Matayo 17
17
Kugaluka kua Kilungi kia Yesu.
Mk. 9:2-13; Lk. 9:28-36.
1Nu gatingile bindi mutuba Yesu atolile Petelo, nu Yakobo, nu muto wage Yoana, nu abakamine nabo ku muiduko mulazi bobenyene: 2nu kilungi kiage kiabagalukide; nu malanga mage masanine anga kisongo kia busi, nu nsulu zage zabede zenga anga kiengi. 3Nu babasidue na Mose nu Eliya besatenda nage. 4Nu Petelo akuide Yesu bune, Mukota buli busoga ndi tuikala gano: ndi watunda, nobake nusu isatu; lumozi luobe, nu lumozi lua Mose, nu lumozi lua Eliya. 5Gabezaga esatenda, kimpa kia kiengi kiabakukide; iyuki liatukile mu kimpa bune, Wono eli Muana wane, u Ngoli zane, nakomana nage; munguililazi. 6Nu gongule beigisibua bage kuiyuki lilino, bakomine malanga gansi, nu bakule boba. 7Nu Yesu avule, etubizie kubeli, abatendile bune, Yukazi, tamunakua boba. 8Nu gabalambuide meiso, tabamonine kungo, umpanga Yesu.
9Nu gababezaga basagela muiduko, Yesu abakakizizie bune, Tamubule ungo muntu bumuamona kubo, aba gakayuka Muana wa muntu ku bakuzi. 10Nu beigisibua bage bamubuzizie bune, Kubuni basanzi bakutenda bune, Buatunganana Eliya kulinga kuvua tanga? 11Nuwe abakuide bune, Lebelebe, Eliya akavua kukunga binsania; 12tondo nkumubula bune, Eliya avule kalazi, tabamumenyine, tondo bamukitile anga bubatundaga. Ububo Muana wa muntu ababazibue nabo. 13Beigisibua bamenyine bune, Ekubasambalila musagu wa Yoana Mubatizi.
Yesu Akonia Wabezaga na Lungu.
Mk. 9:14-29; Lk. 9:37-43.
14Nu gababasile ku musanganano, muntu umozi avule kueli, amukomine mazu, nu atendile bune, 15Mukota, kuila muana wane wamulume kiombo, eli na lusambo lua lungu, ekubabazibua nunse; mambizi meingi ekuitumba ga keiya nu mu mazi. 16Namuekile ku beigisibua bobe, tabavuamine kumonia. 17Nu abakuide bune, Inyue kibuti kikio kia busombi nu kiteli na bukatizio, ndi nkeikalaga neinyu kankanka? gani gankakutilua? Vuazi nage kundi. 18Nu Yesu amuzugide, nu wozo musumbu atukile mu muana: mu nkungu zezo muana onine. 19Nu beigisibua bavule ku Yesu bobenyene, nu bamubuzizie bune, Kubuni isue tatuavuamine kumutikia? 20Nu ababuide bune, Ku kabamba ka busosu bueinyu mu bukatizio: lebelebe, nkumubula, bune, Songo muli na bukatizio anga mbuto za bunyonyo, munabula muiduko bune, Tuka kuko, nu utingile kukuno, nu ukatinga; takuli kitakamukulunganina. 21Tondo bubuno tabunamoneka tugu kute kukusega nu kugila.
Yesu Ekubula Beigisibua Bage Kukua Kuage nu Kuyuka Kuage.
Mk. 9:30-32; Lk. 9:43-45.
22Nu gababezaga mu Galela, Yesu abatendile bune, Bakagabula Muana wa muntu mu maboko ma bantu; 23nu kuitua, nu kuyukibua kusila kua bindi bisatu. Nu abede na kabebe nunse.
Yesu Abangamizie ku Kuliga Idigo.
Mk. 9:33.
24Nu gababasile mu Kapenuma baligia ba idigo bavule ku Petelo bamubuzizie bune, Musozi weinyu ntakuliga idigo kubuni? 25Atendile bune, E, nkuliga. Nu ingide mu numba, Yesu alingile kumubuzia bune, Simona, ukukengela buni? ndi bakota ba kisi bekuligia bana babo aba ndi bageni? 26Nu akuide, Bageni tugu. Yesu ababuide bune, Bubo bana bakandulua. 27Tondo tunavua kubeinia mitima, enda ku kiziba, nu isa kakila mukio, nu tola kiena kialinge kuvua; gawasule mu kanua kakio, nti wamone shekela#17:27 Zili falanga bantu ba kalazi. nu nti wazitikia, nu nti wabakasa zobe nu zane.
Currently Selected:
Matayo 17: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
