Matayo 24

Yesu alongela kubomoligwa kwa Nyumba ja Nnoongo

(Maluko 13:1-2; Luka 21:5-6)

1Yesu ngaboka pa Nyumba ja Nnoongo, na apakiba akajabula, akinapunji bakwe ngabannyendelela, ngabannaya majumba genia kichenga chabachengite. 2Yesu ngabalengela, “Tela,” Nhwotolinge kugalolakea goa gano! Nannengela kweli, “Libije ata liganga limwe elipakuigala pamba panani ja lenge, kila kilebe makibomoligwa.”

Malago na kupotekigwa

(Maluko 13:3-13; Luka 21:7-19)

3Yesu apakiba atamite pikitombi cha Mizeituni, akinapunji ngabannyendela kukukiiya, ngabankonya, “Mutulengele ile yenje ipakube lii? Kiingi nike echikipakulaya kuika kwinu na kupela kwa mangobu?”

4Yesu ngabajanga, “Mma maha makakoloigwaje na mundu. 5Gambu ajingi mabapitila nukulongela kupetela kuliina lyango angweto balenga kila mundu, ‘Nenga nga Kilisto!’ Na angweto bapakaoya bandu ajingi. 6Mpakujoanga nhwalo gwa ngondo na manjega ga ngondo, nambu makaechukangaje, gambu genia mpaka gapitile, nambu kupela kwene kubi tango. 7Kilambo chimwe kipakuputana na kilambo chenge, kingwana chimwe kipakuputana na kingwana chenge. Pamba na papa papakube na njala na nendemelo ya lutope. 8Genia goa nga anda kutumbwa kwa kubinia kwa kupotola mwana.

9“Kabe bapampanga mpotakigwe nu ukomigwa. Ilambo yoa ipakunchimwanga magambu ga liina lyango. 10Kabe, ajingi bapakuleka mojo gwabe, bapakugalambuka nu kunchimwana. 11Bapakupitila akalondoli nduu ba uwangi abapakaoyanga bandu ajingi. 12Kwa magambu ga kube ubaja nnyingi, kupalana kwa bandu kuba kupunguka. 13Nambu ojwapakuimbalila mpaka kupela nga ojwapakomboka. 14Kabe Nhwalo Gwambone gu kingwana cha Nnoongo ubakutangachigwa padunia joa, kupala kuchalakicha ku bandu boa ba padunia, penia nga pukupakuika kupela.

Kulaga kukolongwa

(Maluko 13:14-23; Luka 21:20-24)

15“Pampa kukibona kilebe kibaja chikilengigwe na nnondoli Danieli kijemite paali pa Chwapi.” Ojwachoma amanya mana gakwe! 16“Penia, ababi kukilambo cha Yudea batililange kwitombi. 17Ojwabi pikinyanga cha nyumba jakwe akaulukaje kutola kilebe munyumba jakwe. 18Ojwabi kunng'onda akabujaje ukaja kutola lutando lwakwe. 19Bapakulaga akikege bina ndumbo na akinamama ababi ni ilemba eijonga machoba genia! 20Munnyope Nnoongo kutila kwinu kukabe machoba ga malilije andaje lichoba lya kupomalelaje! 21Gambu kingobu chenie kubakube na ukomo nkolongwa na gwanapitije tangu bapanganigwa bandu boa mpaka ngoe nupitije kabele. 22Machoba genia gakabi nu kupunguyaje, akabije mundu jwajwoa ju komboka, nambu Nnoongo atekupunguya machoba genia kwa magambu ga bandu abapambuligwe.

23“Anda mundu annengi, ‘Nno, Kilisto Nkomboi abi pamba!’ Andaje ‘Abi papa!’ Makanhwaminije. 24Gambu papakupiti makilisto buwangi na akalondoli buwangi. Na benia balayanga iingi ikoloikolo na yukuomongwa yakaoyanga bandu, ata kubandu abapambuligwe na Nnoongo. 25Mpenekia, nannengelinge tangu nukupitije.

26“Anda bannengi, ‘Nnolanga, abi kupongoti!’ Makajendaje kwenio, andaje, ‘Nnolanga, akiite unyumba!’ Makanhwaminije, 27Gambu andi njai pijimulika kuboka kumbwani mpaka kundonde, ngapipakube kuika kwakwe Mwana jwa Mundu.

