Lizsij dih Gaihcij 34
34
Dijnaz ngaiz vunz gaemh
1Dijnaz dwg Liqyaq caeuq Yajgoz seng hih lwgsau. Miz ngoenz he, de ok bae yawjyawj gij vunzbaz dieg mwnq. 2Dieg mwnq miz boux he heuh Siqgiemq. Daxboh de heuh Hahmaz, dwg Hihveiq vunz, caemh dwg dang dieg mwnq hih daeuzdaeuz he. Siqgiemq yawjraen Dijnaz, couh rag dawz de, gaemh de. 3Siqgiemq raen Dijnaz gyaeu le, couh maez de, haenj de, caiq gangj vah ndei ma lox de, siengj aeu de ma guh yah. 4Yiengq Siqgiemq couh doiq daxboh de naeuz: “Boh hax, gouz mwngz siengj banqfaz aeu dahlwg Yajgoz ma hawj gou guh yah.”
5Yajgoz rox naeuz dahlwg de ngaiz vunz gaemh lo, hoeng, mwhde ngamqngamq luj gyoengq lwg de bae rogndoi dajciengx. De couh cang guh ngoemx mbouj rox, mbouj ok sing, daengj gyoengq lwg de ma le menh ngvanh.
6Gajlaeng, daxboh Siqgiemq couh daeuj laeng Yajgoz, bang daeglwg de cam yah.
7Gyoengq lwg Yajgoz rox gienh saeh neix le, cungj aeuqheiq hwj ij rai bae, couh daj rogndoi ma, nginhnaeuz Siqgiemq gaemh dahnuengx gyoengqde doiq aen gyahcuz Hijswzlez mingzdaeuz mbouj ndei, mbouj wnggai guh.
8Hahmaz caeuq gyoengqde cimciek naeuz: “Daeglwg gou haenj Dijnaz; cingj faenhsou hawj de haq hawj daeglwg gou guh yah bax! 9Gyoengqraeuz song aen minzcuz ndaej doxaeu hah, doxhaq hah; gij lwgsau faenhsou ndaej haq laeng raeuz, faenhsou caemh ndaej aeu gij lwgsau gyoengqraeuz. 10Yienghneix, faenhsou ndaej caeuq gyoengqraeuz doxcaeuq youq mwnqneix youq lo! Faenhsou haenj youq mwnqlawz cungj ndaej, seizbienh, caemh ndaej seizbienh guh seng'eiq, dajhai hah, dajcawx hah, cauh gya hah, guh gya hah cungj ndaej.”
11Siqgiemq caemh gouz daxboh Dijnaz caeuq gyoengq beixnuengx de naeuz: “Cijaeu faenhsou hawj, faenhsou siengj aeu gijmaz, raeuz cungj hawj gijmaz. 12Mboujguenj soengq laex geijlai cungj ndaej, gou cungj hawj. Cijaeu faenhsou hawj Dijnaz haq hawj gou guh yah couh ndaej lo.”
Gyoengq lwg Yajgoz doxyuk hwj ij bauqcaeuz
13Gyoengq lwg Yajgoz vihliux Siqgiemq gaemh dahnuengx gyoengqde, yiengq gyoengqde couh maixmingz guqiq coemx Siqgiemq caeuq Hahmaz, 14naeuz: “Gyoengqraeuz mbouj hawj dahnuengx raeuz haq laeng boux mijyaengz youq gwnz ndang heh geiqhauh goq hih law. Yienghmwnq daiq saetnaj gyoengqraeuz lo. 15Cizfeih faenhsou dapwngq gij diuzgyenq raeuz, couh dwg ndaw singz faenhsou sojmiz dih vunzsai caemh luj gyoengqraeuz ityiengh youq gwnz ndang heh di naeng he hwj guh geiqhauh, 16yiengq, gyoengqraeuz couh hawj gij lwgsau raeuz haq laeng faenhsou, gij lwgsau faenhsou caemh ndaej haq laeng raeuz. Gyoengqraeuz couh youq dieg neix caeuq faenhsou doxcaeuq youq, guhbaenz aen minzcuz he. 17Hoeng, hauhnaeuz faenhsou mbouj dungziq gij diuzgyenq raeuz nex, gyoengqraeuz couh daiq dahnuengx raeuz bae lingh mwnq, mbouj youq dineix youq lo.”
