Lizsij dih Gaihcij 32
32
Yajgoz lau Hijsauj
1Yajgoz vanzlij dwg giqcuz ganjroen. Daengz buenqbangh roen, gyoengq cai Cangqdiq daeuj yawj de. 2Yajgoz raen gyoengqde le, couh naeuz: “Gyoengq neix dwg gyoengq bing Cangqdiq!” Gajlaeng de couh heuh mwnq dieg mwnq heuh Majhahnenq. (‘Majhahnenq’ couh dwg ‘song aen gywnhyingz’ dih iqswh.)
3Yajgoz sien baij vunz bae Sih'wj (Sih'wj caemh dwg dieg Hijdungh), bae cimh daeggo de Hijsauj, ijsiengj lox hawj de hozroengz. 4De couh raengq gyoengqde naeuz: “Faenhsou doiq daeggo gou naeuz: ‘Bouxhoiq mwngz#32:4 Yajgoz yungh cungj vah neix ma sien hawj Hijsauj sim'unq le hozroengz, couh cwng Hijsauj bouxcawj, bonjfaenh dwg bouxhoiq. Yajgoz yienghneix naeuz: “Gou youq laeng Lahbanh doz youq, itcig daengz seizneix cij ma. 5Gou seizneix miz baenx gyoengq cwz, baenx gyoengq lawz, baenx gyoengq yiengz, caemh miz baenx gyoengq hoiq. Seizneix baij vunz daeuj naeuz bouxcawj gou ni; muengh mwngz mbouj yiem gou.”’”
6Gajlaeng doengh boux baij bae mwnq ma naeuz Yajgoz ni, naeuz: “Raeuz bae daengz daeggo mwngz mwnq, raen de daiq baenx seiqbak vunz yiengq mwngz mwnqneix daeuj.”
7Yiengq Yajgoz cungj lau hwj dungxmbouq ndangsaenz heiq memmem liux, vaiqdi hawj gij vunz caeuq doenghduz cungj faen baenz song buek hwj. 8De gag naemj naeuz: “Hauhnaeuz Hijsauj daeuj hoenx buek he nex, vanzlij lw buek he ndaej riq deuz.”
9-10Gajlaeng, Yajgoz couh gouz Cangqdiq naeuz: “Cangqdiq hax, [9c]mwngz gaxgonq raengq gou hawj gou maj dieg daxboh gou caeuq gij beixnuengx gou mwnq bae, vanzlij dapwngq doiq gou ndei. [10]Hoeng, gou dwg bouxhoiq mwngz hah, saedsaeh mbouj boiqndaej mwngz soj doiq gou dih aiq caeuq mwngz doiq gou gangj vah gw vah dih yienghmwnq. Bi mwnq, ndaw fawz gou caenhgag miz diuz faexdwngx he goq diuz dah Yozdanq, hoeng seizneix, miz baenx song buek vunz caeuq doenghduz he ma. [9b]Cangqdiq hax, mwngz siengzseiz cauqguq daxgoeng gou Yaqbwzlahhanj caeuq daxboh gou Hijsaj. 11-12Seizneix mwngz caemh ij ndaejgeiq mwngz doiq gou naeuz goq, naeuz: ‘Gou ij baujhuq mwngz, hawj doengh daih gajlaeng mwngz fatdad lai luj gij sa henz haij ityiengh, hanz geq cungj geq mbouj rox liux.’ [11]Yiengq gou seizneix gouz mwngz gouq gou daj ndaw fawz daeggo gou duet okma, aenvih gou lau de daeuj gaj gou, daiqlienz gij lwglwg yahyah gou cungj caemh ngaiz de gaj.”
13Ngoenz mwnq doengxhaemh de couh daj gij doenghduz de aeu mbangj okdaeuj guh laex, soengq hawj daeggo de Hijsauj: 14yiengzbyameh miz songbak duz, yiengzbyadaeg miz ngeihcib duz; menzyiengzmeh miz songbak duz, menzyiengzdaeg miz ngeihcib duz; 15caiq miz samcib duz lozdozmeh vanzlij daiqnauq lienz lwg he; cwzmeh miz seiqcib duz, cwzdaeg miz cib duz; lawzmeh miz ngeihcib duz, lawzdaeg miz cib duz. 16De dawz doengh duz neix it cungj faen it gyoengq okdaeuj, caemh hawj it bouxhoiq guenj it gyoengq, caiq doiq gyoengq hoiq de naeuz: “Faenhsou bae gaxgonq; gyoengq caeuq gyoengq ij gek miz duenh roen he hwj.”
