Malako 4
4
Misumo za Mbuto.
Mat. 13:1-17; Lk. 8:4-10.
1Nu alingile kuigisia lingo buigi na kiziba. Nu musanganano munene wakundameine nunse buigi nage, ku bubo eingide mu buato buabezaga mu kiziba, nu musanganano unsania wabezaga wikala gansi ku mutili. 2Nu abeigisizie bitondo bingi mu misumo, nu atendile mu meigisia mage bune, 3Unguililazi: muyiki wa mbuto endaga ayika mbuto: 4nu gaziyikaga mbuto imozi zakolokile mu ntungo mua nzila, nu tuzoni tuazibobueide. 5Nu ingo zakolokile gantata ga luanda, takuabezaga bisogo bingi; nu kazanga kongo zasile, kubuno bisogo tabiabezaga bingi: 6nu gasanukile musi, zagulumine; kubuno tazabezaga na mizi, zomine. 7Nu ingo zakolokile mu mikele, nu mikele zasile, nu zazilimbanizie nu tazakolamine biguma. 8Nu ingo zakolokile ga bisogo bisoga, nu zakolamine biguma bingi, zakulile nu zanagile; nu zakolamine makumi masatu, ingo makumi mutuba, ingo lukama, 9Nu atendile bune, Wozo uli na matuzi makunguilila, nti unguilila.
Yesu Ekuisulila Beigisibua bage Musumo.
Mat. 13:18; Lk. 8:11-15.
10Nu gabezaga wenyene, bantu bamutimbikanizie nu babo ikumi nu babili bamubuzizie buisulilua bua musumo. 11Nu ababuide bune, Kumuli ukuakasilue kakungu ka bukota bua Kalaga: tondo ku babano batakatizia bunatendua ku misumo: 12buno banamona, tondo tabanatitika; nu banongua tondo tabanamenyinina, buno banakivua kugaluka nu kusigililua. 13Nu abatendile bune, Ndi tamuizi musumo wono? nti mukamenya misumo insania buni? 14Muyiki ekuyika idagi. 15Nu babano ubabo beli muntungo mua nzila, gakusambalua idagi; nu ndi basila kungua, kazanga kongo Satana nti avua kutikia lilio idagi libasambalilagua. 16Nu babo ubayikilue ga luanda, nu ndi bongua kuidagi lilio, nti balisekela kazanga kongo na mbogimbogi; 17nu tabeli na mizi munda muabo, bakusigala bindi bimozi; nu gavue kabebe aba lubabazio ku kabamba keidagi, kazanga kongo ekuikuka. 18Nu babo ubabo bayikilue mu mikele; ubabo bakungua lilio idagi, 19nu milondo za kisi, nu buengelezi bua bikulo, nu ntundo za bingo bitondo bingila; nu nti bialimbania idagi, nu nti taliakolama lingo biguma. 20Nu babo bayikilue mu bisogo bisoga; ubabano bongule kuidagi lilio, nu kulitabizia, nu kukolama biguma, umozi makumi masatu, ungo makumi mutuba, nu ungo lukama.
Musumo wa Kiengi nu Kapilo. Kasuku nu Luzi.
Mat. 5:15, 16; 7:2; Lk. 8:16; 11:33.
21Nu abatendile bune, Ndi muntu anavua na kasuku nu kukabika kunsi kua luzi, aba kunsi kua mugu, ndi takukabika ga kibikilo kiako? 22Kubuno takuli kiabisilue, kitakabisulua; aba takuli kiatendagua mu kakungu kitakongubuako. 23Ndi muntu eli na matuzi makuinguilila, nti unguilila. 24Nu abatendile bune, Idangazi na kikio kimukungua kukio: kubuno, kulindika kukuno kumukulindika, ukuko kumukalindikua, lingo ukimukatalikilua. 25Kubuno wozo uli na kena, akakasua; nu uteli nako, nti akatikibua kako keli nako.
26Nu abatendile bune, Bukota bua Kalaga bualingimana na muntu wasandide mbuto zage gansi; 27nu geiyombekile, nu gayukile, mu musi nu mu kindi, mbuto zabalukile nu zasile, nu zakulile lukita lutamenyaga nyenezo. 28Kubuno bisogo bia kisi bikukolama biguma bibienyene; kulinga nsamba, kusila mombo, nu mu mombo migili. 29Tondo geidile biguma, kazanga kongo abisesile na bupanga, kubuno busi bua kukola buakuka.
Bukota bua Kalaga Bualingimana na Mbuto za Bunyonyo,
Mat. 13:31, 32; Lk. 13:18, 19.
30Nu atendile bune, Bukota bua Kalaga tubulingimanie na kikizi? aba tubulingimanie na musumo mukizi? 31Bualingimana na kambuto ka bunyonyo, kayikilue mu bisogo, keli kakeke ku mbuto insania zili mu kisi, 32kungua zasila kuyikua, nu kuasa, nti zaba nnene kutinga insania; nu nti zabika ntabi nnene; nu tuzoni tua mpelela tunavuama kumunua mu kilimelime kiago. 33Nu atendaga idagi liage ku misumo mingi bubanalimenyina; 34nu ntanabatendile buatatendile ku musumo: tondo mu lumbisombiso eigisagia beigisibua bage bitondo binsania bobenyene.
Kisoa Kinene.
Mat. 8:23-27; Lk. 8:22-25.
35Nu mu busi bubo muigolo, abatendile bune, Tusokazi ku lisilia. 36Nu basigile musanganano, nu bendile nage anga buabezaga mu buato. Nu mango mato mabezaga buigi nage. 37Nu kuabeide kisoa kinene, nu bimpumi bidibuide mu buato, nu buato buizede na mazi. 38Nuwe abezaga ku kansinsi ka buato, eiyombeka ku tulo ga muigo: nu bamuyukizie, nu bamutendile bune, Musozi, gatunakua ndi bunakubela bubi? 39Nu ayukile, nu azugide kisoa, nu atendile ku kiziba bune, Bota, nu kisoa kiasilile, nu kuolile nunse. 40Nu abatendile bune, Kubuni mukukua boba? Ndi tamuba na bukatizio? 41Nu bakule boba nunse, nu batendeine bune, Muntu mukizi wono, aba kisoa nu kiziba nti bikumuanza?
Currently Selected:
Malako 4: NTKI57
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
