A’NPHUTNA 7
7
Tuishânglen
1 Rōngpu’n Noah hneng, “Rakōng shunga na-innkō akhenga hlut jo ruh; raleichung pumpuia nang rōk hi akadik katlo che kae ti hi ke’n kahmu sōt jo. 2Beklanga a’ntheng ranhring apui ache kop 7 ṭim khana a’nthengmak ranhringhei chu apui ache kop khat ṭim mantluk roh. 3Khavahei leh inṭhōia vate apui ache ajât kop 7 sâm inkhat um mantluksa roh. Khahei khan raleichunga sa leh te antamajōr sik kae. 4Sûn leh jân kani 40 katlung bit a tuninga inphut ni 7 sō leh raleichung pumpuia khō kamansûr sik jo kae. Raleichunga ke’n kasyem rathla kanei akahring rakip kaman rampet sik jo hei kae,” ati. 5Khana Rōngpu ṭongpek dungjuia Noah’n heirakip aleitlosōt jo.
6Raleichunga tuishâng alen pha khan Noah akum 600 katluk jo. 7Tuishâng lena inphut inhuksōtna sik ama leh anuhmei, asahei leh annuhmeihei rakōng shunga kahlut jo hei.#Mt 24.38,39; Lk 17.27 8Sha leh va rakip, apui ache, beklanga a’ntheng ranhring khana a’ntheng leh a’nthengmak, 9Pathen ṭongpek dungjuia Noah leh inṭhōia rakōng shunga khan kahlut jo hei. 10Ni 7 sōa raleichung pumpuia tuishâng kalen in akachûm jo.
11Noah’n kum 600 ahong tlukna kum a thla 2 tlukna ni 17 ning tak a ralei thōia tuipui tuihnâr hong inhlâng jo, chungvân tinga tuipui kot hong inhlâng jo,#2 Pe 3.6 12sûn leh jân ni 40 katlunga khō kasûr jo. 13Hiva ning tak hin Noah leh anuhmei khana asapa 3 hei, Shem, Hem, Japheth leh annuhmeihei rakōnga kahlut jo hei. 14Ram a shahei, inna shahei akasin akalen jât rakip manvât loa, khana va jât rakip kakip hima Noah leh inṭhōia rakōnga kahlut jo hei. 15Ranhring rakip apui leh ache atō-atōa Pathen ṭongpek dungjuia 16rakōnga kahlut jo hei. Khava sōa Rōngpu’n kot kha Noah ahluttak leh akhâr jo.
17Tuishâng kha ni 40 leikalen, tui hong inthûk joa rakōng kha tui in akalâng thei jo. 18Tui kha hong inthûk chet-chet a rakōng kha tui chunga inlânga ka-om jo. 19Inthûk hêr joa tlâng inshângpen he’m akachûm jo hei; 20tui kha inshângchet a tlâng chunga inphut metre 7 kakhea inshânga leika-om. 21Raleichunga akahring inti rakip tui in athatpet jo hei; vahei, ranhringhei leh mihringhei. 22Raleichunga kaphuk kasân rakip kathipet jo hei. 23Raleichunga vahei, ranhringhei, mihringhei rakip Rōngpu’n aman-rampet jo hei. Akahring hei khachu Noah leh inṭhōia rakōng shunga aka-om hei rōk kha kae. 24Kani 150 atluk mak kârseng tuilen kha leitlâksuk mak a kae.
Currently Selected:
A’NPHUTNA 7: KOMRBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
