SAN LUCAS 1

Pu'a'tayniy

1Ixluwk'ancha yu ta'a'taynita tats'o'a tani laktapasalhcha an tanlhun yu k'atsayaw kitnan li sawalh, 2tacha an kintalakmasunin yu la ixla'chulhk'an tala'ts'ilh akxni a'taynichalh. Chi mu yu'uncha jalhimap'a'sikalh li katalaknawlh an chiwinti, 3kit'in wachu oxi iklhiwilay, mu oxicha ixlak'anti iklhakapu'alh chux an tanlhun, tanchuncha pu'a'taynichalh. Pus chawayi Teófilo uxint'i mu ayk'at'i lapanak akts'o'niyani ixlakata ani tanlhun tanischa yu pu'aklaminchalh. 4Para li oxi k'ak'ats'at'i an yu sawalh t'ach'a an masunik'ant'acha.

Jamak'atsaanininkan istsukut jama'paxanaj Juan

5Akxni ixjunita rey an Herodes, xalakaat'un Judea, ixt'ajun pumatam sacerdote ixjunkan Zacarías ixjat'atala'xt'o'a an Abías. Chi yu ixt'iwi ixjunita Elisabet ixjunkan, ixt'alalhila'ts'i an Aarón. 6An ixt'uyunk'an oxi ixtat'ajun la ix'ukxlakapu an Dios, chi ixta'ilhtuy sawalhi an ixlamap'a'sin an Dios chi yu ixjalhijuniy kata'ilhtulh, pus jantu xamati lay tu'u ixjalhimuk'ay. 7Pero jantu ixtalhit'ajuniy ixjas'at'ak'an, mu an Elisabet jantu lay ixjamas'at'anan, chi an ixt'uyunk'an laj'ajincha ixtajunita.

8Walh milh wilhchan akxni yucha an Zacarías ixtapatsat'ajun ixlisacerdote la ix'ukxlakapu an Dios, chux ali an yu ixjat'ata'ayxt'o'a, 9ta'amanalh suerte chi yucha la'cha'alh li kala'xawalh an cencia, tacha ixtalhilaniycha an sacerdotejnin. Pus tanulhcha an Zacarías tan wa lhilakatijtam ma'axta'nikan lha'ulan an Dios. 10Chi chux an lapanakni ma'spacha ixtatapaynit'ajun akxni ixla'xawat'ajuncha an cencia. 11Walh talakasunilh pumatam ix'angelh an Diosi an Zacarías, sa'cha ixyalh tan oxi ixpa'xti an tan ma'axta'kan lha'ulan tan ixla'xawat'ajun an cencia. 12Pus an Zacarías akxni la'ts'ilh an angelh talhanalh. 13Pero an angelh juniy an Zacarías:

―Zacarías, jant'u k'at'alhan, mu amintapaynit asmatnik'acha, chi amint'iwi Elisabet kaxta'niyan pumatami mints'alh, Juan k'a'ulaniya'a ixta'a'ut. 14Sawalhcha oxi k'alhiwilaya'a, k'a'ach'ana'a, chi ixluwk'ani yu sawalhcha katalaj'achana akxni katsukuyacha. 15Mu ayi kajuna la ix'ukxlakapu Dios. Jantu kati'otlhi xaxkan uva chi k'uch'u, sawalhcha kalhitsukuya an ixTakuwin Dios, masi palaktajunka an ixnati. 16Ka'ilhtuya li ixluwk'an an jamacha'an Israel, katakiklaka'ilhi an Dios, yu ixJamach'alhkatk'an. 17Chi an Juan katap'ulhniya an Cristo kalhichiwinina an ixchiwinti Dios la ixTakuwin an Dios, chi la ix'alhp'asninti an Elías, para li an xalakpaynin katat'ala'oxamixnicho'olhcha an ixjas'at'ank'an, chi an yu jantu k'is taja'asmatnan kataja'asmatnalhcha tacha an yu taja'asmatnan, para li akxni kachina an Jamach'alhkat taja'asmatnancha kajala'china'.

