi, 7amama bamwe abakiba na chupa echikitweli mauta ga kunungila gabei ngolongwa, nganhwikilila pamecha pala apakiba atamite akalya chakulya, ngannyitila mauta genia umutwe. 8Akinapunji bakwe apabalola genia ngabachimwa, ngabalenga, “Ganike kugatunia?” 9“Mauta ganga kabi gauchigwe kubei ngolongwa, nu uloi gwene kape akaocho.”

10Yesu ngamanya echibalongela, ngabalengela, “Mbona machumbuya amama bamba? Batei chwapi ni kile chambone kwango. 11Akaocho mmi nabo machoba goa, nambu ne mbeje pamwe namangweto machoba goa. 12Amama bamba banyitile mauta ibe kumbanganikia kwa machiko gango. 13Nannengelanga kweli kutenda, padunia poa pupakutangachigwa Nhwalo Gwambone, kitendwa chenje chibatei amama aba kibakulongaligwa kakombake benia.”

Yuda ajeketela kunng'aluka Yesu

(Maluko 14:10-11; Luka 22:3-6)

14Penia Yuda Isikalioti, ojwakiba jumwe kati ja baba komi na abele, ngajenda kwa akakung'i akolo, 15ngabalenge, “Mpakumbe kinii anda nang'alwike Yesu?” Ngabammalangi ipande selasini yuloi, 16Kuboka kingobu chenie Yuda ngabe akapala ndela ju kunng'aluka Yesu.

Yesu alye chakulya cha Pasaka pamwe na akinapunji bakwe

(Maluko 14:12-21; Luka 22:7-13,21-23; Yohana 13:21-30)

17Lichoba lya kutumbula mpapala gwa mikate jangajela Kimela akinapunji ngabannyendela Yesu ngabankonya, “Mpala tukampanganikie ko Chakulya cha Pasaka?”

18Yesu ngabajanga, “Nnyendange kunnyini kumundu jumwe, makannengele, ‘Aboli balenga, kingobu chango kiike, mbakulye Pasaka pamwe na akinapunji bango kachinu.’ ”

19Akinapunji ngabatenda andi Yesu apabalagila, ngabapangania mpapala gwa Pasaka.

20Piika kimuyo, Yesu ngatama kulye pamwe na akinapunji bakwe komi na abena. 21Apabakiba bakalyaga, Yesu ngalenga, “Nannenge kweli, jumwe panakati jinu apakung'aluka.”

22Akinapunji ngabaechuka muno, ngabatumbu kunkonya Yesu jumwe jumwe, “Angwana, bo nenga?”

23Yesu ngajanga, “Ojwapakulela nkate muntungati pamwe na nenga nga jwenio ojwapakung'aluka. 24Mwana jwa Mundu mawa andi pagalenga Majandiko Gachwapi nhwalo gwa jwenio, nambu, kulaga mundu jwenio ojwapakunng'aluka Mwana jwa Mundu! Yakabi mbaya kwa mundu jwenio anda akabelwikije.”

25Yuda ojwapala kunng'aluka, ngankonya, “Aboli! Bo, nenga?”

Yesu ngalenga “Mwe nnengite.”

Ilyo ya Angwana

(Maluko 14:22-26; Luka 22:14-20; 1 Akakolinto 11:23-25)

26Pabakiba bakalyaga, Yesu ngatola nkate, ngannumba Nnoongo, ngaumetula, ngabape akinapunji bakwe nu kulenga, “Ntolange nnie, gongo nga mmele gwango.”

27Kabe ngatola kikombe, ngalumba, ngabape akalenga, “Nnywegange mmoa,” 28“Jenje nga myai jango ejibeka kipola lilagano lya Nnoongo, myai ejichalakicha malagano ga bandu ajingi ibe balekekeigwe mabaja. 29Nannengelanga, nyweje kabele divai ja zabibu mpaka lichoba lyale apambakunywe nhyono pamwe na mangweto mu Kingwana cha Awabango.”

30Kuboka pu kujemba nhwambo, ngabajenda kukitombi cha Mizeituni.

