TAUNET 8
8
Kogesugei Maraneet
1Ki ibwaat anyun `Kamuktaindet Noah, tyong'ik che po timiin ak kiyagiik tugul che ki mi tugul eng' moinget. Ak ki iyookyi Kamuktaindet usoonet ne ki usyi ng'wony, ak ki toi koteenyo peek. 2Kigerogis kong'iik che kutune peek che po rireet ak che punu peek eng' kipsengwet ak kegirinda ropta eng' soet parak. 3Ki testai koteenyo peek eng' ng'wony kot ko kingo kesugei peetuusyek pogolu ak konom, ko kagong'ering'itu miising'. 4Ki tonon moinget eng' arawetap tisap, peetuut ne po taman ak tisap eng' tuloonoogap Ararat. 5Ki ng'ering'itu peek miising' kot ko eng' arawetap taman peetuut ne po tai, kotook tuloonook.
6Ye kingo pata peetuusyek artamu, koyaat Noah tirisyetap moinget 7ak koyookto chepkugit. Ki tirirenot kot koteenyo peek eng' ng'wony. 8Ki iyookto cheptuget agine, si kobiit kogeer ngo kagong'ering'itu peek eng' emet komugul. 9Ki ma nyoor cheptuget ole namei ak komung'ee amu kita komi peek emet komugul, koit koweekyigei Noah eng' moinget. Ki iyogoito Noah anyun eunnyi si konam konyo moinget oriit. 10Kita kotebi peetuusyek alak tisap, yeityo komaanda kogeny cheptugonooto eng' moinget. 11Ki week cheptugonooto eng' koskoleny koibune kutinnyi sogoot ne tuon; ak ki nai Noah anyun kole teng'oti peek. 12Ki tebi Noah peetuusyek alak tisap, yeityo komaanda cheptugonooto kora; ak mata koweek kogeny.
13Kingo po Noah kenyiisyek pogol lo ak agenge eng' arawetap tai, eng' peetuut ne po tai, ko kiteenyo peek anyun eng' emet. Ki isto Noah anyun tuguuk che kiga kisyebe moinget, ak kogeer ak konai kole kagosai emet. 14Ki yaam emet eng' arawet ne po aeng', eng' peetuut ne po tiptem ak tisap. 15Ki ng'at `Kamuktaindet Noah koleenji, 16“Mandee eng' moinget, inyee ak chebyoseng'ung', ak weeriiguk ak kwonyiikwak. 17Yaatu komong' tyong'ik tugul che saptos che mi kobooten; toriitik, kiyagiik, ak tugul che ichuutegei ng'wony, si kobiit koba koiiyo, kochang'a ak kotesagis eng' ng'wony.” 18Ki manda anyun Noah ak weeriikyik, ak kwondonyi ak chebyosogap weeriikyik. 19Ki manda eng' moinget tyony age tugul, tugul che ichuutegei ng'wony, toriit alak tugul ak tugul che pendote ng'wony ko uu piiteennywa.
Kogoitoi Noah konunoik
20Kiteekyi `Noah Kamuktaindet ne Toroor kaptisisyet, ak konam koip eng' tyony age tugul ne tiliil ak eng' toriit age tugul ne tiliil ak kogoito koek konunoik che kibeelei eng' kaptisiisyo. 21Kingo ng'uuchi `Kamuktaindet ne Toroor anyinyindo kobun kaptisiisyo, kotil ineendet eng' muguleldanyi kole, “Ma achube ng'wony kogeny agobo chii amu yaacheen kabwaatutigap muguleldap chii kobooch koming'in. Ma abare tuguuk tugul che saptos kogeny agoi ko uu ye ki ayai. 22Kotee kota komi ng'wony, koma pegu koolset ak kesisyet, kaitityet ak kiptoret, kemeut ak iwot, peet ak kemoi.”
Currently Selected:
TAUNET 8: KAPR
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
©Bible Society of Kenya, 2019
