Matayo 26
26
Beli na Yesu Kangonongono Bakumukalila Luango lua Kumuita.
Mk. 14:1, 2; Lk. 22:1, 2.
1Nu gasilile Yesu kutenda bubo, abuide beigisibua bage bune, 2Muizi buno, kusila kua bindi bibili kuabe kisagulo kiesuluko, nu Muana wa muntu agabulue buno atakue ku muti wa magu. 3Mu nkungu zezo basankoga banene, nu bakulu ba bantu, bakundameine mu lusu lua sankoga munene, wamanagua Kayafa; 4bakalile luango buno, bakate Yesu mu lumbisombiso, nu bamuite. 5Tondo batendile bune, Ta mu kisagulo, mu musanganano munakivua kuba kazege.
Malia wa ku Betania, Ekubongia Yesu Bulago Kuitoe.
Mk. 14:3-9; Yoana 12:1-8.
6Nu gabezaga Yesu mu Betania, mu numba za Simona muiya bibali, 7mukikulu umozi amuvuilide na kabongelo ka alabasata?#26:7 Alabasata—isupa lia ikozi lia bukunza bubibu. muko muabezaga bulago bua bukunza bubibu nunse, nu amukubulide gantata geitoe, gabezaga ekulia. 8Tondo gamonine beigisibua ku bubo, bongilue, batendile bune, Kuzimizia kuno kuli kubuni? 9Ganakunzilue bulago bubuno, bunamonine bikulo bingi, binakasilue bazambi. 10Tondo gamenyine Yesu makengelo mabo, abakuide bune, Buni bumukuzangiazangia wono mukikulu? 11Kubuno mukubezaga na bazambi bindi binsania, tondo tamuli nanne bindi binsania. 12Ambongia bulago ku mubili wane, ankitide bubo kulongeka kuyikua kuane. 13Lebelebe, nkumubula bune, Kunsania kukasambalua musagu musoga wono mu kisi kinsania, bakasambala lingo buakitile mukikulu wono, bukaba kabali kage.
Yudasa wa Isakaliote Ekukalila Yesu Luango.
Mk. 14:10, 11; Lk. 22:3-6.
14Kububo umozi wa beigisibua ikumi na babili, izina liage Yudasa Isakaliote, endile ku basankoga banene, 15nu abatendile bune, Mukutunda kunkasa kikizi, ganamugabulilawe? nu bamulindikide bindi makumi masatu bia feza, bamukasilebio. 16Kutukila ku nkungu zezo alondile kubagabulilawe.
Kulongeka kua Yesu Idia lia Kisagulo Kiesuluko na Beigisibua Bage.
Mk. 14:12-16; Lk. 22:7-13.
17Gabede busi butangi bua tumpampa tutagaga beigisibua bavuilide Yesu, bamubuzizie bune, Kuni kukutunda tulongeke kiziki kia kutulila kisagulo kiesuluko? 18Nu atendile bune, Endazi ku muino nu muakulumane na wamulume, nu mubulazi bune, Musozi atenda bune, Nkungu zane zise buigi, nikite isuluko mu numba zobe na beigisibua bane. 19Nu beigisibua bakitile anga buabatendaga Yesu; nu balongekile kisagulo kiesuluko.
Kuzinda kua Kisagulo Kiesuluko.
Mk. 14:17-21; Lk. 22:14-20; 24:30.
20Gabuabeide buse muigolo abezaga na beigisibua bage ikumi na babili aliaga nabo; 21nu gabaliaga, ababuide bune, Lebelebe nkumubula bune, Umozi wa kumuli uwangabule. 22Babede na kabebe nunse, nu nawe nawe nawamubuzizie bune, Mukota ndi nne? 23Nu abakuide bune, Wozo unakatile nage maboko kiandindi mu lupepe, uwangabule. 24Muana wa muntu ekuenda, anga buasanzidue; tondo kabebe ku muntu wozo ukugabula Muana wa muntu! bunabeide busoga songo muntu wono ntabutilue. 25Nu Yudasa, wamugabuide amubuzizie bune, Labi, ndi nne? Yesu amuakuide bune, Uwe ukutenda.
