Mateo 2

Sen nchekuanxin nchanotsé kuitsjeꞌe xa xjan Jesús

1Tjajna Belén tikinixinꞌen Judea, ntiꞌa jongíexin ndo Jesús. Nchakon meꞌe bakeꞌe naa xi rey bakinꞌin Herodes, xi meꞌe bakituanꞌan ntiꞌa. Nchakon meꞌe kui̱i̱ kaxin sen tsango noꞌe nchekuanxin nchanotsé. Sen meꞌe kui̱xi̱n sen ndatsjonxin chjuya. 2Ko juanchangi sen:

―¿Ti no jii xjan tsijongíꞌe xjan rey tsetuenꞌen ni judío? Ixi bikona nchanotsée xjan ndatsjonxin chjuya, ko juiꞌina ixi tsajonna juasaya#2:2 juasaya respeto, honor ngajin xjan.

3Ko xi rey Herodes kuinꞌen xa meꞌe, juincheꞌa xa juaxruxin ko kaxon kain ni tjajna Jerusalén. 4Tjumeꞌe xi rey Herodes kuiyeꞌe xa sen taana ícha tetuanꞌan ko kain ni tjako ley, ko juanchangiꞌe xa na̱ ixi no xrojongíexin ndo Cristo. 5Jeꞌe na̱ juatingíexin na̱:

―Jeꞌe xjan tsjongíexin xjan tjajna Belén tikinixinꞌen Judea, jaña tsikjin sen kuanichjaxin chijnie ndo Dio ó saꞌó:

6Jaꞌa tjajna Belén nunteꞌe Judá,

á jeꞌa jaꞌa naa tjajna ícha nchíín

ngakjenꞌen ikaxin tjajna ícha ijié,

ko ntiꞌi tsachrjexin naa ngisen ícha tsetuanꞌan, ko jeꞌe ndo tsayakonꞌen ndo tjajnána Israel.

7Tjumeꞌe xi Herodes imao kuiyeꞌe xa sen nchekuanxin nchanotsé ko juanchangi xa ngisa konoxin nchanotsé. 8Ko tjumeꞌe ndachro xa:

―Itjinta Belén, ntiꞌa tjanchangínta ixi ichjan meꞌe, ko ti no tsinchíinta xjan, nchenónanta ixi janꞌan kaxon itsji ngajin xjan tsajon juasaya.

9Ko sen nchekuanxin nchanotsé kuinꞌen sen ngeꞌe ichro xi rey ko sakuintekji sen ko nchanotsé bikon sen meꞌe kuitaoꞌen sen ntiꞌa ko tjumeꞌe kuíxin nchanotsé ngataꞌa ti no jii jeꞌe xjan. 10Ko sen nchekuanxin nchanotsé tsango chéꞌe sen ixi bikon sen no bakeꞌe nchanotsé. 11Ko hora kuixinꞌin sen nchia ko bikon sen xjan jikao xjan jan María, janée xjan, bakeꞌexin ntatuchiꞌin sen, kuajon sen juasaya ngajin xjan ko kuantjeꞌe sen nta̱baúl tsikikaꞌo sen ko kuajon sen chika oro ko tsjo xraxe ko xro̱a̱n mirra. 12Ko tjumeꞌe koxienxin sen ixi íxrokjanꞌi sen ti jii xi Rey Herodes. Méxin, kua sen inaa chaꞌo, sakjui sen tjajnée sen.

Sabinga sen tjajna Egipto

13Ko nchakon sakuintekji sen nchekuanxin nchanotsé, tjumeꞌe naa ndo ángel neꞌe Ncháina konoxin ngaya kotáchrién ndo José ko ndachro ndo ángel:

―Tingatjen, satikoꞌa ichjan ko janée xjan, satjinta tjajna Egipto. Ko ntiꞌa tinteenta ti xrondachrja̱njan janꞌan, ixi xi Herodes tjaun xa tsenꞌen xjan.

14Tjumeꞌe ndo José kuaya ndo ko sabikao ndo ichjan ko janée xjan, tiie meꞌe kua sen chaꞌo sakjui sen tjajna Egipto. 15Ntiꞌa bakeꞌe sen, kuenjan xi Herodes. Jaña konꞌen ixi jaña tsichronga sen kuanichjaxin ndo Dio: “Tjajna Egipto bakeꞌe chjanꞌna ko janꞌan kuiyaꞌa xjan.”

Xi Herodes kuetuanꞌan xa ixi tsenꞌen ichjan

16Hora konoꞌe xi rey Herodes ixi sen nchekuanxin nchanotsé íkjanꞌi sen xranchi kuetuenꞌen xa sen, meꞌe xi Herodes tsango koñao xa ko kuetuanꞌan xa ixi tsenꞌen kain xjan xi, xjan xrachóndaꞌi yuu nano ste tjajna Belén ko xjan ste ngandeꞌe tjajna kaxon. Jaña kuetuanꞌan xa ixi jixraxaon xa ngeꞌe ndachro sen nchekuanxin nchanotsé. 17Jaꞌin konꞌen ixi ti tsikjin ndo Jeremías, ndo kuanichja chijnie Dio, nchakon tsindachro ndo:

18Jaꞌin kuinꞌen chujni tée naa sen nichjaxin tjajna Ramá,

tsango kuyako sen ko tsango tsjanga sen.

Meꞌe nchri Raquel jitsjangaxin chjenꞌen nchra.

Ko tjaunꞌa nchra ixi xrojan ngisen sinchecháxin nchra ixi ó tsikintekenꞌen chjenꞌen nchra.

Jaña jitaxin xroon.

Kjanxin sen tjajna Egipto

19Ntiꞌa kuintee sen tjajna Egipto kuenjan xi Herodes ko naa ndo ángel neꞌe Ncháina konoxin ndo ngajin ndo José ngaya kotáchrién ndo ko jaꞌin ndachro ndo:

20―Tingatjen ko satikoꞌa ichjan ko janée xjan, ikjannta tjajna Israel ixi ó ndakuenꞌen ni tjaun xrokóña xjan.

21Ko tjumeꞌe ndo José kuaya ndo ko sabikao ndo xjan ko janée xjan tjajna Israel. 22Ko konoꞌe ndo José ixi xi Arquelao, chjenꞌen xi Herodes, tetuanꞌan xa nunte Judea, ti baketuanꞌan ndotée xa, xronka ndo José ixi xrokjui ndo ntiꞌa. Ko ixi tsichronga ndo Dio ixi kotachrin, méxin sakjui sen nunte tikinixinꞌen Galilea. 23#Mr. 1:24; Lc. 2:39; Jn. 1:45.*Ko tjajna ndatinꞌin Nazaret, ntiꞌa kuintee sen. Jaña konꞌen ixi jaña tsichronga sen kuanichjaxin ndo Dio ó saꞌó ko tsindachro sen ixi ndo Jesús xrojuinchekinꞌin na̱ ndo nazareno.

Currently Selected:

Mateo 2: ppsNT

ማድመቅ

Copy