MITHEW 2
2
Nasutieng Athei Achang
1Herod Reng na reng changlei ah. Judea ram Bethlehem ma Jisu don su takka, nasu tienga athei asingei na Jerushalem ma phao. 2Akha chu sai, “Jews ngei Rengpa don so weti chu hoija mo ae? Kani na nasu tienga ma-arshi ri unge akha chu amo ta mokranga phao unge.” 3Herod rengpa akha chu Jerushalem ma am lim pa na theijuija lung ehekta olso. 4Amona mamee ngei chungtekti thiempu akha chu roukung ocha ngei ta kokka rachun piweta manita sai, “Khrista ha hoi mun na don nang sha?”
5Mani na sange, “Judea Bethlehem ah ae.” “Nahi ae rouphu ngei na jiekka hita shi: 6“Judah ram sunga Bethlehem nang chu Judah ram sanao ngei karra sintekti ano ae; rouram chu kamee Israel ngei ta lamkai pi ang akha nakolla hai thou shuk kange.”
7Chuna Herod na nasu tienga athei achang tuita kokweta ejong apha ah arshi na sukmoti hrabakta dangpha so. 8Amona manita Bethlehem ah hla weta hita ril, “Thingo hanaweta unga am na ha hrabak dang shu nutienga keita takko, dangpi oh chuleh chu kei kom thingweta amota mok thing tikkae.” 9Rengpa kolla mani thei su nutienga mani na mani lam hana thinga nasu tienga mani ri arshi hana matienga thinge nao san am na pha ma lim ma. 10Arshi ha na ngir rijui ariem na shihakti so. 11Inn hana mani lutjuija naosan ha chu manu Mary hitta am riso. Akha chu manina huk hrun weta amo ta moksho. Hana mani thul hongweta ariem hoi shariktui akha chu sona ha pepi sho.
12Mani ta amanga dangpi nu juija Herod am na tienga lea no wa, mani na adang lampi tienga mani ram ma lea so weh.
Egypt Ah Bi Thing Na
13Mani thing nutienga Arengpa wanrui na Josep manga ripi ah amo na rille; “Thou jou wo, hana unga lea manu hitta Egypt pa bithingo. Amunt hana am mo nakolla Le-ota kadang pimalimma, rouram chu Herod na unga ha ta that ranga jonga am meh.”
14Chuna amo na thou weta unga akha chu manu ta jantinga Egypt pa thing so. 15Amunt hana Herod theet malim ma amo na ammeh. Chuna rouphu thiempu na rilshukha atun chu tungso ae: “Keina kasanaopa Egypt hai thou sunga kokkange.”
Unga Sanao Ngei Ta That Na
16Herod na dangphaso nasutienga athei achangei na amota routhup so ae ta madangpha ah, amo na alung sha ah Bethlehem sunga am nao san spa akum ani thuija am lim ta that ranga trongsan pe so. 17Hana rouphu pa Jeremiah na ril phur ha adiek takka shukso: 18“Ramah hai thou wa meetrap sanrol akha chu Rachel na asanao ngei taranga trap pa; akha chu ma hoi rang ephou am no ae rouram chu mani ha am no jarra.”
Egypt Hai Thou Lea Na
19Herod thit su takka Egypt ram ma Josep manga Arengpa wanrui na amota ripi. 20Akha chu ril, “Thou oh, unga akha chu manu ruiweta Israel ramma lea oh rouram chu unga hata la tikkae ta ae mee amo ha thi so ae.” 21Chuna amona thou weta unga akha chu manu ta rui weh ta Israel ram thing so.
22Chuti weta Arkileas na Judea ram ma mapa Herod hut sil so weh theipa chu amo na amunt hana thing rang atri. Chutichun mamanga takpi nu juija amona Galily ram tienga thingso. 23Akha chu amona Nazaret hulokka thingweta amso. Chuna rouphu ngei ril phur ha tungso, “Amo ta Nazarete mee ta kokkange.”
Currently Selected:
MITHEW 2: CHOTBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