18An Zacarías juniy an angelh:

―¿Tasucha aklhik'atsaalh li sawalhi an yu k'i'uniya? Mu kit'in ik'aycha chi an kint'iwi wachucha ay.

19An angelh alhtaylh juniy:

―Kit'in ijGabriel, la ix'ukxlakapu an Diosi ikt'ajun. Yucha kimala'achatachalh para li akmin mak'atsaaninin ani laj'oxi chiwinti. 20Ch'away jant'u lay k'at'ich'iwin, sta akxni chunchacha katapasaya', mu jant'u k'ink'iklak'a'it'i tacha an ijkunan li katapasaya akxni kachinacha ixpanch'e'ex.

21An lapanakni sa'cha ixtapakxanta an Zacarías, jantucha ixtalhimacha'xayi tuchini jantucha so'oj ixlitaxtuy an laka tajtan. 22Walh akxni taxtulhcha, jantucha lay ixjaxa'alay, pus talhimacha'xanilhcha li tu'u talakasunilh an laka tajtan. Wa ixjatamakyawniycha, chunchacha taylhi'alh jantucha lay ixchiwiniy.

23Akxni la'tsalhcha wilhchan yucha ixtapatsat'ajun ixlisacerdote, ancho'olhcha ixcha'a'. 24Ixli'astan an Elisabet an ixt'iwi an Zacarías, ja'aynalhcha, pus la'akisi malhkuyu jantucha ixtaxtuy la ixcha'a', ixnajun: 25“An Dios oxi lapanak, chaway kima'osunilhcha an maxanti xaklhit'ajun la ix'ukxlakapuk'an an ali'in.”

Jamak'atsaanininkan li katsukuya an Jesús

26Ixlila'achaxancha malhkuyu, an Dios mala'achalh an ix'angelh yu junkan Gabriel tanchun la'acha'an xalakaat'un Galilea junkan Nazaret, 27tan ixwilh pumatam jatsi ixjunkan María, jantuka' ixt'atsukukan, pero isk'in'ulakantacha pumatam ts'alh ixjunkan José, ixt'alalhila'ts'i an rey David. 28Pus an angelh tanuchalhi tan ixwilh an María, juniy:

―¡Sawalhch'a map'aynik'an! An Dios lhistaktan, [chux tacha an tat'ajun an t'akunin, uxint'i sawalhch'a oxi la'ts'ink'an.]

29Akxni chunchacha alha'asmatlhi chi chunchacha la'ts'ilh an María an angelh, jantucha ixlimacha'xaniy tuchi jala'axa'alanticha tacha an junilh, ixtalhanancha. 30Pus an angelh juniy a María:

―Jant'u k'at'alhan, mu an Dios oxi lhiwilayan. 31Chaway k'ap'akxana'a mijas'at'a, k'alhits'uk'uya'a pumatam mints'alh, chi k'a'ulaniya'a ixta'a'ut JESÚS. 32Yucha ay lapanaki kajuna', chi isTs'alh yu wilhchalh talhmani kajunkana'. An Jamach'alhkat Dios, Reje ka'ilhtuya tacha an David yu ma'anchacha ta ixlila'ts'in. 33Yucha ixpujun'alhincha kajach'alhkatnaniya an ixlapanakni Jacob, jantu a'tam katimin'olhi an ixlich'alhkat.

34Wa chuncha an María alhtaylh an angelh juniy:

―¿Pero tasicha li jantuka' ikt'at'awkani?

35An angelh alhtaylh juniy:

―Yucha an Stalan'a Takuwini kala'chinan, chi an ix'alhp'asninti an yu wilhchalh talhman Dios kamatanchaniyan la ixma'stele', xliyu an stalan'a jas'at'a katsukuya, isTs'alh Diosi kajunkana'. 36An mint'alalhila'ts'i Elisabet, an yu ixtajuniy li jantu lay jamas'at'anan wachu kalhitsukuya pumatam ists'alh masi yucha nanacha, la'achaxancha malhkuyu chaway yucha pakxanta. 37Mu an Dios yucha jantu tu'u yu jantucha lay ka'ilhtulh.

