Matayo 21
21
Yesu Ekubasa ku Yelusalema na Lutanuno.
Mk. 11:1-10; Lk. 19:29-38.
1Nu gababasile buigi na Yelusalema, nu kubasa ku Betepage, ku muiduko wa Oleve, Yesu asingile beigisibua bage babili, 2nu ababuide bune, Endazi ku muino uli luabusio lueinyu, nu kazanga kongo muamone ku mpunda zasuikua, nu muana wazo: nti muazisula, nu nti muanvuila nazo. 3Ndi muntu amubuzia, nti muabula bune, Mukota ekuiyaninazo: nu kazanga kongo nti asingazo. 4Bubuno bunsania buabezaga buno lizindilile liatendagua na mulengania bune,
5Bulazi mukinga wa Siona bune, Mukota wobe akuvua kuguli,
Wabota nu ekuenda gantata ga mpunda. #Zakalia 9:9; Yesaya 62:11.
6Nu beigisibua bendile, nu bakitile anga buababulaga Yesu, 7nu bavule na mpunda, nu muana wazo, nu babikile nsulu zabo gantata gazo; nu eikede gantata gazo. 8Nu bantu beingi ba misanganano banzile nsulu zabo mu nzila; nu bango basesile ntabi za miti, nu bazanzile mu nzila. 9Nu musanganano wendaga luabusio luage, nu babo bamuyangaga, balalukile bubibu bune, Hosana ku muana wa Davidi; Mbogimbogi ku wozo ukuvua muizina lia Mukota; Hosana mu meigulu.#Luimbo 118:25, 26. 10Nu gabasile ku Yelusalema, bantu bansania ba mu muino bangamine, babuzanizie bune, Wono eli nazi? 11Bantu ba misanganano batendile bune, Wono eli mulengania, Yesu, wa ku Nazaleta wa Galela.
Yesu Ekutukia Bakunzia mu Numba Nene za Kukumbamina Kalaga.
Mk. 11:15-18; Lk. 19:45-47; Yoana 2:13-16.
12Nu Yesu engide mu numba za kukumbamina Kalaga, nu alingile kuimbia babo bansania bakunzagia nu babo bakunzaga mu numba zezo, nu eidukizie meza ma bagulania ba falanga, nu bisumbi bia bakunzia ba nkulimba; 13nu ababuide bune, Buasanzilue#Yelemia 7:11. bune, Bakamana numba zane buno numba za masego: tondo beinyue muazigalukia anga kiziki kia banyagi.#Yesaya 56:7. 14Biuku nu bitunga bamuvuilide ku numba nene zakukumbamina, nu abonizie. 15Tondo gamonine basankoga banene nu basanzi ku bubo buakitile buakuangamia, nu bana balalukile lingo mu zezo numba nene za kukumbamina bune, Hosana ku muana wa Davidi; bongilue. 16Nu bamubuzizie bune, Ndi wungua ku bubo bukutenda babo bana? Yesu ababuide bune, E, ndi tamuasomine buno, mu tunua tua bana bato nu tunua tua bekibamoma, umukuzindilila lutanuno.#Luimbo 8:2. 17Nu abasigile, nu endile ku Betania, nu eikede kuko.
Yesu Asuilila Muti wa Biguma.
Mk. 11:12-14, 20-24.
18Gabezaga esasubia ku muino nindunindu, akule na nzala. 19Nu amonine ku muti wa figi mu ntungo mua nzila, awendede, nu ntamonine kampa kugo, tugu nsamba; nu abuide muti bune, Ntukakolama biguma lingo tanga kutukila kano kaluma aba nu ku nkiko zitanakuzinda. Nu kazango kongo wozo muti womine. 20Nu gamonine beigisibua bage ku bubo, bangamine nu batendile bune, Buni buoma muti wa figi mu kazanga kongo? 21N u Yesu abakuide bune, Lebelebe nkumubula bune, Ndi muaba na bukatizio buteli na kangonongono, mukakita tabubuno buakitua wono muti wa figi tugu; tondo mukabula muiduko bune, Tutumuka, nu wiyise mu kitatenge, nu nti buaba. 22Nu binsania, bimukasegaga mu masego, ndi muakatizia, mukabikasua.
Bekubuzia Yesu Bukota Buage.
