wandījo 15

Ilagane lya ng'wa Mulungu kūlī Abulamu

1Hanuma ya yenīyī ū mhayo gwa ng'wa SEEBA gūng'wizīīla ū Abulamu mu koolechiwa; ūng'wīla gīkī,

“Ūtogohage Abulamu.

Ū nene nalī Lūmūūda lwako;

nīyo nal'inong'ho itaale no

ū kūlī bebe.”

2Alīyo ū Abulamu ūhaya, “Ee SEEBA wa būdūla bose, ūkūninha kī? Īkī ū nene nalīshila alīyo hū natī na ng'wana; hama ū wa kwīyingīla ī kaya yane alīho Elieza muna Damasko!” 3Ū Abulamu ongeja kūhaya, “Ūtaalī kūninha baana, na lūūlū ū ng'wingīji wane atūbiza ūngī ūlū atī nsese#15:3 Nsese: Nūūlū misa. wa kūbyalīlwa mu kaya yane!” 4A henaho ū mhayo gwa ng'wa SEEBA gūng'wizīīla gūlīhaya, “Ū ng'wenūyo atūbiza ng'wingīji wako yaya, ū ng'wingīji wako akūbiza ng'witūnja wako wa kūbyala bebe gete.” 5Hūna ū SEEBA ūmfunya hanze ū Abulamu, ūng'wīla gīkī, “Alilolaga ū kwigūlū; jibalage ī sonda ūlū ūdūgije kūjibala.” Ūng'wīla, “Ū būbyīle wako būkūbiza gīko!” 6Ū Abulamu ūgūzunya ū mhayo gwa ng'wa SEEBA, nang'hwe ūng'wisaabīla būtūngīlīja.

7Hūna ūng'wīla, “Ū nene nalī SEEBA ūyo nakakwīnja mu Ulu, sī ya Bakalidayo, nūkwenha kūūnū gīkī nakwinhe ī sī yenīyī, wīdime ībize yako ya wikomangīle.” 8A henaho ū Abulamu ūshosha gīkī, “Alīyo lūūlū SEEBA Mulungu, nakūmana ginehe gīkī ī sī yenīyī īkūbiza yane?” 9Hūna ū SEEBA ūng'wīla, “Nenhelage ndogoosa ya ng'ombe na mbūli ng'hīma, hamò na ng'ondi; ī jose jibize ja myaka idatū datū, na mhunda, na ng'hune ya ng'hūūlū.” 10Ūng'wenhela ī shose shenīsho; būlī yene wītandūla ha gatī, gūbiza mapingili abīlī. Hūna a mapingili genayo ūgiheja būlī lyene na lyichalyo. Alīyo ī noni atajitandūlile habīlī. 11Ū Abulamu wikala henaho alīlang'hana, ayūjipeeja ī noni ījo jikalyaga nyama jitizūgwa hoi.

12Ī līīmi aho līlīsalalīja, kūjīlīīla mu ka munhū ūyo, ū Abulamu ūtindwa tūlo ndito; na giiti shitaale sha kogohya shūngwīla. 13Ī likanza lyenīlo, ū SEEBA ūng'wīla, “Managa hape gīkī, a banhū ba būbyīle wako bakūbiza balobeji mu sī ītī yabo, bakwītwa kūbiza basese na kūluhiwa kūshisha ikanza lya myaka magana anè. 14Alīyo ī lihanga īlo līkūbīīta kūbiza basese lyenīlo, nakūlyinha nsango; hanuma bakūfuma mo balī na sabo ningī. 15Gwike ū bebe ng'wene ūkūcha ūjīkwe, ūje kū bakūlūgenji bako mu mhola; mu būnamhala bowiza, bo shikū ningī. 16A banhū ba būbyīle wako bakūshoka hangī ū mu sī īyī mu shibyalīlwe sha kanè; nguno ū būbi wa Baamoli būtaalī ū kūshika a ha būkalīkījo wabo.”

17Aho lyalibīla ī līīmi nī giiti shūkūbanīja, kwimanīla lilonga lya kūbiza gītī lyahulīlo lya moto līkūzuukaga lyochi, na chenge shikūligimaga moto; ī shikolo shenīsho shūbīta a ha gatī ya mabudīka ga mibimba ya mitugo genayo. 18Ū mu lūshikū lwenūlo ū SEEBA ūbeeja ilagane nū Abulamu, ūhaya gīkī, “Ū būbyīle wako nalīwinha ī sī yenīyī, kwandīja kū mongo gwa Misili kūkaja kū mongo gwa Flati. 19Ī yoi ī haha īlī sī ya Bakeni, Bakenuji, Bakadimoni, 20Bahītī, Bapelizi, Balefai, 21Baamoli, Bakanaani, Bagiligashi na Bayebusi.”

Currently Selected:

wandījo 15: SUKBI15

ማድመቅ

Copy