38Pus akxni an María najun:

―Kit'in ixma'tsuku an Dios. Kachajcha walhi la kijatsukunti t'ach'a an k'i'uniy.

Pus an angelh akxni ancho'olhcha.

An María la'pixiyalhnan an Elisabet

39Alhcha lakats'uniya panch'e'ex, an María sawalhcha so'oyi alh tanchun a'stitawk'a la'acha'an, xalakaat'un Judá, 40walh tanuchalhcha la ixcha'a an Zacarías, pus la'axa'alaycha an Elisabet. 41Walh akxni asmatlhicha an Elisabet li la'axa'alay an María, an ixpalaktajun ixjas'at'a an Elisabet jalht'ujnulh. Chi wanajcha la'tanu'olhi an Elisabet an Stalan'a Takuwin, 42pus p'ascha chiwiniy najun:

―Chux an t'akunin, uxint'i sawalhch'a map'aynik'an chi an palaktajuman mijas'at'a. 43¿Tasu li kit'incha kila'minta pixiyalhna an ixnati kiJamach'alhkati? 44Mu wa tacha ik'alha'asmatni k'ila'axa'alat'i, sawalhcha achaniy jalht'ujnulh la kimpalakni an jas'at'a. 45Sawalhcha oxi para uxint'i li k'iklak'a'it'i yu junin an Dios, mu chuncha katapasaya'.

46Wa chuncha an María najun:

La kintak'atsaan ijkuniya an Dios li yucha ay.

47Chi an kiJama'alhtaxtunuj Dios ma'an'achayi an kintakuwin,

48mu yucha lhakapu'alhi masi wa ixjakilhpatinij ma'tsukucha.

Chaway, sta chaway chux tacha an kala'aw'ankana

katanawna li sawalhcha oxi yu ikputapasalh.

49Mu an yu lay ilhtu'ojoy wa tuchicha,

laj'ay tanlhuni pu'ilhtut'ajun an kijatsukunti.

Yucha Stalan'a junkan.

50Chi tacha an la'aw'ankanta yucha si mapayniya yu kiklaka'iy.

51Yucha laj'ay tanlhuni ilhtulh la ixmaka'.

Ilhtulhi li jantu kawalhi tacha an ixtapast'ak'a an yu wa talaj'ayajk'atsay.

52Jamaxtunilhi an ixlich'alhkatk'an an laj'ajin jamach'alhkatni,

yu'uncha an wa tajakilhpatinijk'atsayi xalaj'ajin ja'ilhtulh.

53An yu ixtalakchawaniy jaxta'nilhi yu ixtama'lhtask'iniy.

Chi an jamatuminin wanaj jamaxtuni'olhi ixtanlhunk'an,

wachunchacha jamala'achacho'olh.

54Ja'a'tayjulhi an jamacha'an Israel, yu'uncha tacha ixma'tsukunin,

jantu kapmaj'alhi an ixjamapayninti

55tacha ixjajunita an kilakpaynink'an.

Masunikalhcha an jamapayninti an Abraham chi an yu

katapu'a'p'un'ana', mu ixpujun'alhincha.

56An María t'atamakawlhi an Elisabet la ixcha'a ka tacha la'at'utu malhkuyu'. Ixli'astan ancho'olhcha la ixcha'a'.

Tsukulhcha an Jama'paxanaj Juan

57Akxni cha'alhcha wilhchan lhitsukulh ixjas'at'a an Elisabet, ts'alhi lhitsukulh. 58Chi an yu waniy ixjat'awilh chi an ta ixjalhila'ts'in talakcha'alhcha akxni tak'atsaalh, sawalhcha tat'alaj'achan, mu an Dios masunilhi an Elisabet an ay ixjamapayninti. 59La'atsajincha wilhchan cha'alh, talhi'alhcha an jas'at'a tan akaxwililich'uk'up'uxkalh ix'a'axt'a'a. Chi tacha an junkancha ixpayi ixtalhimapa'a'uputun, ma Zacarías. 60Pero an ixnati jajuniy:

―Jantu, jantu chuni junkan, kajunkana Juan.