Mk. 11:27-33; Lk. 20:1-8.
23Nu geingide Yesu mu numba zakukumbamina, basankoga banene nu bakulu ba bantu bamuvuilide gabezaga eseigisia, nu bamubuzizie bune, Buangato bukizi bukukitila ku bubuno? nu nazi wakukasile buangato bubuno? 24Nu abakuide bune, Nunne nkumubuzia bumozi, ndi muanakulabo, nti namubula nunne buangato bunkukitila ku bubo. 25Bubatizio bua Yoana, buatukile kuni, muigulu aba ku bantu? Babuzanizie buabo buabo, ndi tuamutenda bubo, buatukile muigulu; nti ekututenda buno, kubuni tamuamukatizizie? 26Tondo ndi tukutenda buno, ku bantu; nu tukukua musanganano boba; kubuno bantu bansania bekukatizia Yoana buno, eli mulengania. 27Nu bakuide Yesu bune, Tatuizi. Nu ababuide bune, Nunne lingo nsikumubula ku buangato bunkukitila ku bubuno. 28Tondo buni bumukukengela? muntu umozi abezaga na bana babili; avule ku mutangi, abuide bune, Muana wane wamulume, enda ukite mukambo muisoa lia biguma. 29Amuakuide bune, Nsikuziga; tondo kumbusa eibezizie, endile. 30Isibo endede wozo ungo wa babili nu amutendile bubo lingo. Nuwe amuakuide bune, Nkuenda Tatane: tondo ntendile. 31Kubabo babili, muana mukizi wakitile buatendile Isibo? Bamubuide bune, Wozo mutangi. Yesu ababuide bune, Lebelebe nkumbula bune, Bandelelombe nu bakikulu bitazi bakalinga kuingila mu bukota bua Kalaga kumuli. 32Yoana avule kueinyu mu buisanana, nu tamuamukatizizie; tondo bandelelombe nu bakikulu bitazi bamukatizizie: nu gamuamonine, tamuibezizie buno mumukatizie.
Musumo wa Nyene Isoa Asegaga Bantu Bage Biguma Biage.
Mk. 12:1-9; Lk. 20:9-19; Yesaya 5:1-7.
33Unguililazi ku ungo musumo: Kuabezaga muntu nyene numba, ayikile mizigi za biguma muisoa liage, alikulumanizie na mukolo, nu ombile muzinga wa kukambutula biguma, nu obakile numba ndazi, nu alisigile ku bakambi, nu endile mu kingo kisi. 34Nu gabede nkungu za biguma biseli buigi na kuela, asingile bakobe bage ku bakambi, kutola biguma biage. 35Tondo bakambi bakatile bakobe bage, nu balibuide umozi, beitile ungo, balibuide ungo makozi. 36Nu asingile lingo bango bakobe bage, batinga batangi ku buingi; bakambi babakitile anga bubakitile babango. 37Ububo abasingide muana wage, atendile bune, Embe bananza muana wane. 38Tondo bakambi, gabamonine ku muana, babuzanizie bune, Wozo eli mupieni; vuazi tumuitazi, nu tupiene bupieni buage. 39Nu bamukatile, nu bamutukizie muisoa, nu bamuitile. 40Gakavua nyene isoa akakita babo bakambi buni? 41Nubo bamubuide bune, Akeita babo bakambi babi; nu akakasa isoa liage ku bango bakambi, bakamukasaga biguma ndi biela. 42Yesu ababuzizie bune, Ndi inyue tamuasomine mu masanzo bune,
Ikozi liasombilue na bobaki,
Uliabede ikozi inene lia kapindapinda;
Bubo ubuatukile ku Mukota,
Nubo bukutuganiagania? #Luimbo 118:22, 23.
43Kubuno nkumubula bune, Bukota bua Kalaga bukatukibua kumuli, nu bukakasua kingo kilongo kikakolamaga biguma. 44Nuwe wagua geikozi lilio nti abeleka; tondo unsania wakolokelua nalio, nti liamubungula. 45Nu gongule basankoga banene nu baFalese ku misumo zage, bamenyine bune, Akubatenda. 46Nu balondaga kumukata tondo bakule musanganano boba, kubuno bamumenyaga buno, eli mulengania.
Currently Selected:
Matayo 21: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