Yesu Ekubabula Bubaliaga nu Bubanuaga, U Kakengelesio ka Mubili Wage nu Mikila Zage.
Mk. 14:22-25; Lk. 22:17-20; I Kol. 11:23-25.
26Nu gababeide bese balia, Yesu akatile kampampa, nu asegile nu akabunguide; nu akasile ku beigisibua bage, nu atendile bune, Tolazi, nu liazi; kakano keli mubili wane. 27Nu atolile kituma, nu asegile, nu abakasilekio, abatendile bune, Inyue bansania nuazi: 28kubuno kikino kili mikila zane zeidagano, zakubuka ku kabamba ka beingi, kuisigililo lia misako za buagi. 29Tondo nkumubula bune, Nsikanua lingo biguma bibino bia mizigi, aba nu ku busi bunkanua lingo neinyue mu bukota bua Tatane.
Yesu Ekubula Petelo nu Bango Buamutune Petelo.
Mk. 14:26-31; Lk. 22:31-34; Yoana 13:36-38.
30Nu gabasilile kuimba luimbo, bendile ku muiduko wa Oleve. 31Yesu ababuide bune, Inyue bansania muine mitima nanne mu kindi kikino: kubuno buasanzilue bune, Nkalibula mulangi, nu kibombo kia mikoko kikabalangana.#Zakalia 13:7. 32Tondo ganabe nayuka, nalinge kumutanga kuenda ku Galela. 33Petelo amuakuide bune, Ndi bansania beina mitima nobe, tondo nne nsine mutima nunse. 34Yesu amubuide bune, Lebelebe nkukubula bune, Mu kindi kikino gabe mulume wa nkoko ntebika, wantune mambizi masatu. 35Petelo amubuide bune, Busoga kukua nobe, ndi nsiakutuna. Beigisibua bansania beitabizizie lingo bubo.
Yesu Eli na Kabebe mu Getesemane.
Mk. 14:32-42; Lk. 22:40-46.
36Nu Yesu avule nabo muisoa liamanagua Getesemane, nu abuide beigisibua bage bune, Ikalazi gano, nende kusega kuko. 37Nu endile na Petelo nu bana babili ba Zebedayo, nu alingile kuba na kabebe nu akonkeidue. 38Nu ababuide bune, Nnenyene nili na kabebe kanene, aba nu ku lukuo: sigalazi gano, kesiazi ntende nanne. 39Nu gabede esalombozia, aguide bukukama, nu asegile bune, Tatane ndi bunakulunganana kituma kikino kintingile; tondo tabunkutunda kusombola, umpanga bukutunda kusombola. 40A vule ku beigisibua nu abasangile beiyombeka ku tulo, nu atendile Petelo bune, Ndi tamunavuama kukesia ntende nanne nkungu imozi? 41Kesiazi ntende nu segazi, buno munavua kuingila mu malindiko; mutima ukutunda bubo, tondo mubili watamba. 42Endile lingo, nu asegile, atendile bune, Tatane, ndi tabunakulungana buno kituma kikino kintinge nsiakinua, kasi kusombola kuobe kukitue. 43Yesu avule lingo abasangile beiyombeka ku tulo, kubuno bazenzelaga. 44Yesu abasigile lingo, nu endile kusega limbizi lia masatu, atendile bubo lingo. 45Nu avule ku beigisibua bage, nu ababuide bune, Iyombekazi lino, nu umunuazi: kubuno nkungu zise buigi, nu Muana wa muntu agabulue mu maboko ma bagi. 46Zanzukazi, tuendazi: wozo ukungabula ese buigi.
Bekukata Yesu.
Mk. 14:43-50; Lk. 22:47-53; Yoana 18:3-11.