61Pus ta'alhtaylh tajuniy:

―¿Tasu'u? Jant'u xamat'i t'a lhila'ts'in yu chuncha junkan.

62Pus wa chuncha tatamakyawniycha an ixpay an jas'at'a tani jumputuncha yucha. 63Yucha jask'inilh lakat'ikt'i lht'a'alak'iw chi anchacha ts'o'lhi, najun: “Juan, junkan.”

Pus sawalhcha ixtalhi'a'niy. 64K'ak'i 'it an yu onta cha ja s'a t'a to ro chi k'am a' ni t'it cha, kala k'uyaw, ka'ilh tuyaw k'a tan. 65Ixchuxk'an an yu waniy ixjat'awilh sawalhcha ixtalaktalhanan, chi ta ixlijalhi'ay an ixla'a'a'stitawk'an Judea ixlaknawkancha tacha an tapasalh 66Yu ixta'asmat'a ixtapast'ak'a:

―¿Tisuncha ixlijunti kajuna ani jas'at'a?

Mu an Dios ixlistakta an jas'at'a.

An Zacarías nawlhi yu katapasaya'

67An Zacarías, an ixpay an jas'at'a, la'chilhi an Stalan'a ixTakuwin Dios chi manawnilhi yu katapasaya', najun:

68Lhimala'puchajuncha an Dios ixJamach'alhkat Israel,

mu jala'pixiyalhnalhcha an ixlapanakni, chaway jama'alhtaxtulhcha.

69Kintamakminincha pumatami yu lay jama'alhtaxtunun,

pumatam yu ta lhila'ts'in an David, an ixma'tsuku Dios.

70Tacha an ixjamanawnita an la'stalan'an ixlapanakni

yu ixtalhichiwiniy ixchiwinti ma'anchacha,

71li akintamala'xtinuniyani an yu sawalh kintaxkayan

chi an yu jantu k'is kintala'ts'imputunan.

72Li kapast'ak'a tacha an ixjat'atamakajunta laka laj'oxi ixchiwinti an yu japu'a'p'unmincha'aw,

li kajalhi'a'tayjuya'.

73An kimpayk'an Abraham jurarlanikalh, tan junkan:

74Li ka'ilhtuya an Dios katsukuyaw jantucha xamati akintitaxkayajla'ts'in,

li kinta'achaninchak'ani kat'atapatsayaw,

75laka la'stalan'a jatsukunti chi laka laj'oxi lanti la ix'ukxlakapu',

chux wilhchan la kijatsukuntik'an.

76Chi uxint'i kints'alh, uxint'i kapuchiwininan an yu talhman wilhchalh,

mu k'at'ap'ulhniya'a an Jamach'alhkat para li k'ala'oxinin an ixtij.

77K'ajamak'ats'aaniya'a an ixlapanakni

li yucha jamala'mixiniya ixtala'alhink'an para li katata'alhtaxtulh.

78Mu an kiDiosk'an ay jamapayninti lhit'ajun,

an lakt'iyan la'atam jatapulhkunu akintamapulhkuniyan.

79Kajamapulhkuniya an yu lakaaputs'isni tat'ajun

chi an yu la ixma'stele' lhinin tat'ajun.

Akintapulhi'anani tan oxi tij.

80An jas'at'a tacha ixta'ayay, wachu palay k'ut'ilhi ixjun la ixtakuwin. Chi tan jantu la'acha'ani ta'ayalh sta akxni tsukulhcha jalhixa'alay an ixchiwinti Dios an israelitajnini talakasulh tan lhilhuw.

Currently Selected:

SAN LUCAS 1: tpp

ማድመቅ

ያጋሩ

ኮፒ