28“Paali apubi ntui, ngapagakongana matumbui.

Kuika kwa Mwana gwa Mundu

(Maluko 13:24-27; Luka 21:25-28)

29“Kingobu tu kuboka pu kulaga kwenio, lichoba liba lubendu na mwei ung'alaje, ndondwa ibakugwe kuboka kumbengu, na makakala ga mbengu gabakutikatika. 30Kuboka penia iingi ya Mwana jwa Mundu iba kubonekana kunani, penia makabi goa gapadunia gapakuguta, apagapa kummona Mwana jwa Mundu akaika mumaunde gu kunani, juna makakala na kibumo kikolongwa. 31Jwombe apakakinga akapakachi bakwe kuboka kumbengu bina lipenga lina kujemba muno, bakongolange bandu abapambuligwe na Nnoongo, kuboka kujitumbwi dunia mpaka kujipei mbengu.

Maboulo ga nkongo gwa nkojo

(Maluko 13:28-31; Luka 21:29-33)

32“Mukibolange kikilandanakia na nkongo ntini. Kingobu ndambi yakwe pitumbu kututuba maamba, mmanya kutenda mangobu ga mauno gaike. 33Nu uyo mangweto pampakibona ilebe yenie yoa ikapitilaga, mmanya Mwana jwa Mundu abi papipi kuika. 34Nannenge kweli, lungolo londo lujebeleje nukupitilaje ilebe yenie. 35Mbengu na dunia maipeta, nambu malobe gango gapetaje ngu.

Abije jwalimanyi lichoba au kingobu

(Maluko 13:32-37; Luka 17:26-30,34-36)

36“Nambu nhwalo gu lichoba andaje kingobu abije mundu ojwamanyi kiika lii, na akapakachi bukumbenguje na mwanaje, nambu Awawa jika jabe nga abamanyi. 37Kuika kwa Mwana jwa Mundu kupa kube andi kingobu cha Nuhu. 38Gambu machoba genia tango na ghalikaje bandu batela kulye na kunywe, akinalome na akikege kutolana nu kubutuyana mpaka Nuhu pajingila nkati mu Ntumbwi nkolongwa. 39Bakibanga chebwe kiti kiba kupiti nike mpaka galika pijiika kajolanga boa. Yene ngipipakube Mwana jwa Mundu apapakuika. 40Kingobu chenie bandu abele ababi kung'onda, jumwe aitoligwa na jonge ailekigwa. 41Akikege abena bibaganga bakayaga okole, jumwe aitoligwa na jonge ailekigwa.

42“Nkelukiange, gambu milimanyije lichoba lyabapakuika Angwana binu. 43Akola nyumba bakamanyi kutenda mwihi abakuika kabi bakelukiye akijilekiteje nyumba jakwe jibomoligwe. 44Na yene mangweto uyo ntamanga maha gambu Mwana jwa Mundu abakuika kingobu changamanyika.”

Mpakachi juna mojo gwambone na jwanga mojo gwambone

(Luka 12:41-48)

45Yesu ngajendekea kulenga, “Meneke ojwabi mpakachi jwaaminike na jwambone na jwanga mwojo gwambone? Jwenio ananhota bakwe bammekite kachunga bandu bakwe bapegange chakulya kingobu echikipaligwa. 46Mbaya mpakachi jwajo jubapakunkolela ananhota mundu akakamula genia! 47Nannenge kweli, bapa kummeka mpakachi jwenio alolele ilebe yakwe yoa. 48Nambu anda mpakachi jwenio akilenge mwene, ‘Ananhota bango batenda kuchelwa kubuja,’ 49Penia ngatumbu kaputa akapakachi ajabe, ngatumbu kunywe pamwe nabandu abalobela, 50Ananhota mundu baika lichoba lyangamanyika na kingobu changamanyika. 51Ananhota bapa kunhweketa ipande nu kummeka pamwe na akabaja. Kwenio apakuguta nu kuyaga mino.

Currently Selected:

Matayo 24: NNQNT

ማድመቅ

Copy