Yesu alenga Petulo apakungana

(Maluko 14:27-31; Luka 22:31-34; Yohana 13:36-38)

31Penia Yesu ngabalengela, “Kilo jenje ja lele, mmoa mwenga mpakutila nu kuneka ne, gambu Majandiko Gachwapi galenga, ‘Nnoongo alenga mbakunkoma nchungi, na kipenga cha mambelele kipakupwilikana.’ 32Nambu kuboka pu kuyoka kwango, mbakunnongalela ku Galilaya.”

33Petulo ngannenge Yesu, “Ata ikabi boa bannekangite, ne nannekaje.”

34Yesu ngannengela, “Kweli nannengela, kilo ujenje tango nkokoloko nukubekaje, mpakungana patatu.”

35Petulo ngannengela, “Nengaje yenie ata anda napaligwe kuwe pamwe namwe nannekaje.”

Akinapunji bange bala ngabalenga uyo.

Yesu agongalela kung'onda gwa mikongo ku Getisemani

(Maluko 14:32-42; Luka 22:39-46)

36Penia Yesu ngajenda pamwe na akinapunji bakwe paali apakemigwa Getisemani, ngabalenge, “Ntamange pamba ne nyenda papa kugongalela.” 37Ngantola Petulo pamwe ni ingota ibena ya Zebedayo, ngatumbula kuechuka na kube na nambwele, 38Penia ngabalengela, “Mbi na kuwechuka kukolongwa umwojo papipi nu kuwe. Ntamange pamba nkeluyange pamwe na ne.”

39Ngajenda nnongi kachoko, ngagwe manguku, ngagongalela, “Awabango andaiotwile kikombe chenje chambete, nambu ikabe anda apambala neje, ila apampala mwe.”

40Kubokapenia ngababuji akinapunji bakwe akatatu bala, ngabakole bagochilinge, ngannenge Petulo, “Mboni makangweto nchipulinge kube mio pamwe nane ata lisaa limwe? 41Nkelukiange nukugongalela kupala makalondoigwaje. Uhuke kupala kutenda agapala Nnoongo nambu makakala ga mundu kuotoje.”

42Ngajenda kabe mala ja pabele ngagongalela, “Awawa bango, anda iotwile kikombe chikumboteka kipete panga nywe nenga, nambu agampala gakamuligwe.” 43Ngabajendela kabele, ngabakolelanga bagochalinge, gambu mio gabe gakiba na lugono.

44Yesu ngabaleka, ngajenda kabele kugongalela mala ja patatu kwa malobe ugaga. 45Kabe ngabajendela akinapunji bala, ngabalengela, “Bo, mmi tango makagolokanga nu kupomolela? Nnolange! Kingobu chene kiike, na Mwana jwa Mundu makamuigwa mumaboko ga bandu abakamu mabaja. 46Nnyinukange tujende. Atendakuika ojwapakung'aluka!”

Kupukiligwa kwa Yesu

(Maluko 14:43-50; Luka 22:47-53; Yohana 18:3-12)

47Yesu apakiba tango akalongela nabo, kingobucho ngaika Yuda, jumwe kati ja akinapunji komi na abele. Ngalongwana nabo bandu ajingi bina mapanga na imbonga. Abakiba batumigwe na akakung'i akolo na akananhota ba bandu. 48Mundu ojwapala kunng'aluka Yesu, akiba tayali aulaite kiingi nkengeni gwenio kulenga, “Mundu ojumbakunkumbatila ngajwenio. Mampukilange!”

49Yuda ngaunhwegele Yesu nu kulenga, “Aboli, kunchelile,” penia ngankumbatila.

50Yesu ngannengela, “Aganja, nkamule echinhwiki ukamula.”

Ngabaika kumpukila Yesu nu kummekanga mumakakala. 51Jumwe ja abakiba pamwe na Yesu ngatondabeya luboko, ngaucholomola upanga gwakwe, ngamputa mpakachi jwa Nkung'i Nkolo, ngaunheketa lichikilo. 52Yesu nganengela, “Mmuye upanga gwinu muala, gambu jwajoa ojwaputana ku upanga, mawa nu upanga. 53Bo, mmanyangiteje kube kabi nhotwi kajopa Awawa bango nabombe kingobu uchenje kabibanetile kikuta kikolongwa cha bandu komi na mabele cha akapakachi ba Nnoongo? 54Nambu ipakulenganila bo Majandiko Gachwapi eilenga kube nga apaipaligwa kube?”

