Matayo 23
23
Yesu Ekubula Beigisibua Bage nu Bantu Misako za baFalese.
Mk. 12:35-37; Lk. 20:45-47.
1Nu Yesu abuide misanganano nu beigisibua bage bune, 2Basanzi nu baFalese bakuikalaga mu kisumbi kia Mose: 3kitazi bunsania bubekumubula: tondo tamukite anga bubakukita. Kubuno bekutenda nu tabekukita. 4Lebelebe, bekukanda mizigo mizitu, zitanavuama kuekua, nu bekuzibika ga bituli bia bantu; tondo tabekutunda kuzisigelezia na minue zabo. 5Bakukita misako zabo insania buno bamenyue na bantu. Basanzile masanzo manene ma mukanda wa Kalaga ku bituli bia makoti mabo, nu bekulundia mipimbo za nsulu zabo. 6Nu bakuelama kiziki kitangi mu bisagulo, nu bisumbi bitangi mu numba za musanganano, 7nu bekutunda kusekelua mu biziki bia isoko, nu kumanua na bantu buno, Labi.#23:7 Labi lili izina lia Basosi banene ba Isaleli. 8Tondo inyue tamumanue buno Labi: kubuno muli na musozi umozi tugu, nu inyue bansania muabutua. 9Nu tamumane muntu ga kisi buno soinyue, kubuno muli na Soinyue umozi tugu uli muigulu. 10Nu tamumanue buno, basondelezia; kubuno muli na musondelezia weinyu umozi tugu, U Klisto. 11Tondo wozo uli munene kumuli akaba mukambi wa banyage. 12Nu unsania wisakika nti akasigulizibua, nu weisigulizia nti akasakikua.
Yesu Ekutenda ku baFalese.
Mk. 12:38-40; Lk. 20:47.
13Kabebe kanene kumuli basanzi nu baFalese, bengelezi! kubuno mukukandila bantu bukota bua meigulu: inyue tamukuingila mubo, nu tamukuziga bantu kuiyingilila mubo.
14Kabebe kanene kumuli basanzi nu baFalese, bengelezi! kubuno mukunyaga numba za misigala, nu kuengelela gamukusega isego idazi. Ku bubo mukasungibua nunse.
15Kabebe kanene kumuli, basanzi nu baFalese, bengelezi! mukutimba kitatenge nu kisi kulonda muntu umozi buno abe muigisibua weinyu; kungua akatizia meigisia meinyu nti amutinge ku bubi mambizi mabili muana wa kiziba kia keiya kumutinga.
16Kabebe kanene kumuli, basondelezia, muli biuku, mukubulaga buno, Ndi muntu alumbila ku numba nene za kukumbamina nti takena: tondo ndi alumbila ku olo za mu numba za kukumbamina, nti akandua. 17Inyue biuku nu bikongolo: kikizi kiatinga kinene olo, aba numba nene za kukumbamina zasuagizie zezo olo? 18Mukubulaga lingo buho, Ndi muntu alumbila ku kayulo nti takena; tondo ndi alumbila ku kisansa kia kayulo, nti akandua. 19Inyue biuku: kikizi kiatinga kinene, kisansa aba kayulo kasuagizie kikio kisansa? 20W ozo ukulumbila ku kayulo nti akulumbila kuko nu binsania bili gako. 21Nuwe ukulumbila ku numba za kukumbamina, nti akuzilumbila, nu ku wozo uli muzo. 22Nu wozo ukulumbila muigulu akulumbila ku kisumbi kia Kalaga, nu akulumbila ku wozo wikile gakio.
23Kabebe kanene kumuli, basanzi nu baFalese, bengelezi! mukukasana kindi kiekumi kia nsiogo, nu kinzani, nu lusolo, nu mukusiga misako minene za mulembe, buisanana, nu kiombo, nu bukatizio; tondo zezo uzatananina kukitua, nu zezo zengo tamuzisige. 24Inyue basondelezia, muli biuku! mukusuila iyendu, nu mukumena nzogu.
25Kabebe kanene kumuli, basanzi nu baFalese, bengelezi! kubuno mukusuga kituma nu lupepe gantata, tondo munda muiyala na nsese, nu buengelezi. 26Uwe muFalese kiuku, linga kusuga munda mua kituma nu lupepe, ububo gantata genge.
27Kabebe kanene kumuli, basanzi nu baFalese, bengelezi! kubuno mualingimana na nsinda zasingulua na mpemba, gantata zikumoneka nsoga, tondo munda muizile makua ma bantu, nu nsese insania. 28Ububo inyue mukumonekako na bantu buno muli beisanana, tondo munda mueinyu muizile na buengelezi, nu mibi.
29Kabebe kanene kumuli, basanzi nu baFalese, bengelezi! kubuno mukobaka nsinda za balengania, nu mukulebia nsinda za beisanana, 30nu mukutenda buno, songo tuabezaga mu nkiko za batateisue, tatunagomanizie nabo ku mikila za balengania. 31Mukuidongekela buno muli bana bababo beitaga balengania. 32Izaziazi kilindiko kia basoinyue. 33Inyue nzoka, kikanga kia mpoma, buni bumukatina lusungio lua kiziba kia keiya? 34Ububo unguililazi; namusingila balengania, nu bantu ba menge, nu basanzi: mukuita bamozi nu mukutaka bango ku muti wa magu; nu bango bamozi mukubalibula mu numba za musanganano, nu mukubasungia mu muino na muino: 35ububo mikila zeisanana zikumukubukila mu kisi, kutukila mikila za Abele wozo wisanana aba nu ku mikila za Zakalia, muana wa Balakia, umuitile gasamba kayulo nu numba zasuagibua. 36Lebelebe nkumubula bune, pitondo binsania bikavua ku kikino kibuti.
Yesu Ekulilila Yelusalema.
Lk. 13:34, 35.
37Yelusalema, Yelusalema, ukuitaga balengania, nu walibulaga banakusingide makozi! mambizi manga natundile kukundamania bana bobe, anga bukugubatilaga nkoko zagubatila bana bazo mu biupi, tondo ntuabuzigile! 38Numba zeinyu zasigala buasi. 39Kubuno nkumubula buno, Tamukamonako lingo, kutukila kano kaluma aba nu gamukaba muse muatenda bune, Mbogimbogi ku wozo ukuvua muizina lia Mukota. #Luimbo 118:26.
Currently Selected:
Matayo 23: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