18Hahmaz caeuq daeglwg de roxnginh naeuz gyoengqde daez dih gij diuzgyenq neix caemh hab leuz. 19Aenvih Siqgiemq gig haenj Dijnaz, yiengq de couh majcangq ciuq gyoengqde daez hih yienghmwnq guh. Siqgiemq youq ndaw gyahcuz de dwg boux vunz ceiq soenhgingq he, 20yiengq, Hahmaz couh daiq daeglwg de Siqgiemq bae daengz baksingz, bae mwnq doiq gij vunz ndaw singz naeuz: 21“Gyoengq vunz daeuj laeng dieg raeuz youq hih hax, gyoengqde caeuq gyoengqraeuz doxhuz hwj, hawj gyoengqde youq mwnqneix youq lo, seizbienh hai cawx. Fanjcingq mwnq dieg neix caemh gvangq, ndaej gaeuq hawj gyoengqde youq. Gyoengqraeuz ndaej aeu gij lwgsau gyoengqde ma guh yah, gij lwgsau gyoengqraeuz caemh ndaej haq hawj gyoengqde guh yah.
22“Hoeng, gyoengq vunz neix miz gij diuzgyenq he, couh dwg naeuz gyoengqraeuz bietdingh ij ciuq gij diuzgyenq gyoengqde guh, gyoengqde cij haenj caeuq gyoengqraeuz doxcaeuq youq, bienqbaenz aen minzcuz he. Couh dwg gyoengqraeuz sojmiz dih vunzsai caemh caeuq gyoengqde sojmiz dih vunzsai ityiengh ij ngaiz youq gwnz ndang heh mwnq he hwj guh geiqhauh cij ndaej. 23Gyoengqraeuz dungziq bax! Dungziq le, gyoengqde couh caeuq gyoengqraeuz doxcaeuq youq lo. Yiengq daengz mwhde, gij gyadangq gyoengqde hah, doenghduz hah, mijyaengz cenznaengz cungj dwg gij raeuz liux haz?”
24Mwhde, famzsoj dajlwh baksingz haeuj ok dih vunz, cungj dingq gij vah Hahmaz caeuq daeglwg de, yiengq cenz singz sojmiz dih vunzsai cungj youq gwnz ndang heh mwnq he hwj guh geiqhauh lo.
25Gyoengqde ngamq heh ndaej daixsam ngoenz, song daeglwg Yajgoz, couh dwg song daeggo caeuq Dijnaz doxdaep saejndw he Sihmenj caeuq Liqveiq, domh gyoengq vunz ceiq in mwhde, song boux de cungj dawz giemq hwj haeuj singz bae, caegguk gajrai sojmiz dih vunzsai liux. 26Daiqlienz Hahmaz caeuq daeglwg de Siqgiemq caemh gajrai lo. Gajrai liux le, couh dajlwh ndaw ranz Siqgiemq daiq Dijnaz okma.
27Gajlaeng gyoengq lwg Yajgoz bae daengz ndaw singz, yawjraen gij vunzsai cungj ngaiz gajrai liux lo, couh duet aeu aen singz neix sojmiz dih doxgaiq. Gyoengqde couh dwg vihliux ij boixhaemz dahnuengx de youq mwnq dieg neix ngaiz vunz gaemh, 28couh duet aeu doengh gyoengq yiengz hah, cwz hah, duz lawz hah, 29ndaw ranz dijbauj dih doxgaiq hah, daiqlienz vunzbaz, lwgngez cungj ciengj. Mboujguenj ndaw reih cixnaeuz ndaw singz, sojmiz dih doxgaiq cungj ciengj aeu liux, vih dahnuengx gyoengqde boixhaemz.
Yajgoz gvaiq gij lwg de
30Gij saeh neix goq le, Yajgoz couh naeuz Sihmenj caeuq Liqveiq, naeuz: “Faenhsou lienzlih daengz gou, hawj gou youq mwnq dieg neix ngaiz gij vunz Gyahnamz caeuq gij vunz Bijliqsij dwgcaengz gou. Gyoengqraeuz vunz cix noix; hauhnaeuz gyoengqde miz saek ngoenz doxyuk hwj daeuj hoenx raeuz nex, gyoengqraeuz cenz ranz cungj ngaiz rairaeg raicied bae.”
31Hoeng, song boux de han naeuz: “Nanzdauh hawj gyoengqde yawj dahnuengx raeuz dangq lauxgawj maz?”
Currently Selected:
Lizsij dih Gaihcij 34: YBNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© New Bridge Publishing Company Limited