55Yesu ngaulenge nkengeni gwa bandu, “Bo, unhwikilinge kumbukila kwa mapanga na imbonga anda ne napoki? Machoba goa nakiba Munyumba ja Nnoongo nakabola, na umbukalingeje. 56Nambu ganga goa gakamuligwe ibe Majandiko ga alondoli ba Nnoongo galenganile.”

Penia akinapunji boa ngabanneka, ngabatilanga.

Yesu nnongi ja akolongwa ba Libalacha lya Akayahudi

(Maluko 14:53-65; Luka 22:54-55,63-71; Yohana 18:13-14,19-24)

57Bandu benia ababampukila Yesu ngabampeleka kachakwe Kayafa, Nkung'i Nkolongwa, okwabakongana aboli ba Malagilo ga Musa na akananhota. 58Petulo ngankengama kutaali, mpaka mu uwa ja nyumba ja Nkung'i Nkolongwa, ngajingi unyumba pamwe na akalendei aibone ilebe pipakube. 59Akakung'i Akolongwa na Libalacha lya Akayahudi ngabajiga kupala malobe guwangi ibe bankome Yesu, 60nambu bapatangiteje lilobe lyalyoa, na bandu ajingi ngabaika ngabalenga malobe guwangi kujwenio. Ngabajomolela kuika bandu abena, 61ngabalenga, “Mundu ojo alengita kutenda, ‘Anhotwile kujibomo Nyumba ja Nnoongo nu kuchenga kabena kwa machoba matatu.’ ”

62Nkung'i Nkolongwa ngajema, ngankonya Yesu, “Bo, nnyangaje lilobe? Bandu aba batenda kunkopakea?” 63Nambu Yesu ngatama nuu. Nkung'i Nkolongwa ngannenge, “Nnapile ku Nnoongo ojwabi mmomi anda mwe nga Kilisto Nkomboi, Mwana jwa Nnoongo.”

64Yesu ngannyanga jwenio, “Elo mwe nnengite. Nambu nannengelanga mmoa, kutumbu ngoe mamammona Mwana jwa Mundu atamite kingonu cha kalelo cha Nnoongo juna uwecho, akaika mumaunde gu kumbengu!”

65Penia, Nkung'i Nkolongwa ngajwepula ngobo yakwe, ngalenga, “Atekuntukana Nnoongo! Tupaije akachaili! Nnyoaninge apantukana Nnoongo! 66Mangweto nhwachangabo?”

Angweto ngabannyanga, “Akweti malemwa apaligwa kuwe.”

67Kabe ngubunhwuni mata kumio, ngabamputa makopi. Bange kongo bakamputa makopi, 68ngabalenga, “Kilisto mutulengele beneke, abamputite!”

Petulo ankana Yesu

(Maluko 14:66-72; Luka 22:56-62; Yohana 18:15-18,25-27)

69Petulo akiba atamite panja kuua. Penia, mpakachi jumwe munkege ngannyendela, ngalenga, “Mwe uyo makiba pamwe na Yesu juku Galilaya.”

70Petulo ngakana nnongi ja boa akalenga, “Manyije echinnongela,” 71Apakiba akapita paniango, mpakachi jonge munkege ngammona, ngabalengela abakiba penia, “Mundu jwajo akiba pamwe na Yesu juku Nazaleti.” 72Petulo ngakana nukulenga, “Napila yene numanyije mundu jwenio!”

73Mwenakandaye kachoko, bandu abakiba penia ngabannyendela Petulo. Ngabannengela, “Kweli, mwe nga nabamwe kati ja angweto, gambu kilonge chinu kibonekana mwe mmoke ku Galilaya!”

74Penia Petulo ngatumbu kulapila kulenga, Nnoongo anhukumule anda nonge uwangi! “Numanyije mundu jwenio!”

Kingobu tu nkokoloko ngabeka, 75Petulo ngakombakela malobe galenga Yesu, “Tango nkokoloko nukubekaje, mpakungana patatu umanyije ne.” Ngapita panja ngaguta muno.

Currently Selected:

Matayo 26: NNQNT

ማድመቅ

Copy