47Nu gabezaga esatenda bubo, Yudasa, umozi wa babo ikumi nu babili, avule na musanganano munene wa bantu babezaga na mapanga nu nkoma, batukaga ku basankoga banene nu bakulu ba bantu. 48Nu wozo mugabuzi wamugabulaga abakasile kakengelesio bune, Unamumage ku busundo, nti umuakate. 49Nu kazanga kongo abasile ku Yesu, nu amusekede bune, Samba, Rabi; nu amumumine. 50Nu Yesu amubuide bune, Muida wane, kita buwavuilaga tugu. Nu bavule nu bakatile Yesu na maboko. 51Nu ungo wabezaga na Yesu alambizie kuboko, nu abasizie bupanga buage mu musagi, nu abangile mukobe wa sankoga munene, nu amusesile kutuzi. 52Yesu amubuide bune, Ingizia bupanga buobe mu musagi: kubuno bansania bekukata bupanga bekeitua na bupanga. 53Ndi ukukengela tugu buno, nsinavuama kusega ku Tatane buno ansingile bibombo ikumi na bibili bia migenzi? 54Umpanga buni bukazindilizibua masanzo, kubuno ububo, buatunganana kuba? 55Mu nkungu zezo Yesu abuzizie musanganano bune, Buni bumuavua na mapanga nu nkoma kunkata anga bekukata munyagi? Nikalaga busi na busi mu numba za kukumbamina neigisagia bantu, nu tamuankatile. 56Tondo bunsania buabede buno, masanzo ma balengania mazindilile. Nu beigisibua bage bansania bamusigile, nu batinine.
Bakuvua na Yesu ku Kayafa nu ku Balongeki.
Mk. 14:53-65; Yoana 18:12, 19-24.
57Nu babo bakatile Yesu bendile nage ku numba za Kayafa sankoga munene, ukuabezaga kukundamanina basanzi nu bakulu. 58Tondo Petelo amuyangile bulazi, aba nu ku lusu lua sankoga munene, nu eingide, nu eikede na bakambi, kulindila buabe. 59Basankoga banene nu bakazi ba luango bansania balondaga bubanakandika Yesu, buno bamuite; 60nu bakandiki beingi bavule, tondo tabuakulungene. Tondo bango babili bavule, 61nu batendile bune, Muntu wono atendile buno, anavuama kusambula numba nene za kukumbamina Kalaga, nu kuzobaka lingo mu bindi bisatu. 62Nu sankoga munene emanukile, nu amutendile bune, Uwe ndi ntuakule? ndi ntukungua tugu ku bitondo bibakukulongekela? 63Tondo Yesu eikede kibibi. Nu sankoga munene amubuide bune, Nkukulumbizia ku Kalaga uli Mulami, tubule ndi uwe u Klisto, Muana wa Kalaga. 64Yesu amubuide bune, Bubo buwatenda; tondo nkukubula buno, mu nkungu zezo mukamona Muana wa muntu eikala ku kuboko kua seidume kua Magala, nu ekuvua mu bimpa bigulu. 65Nu sankoga munene iyatide nsulu zage, atendile bune, Alinga Kalaga, kubuni lingo kutukulindila bango balongeki? Mungua bualinga Kalaga: 66buni bumukukengela? Bamuakuide bune, Atunganana kukua. 67Nu bamusulide matazi ku meiso nu bamusindikile; nu bango bamulibuide ngizi, 68batendile bune, Ndi uwe U Klisto, menya nazi wakulibula?
Petelo Ekutuna Yesu.
Mk. 14:66-72; Lk. 22:55-62; Yoana 18:16, 25-27.
69Nu Petelo abezaga ikala mu lusu: nu mukikulu mukambi amuvuilide, amubuide bune, Uwe nuwe wabezaga na Yesu wa Galela. 70Tondo atunine ku bansania bune, Nsizi bukutenda. 71Nu gendile ku kabelabela, ungo mukikulu amumonineko, nu abuide babezaga nage bune, Muntu wono abezaga na Yesu wa Nazaleta. 72Nu atunine lingo, nu alumbide bune, Nsizi muntu wozo. 73Nu gatingile nkungu nkeke, babezaga bemana buigi bavule, bamubuide bune, Petelo, lebelebe uwe uli umozi wa babo, kubuno kutenda kuobe ukukukumenesia. 74Nu alingile kuisuilila nu kulumbila, nsizi muntu wozo, nu kazanga kongo mulume wa nkoko abikile. 75Nu Petelo akengeide idagi liamubulaga Yesu bune, Gabe mulume wa nkoko ntebika, wantune mambizi masatu. Nu atukile, nu alilile nunse.
Currently Selected:
Matayo 26: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