17De caiq raengq bouxhoiq byaij ceiq daixdaeuz he naeuz: “Hauhnaeuz daeggo gou raen mwngz, cam naeuz: ‘Mwngz dwg vunz ranzlawz? Bouxcawj mwngz dwg bouxlawz? Mwngz ij bae mwnqlawz? Gyoengq doenghduz dangqnaj mwngz dwg gij bouxlawz?’ 18yiengq mwngz couh naeuz: ‘Dwg bouxhoiq mwngz Yajgoz; de ij dawz gij neix ma guh laex soengq hawj bouxcawj de Hijsauj. De caemh daeuj hwj; de byaij youq gajlaeng raeuz.’”
19Gajlaeng Yajgoz caiq raengq doengh boux duq doengh gyoengq gajlaeng he naeuz: “Faenhsou raen Hijsauj nex, caemh ij yienghneix doiq de naeuz. 20Vanzlij ij naeuz: ‘Bouxhoiq mwngz Yajgoz daeuj gajlaeng.’”
Yajgoz yienghneix guh dwg aenvih de gag naemj: “Gou sien yungh gyoengq doenghduz neix ma guh laex soengq hawj de, lox de, daengj de hozroengz mbouj haenq le, gou menhcij bae caeuq de raennaj; saekseiz de caemh nyiuz gou nej.” 21Couh yienghneix, Yajgoz couh hawj gyoengq hoiq duq gyoengq doenghduz bae gaxgonq; bonjfaenh de vanzlij youq ndaw yingz youq haemh.
Yajgoz ndaej coh moq
22Ngwnz mwnq Yajgoz hwnq le, couh sien daiq song mehyah de caeuq song meh yahnoix de caiq cib'it daeglwg de dangh goq diuz dah Yajboz bae. 23De hawj gyoengqde sien goq bae le, gajlaeng lij lw dih vunz hah, doxgaiq hah, doenghduz hah cungj caemh goq bae liux lo. 24Lij gag lw Yajgoz youq gajlaeng.
Sawqmwh miz boux he daeuj caeuq de doxbanj; song boux de banj hox, banj hox, banj daengz ranz fuemxluemj. 25Gajlaeng boux mwnq raen bonjfaenh banj mbouj goq de, couh youq daj saivaq roengz ma dih duq ndok mwnq dub mbat he, yiengq gij ha de couh ngaiz gyoeg lo.
26Boux mwnq naeuz: “Ranz ij rongh lo; coengq gou veiq!”
Yajgoz han naeuz: “Mwngz mbouj hoh fuk hawj gou, gou couh mbouj hawj mwngz bae.”
27Yiengq boux mwnq cam naeuz: “Mwngz heuh maz coh?”
Yajgoz han naeuz: “Gou heuh Yajgoz.”
28Gajlaeng boux mwnq naeuz: “Daj seizneix hwnj, gij coh mwngz mbouj caiq heuh Yajgoz laem lo; ij heuh Hijswzlez, aenvih mwngz caeuq Cangqdiq caeuq vunz doxbanj cungj ndaej hingz.” (‘Hijswzlez’ couh dwg ‘boux caeuq Cangqdiq doxbanj’ dih iqswh.)
29Yajgoz cam naeuz: “Cingj mwngz naeuz gou ni, gij coh mwngz heuh maz?”
Boux mwnq han naeuz: “Mwngz ij cam gij coh gou ma guh maz?” Gangj sat le, couh youq mwnq hoh fuk hawj Yajgoz lo.
30Gajlaeng Yajgoz couh heuh mwnq dieg mwnq heuh Biznujihlwz. (‘Biznujihlwz’ couh dwg ‘naj Cangqdiq’ dih iqswh.) De naeuz: “Gou ndaej naj doiq naj raen Cangqdiq, hoeng diuz mingh gou vanzlij ndaej baux!” 31Yajgoz daj Biznujihlwz okdin bae hih mwhde, gyangjngoenz ngamqngamq hwnj. Aenvih gij ha de ngaiz gyoeg, byaij roen vaij ngwtngat ngwtngat. 32Yiengq gij vunz Hijswzlez vih gijnenq Yajgoz dih gienh saeh neix, itcig daengz seizneix cungj mbouj gw doenghduz hih duq ndok mwnq caeuq gij nginz de.
Currently Selected:
Lizsij dih Gaihcij 32: YBNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© New Bridge Publishing Company Limited
