Génesis 49
49
Pava yôjesh'esha'ne lhclishay pa Jacob
1Pa Jacob tôney papi lhcles pa yit'esha: “Anc'uyeelh pa jayeetshelhaam jayu pava vaclan jayu pava amc'oya nalhus:
2“Anc'uyeelh ca ach'anelhyi Jacob lhcles,
ach'anelha na atataelh Israel.
3“Avaatsha, Rubên, ac'utsa'jesh ti c'ô'sesh,
yunaj'ash vatjutsa' ti yifayishesh,
vatjutsa' ti chiyisclaneshi shi' pa t'unaj.
4Taj ti tanca t'ôyisheey ca avatjutsa,
lhayaash ti naach'an ajunashjulh pa uj
lhaviim:
lhayaash ti lhasclôqui'esh ja yimojôvat
ti t'ôjqu'enelhch'e lhja jôctsayan atesha.*xl*
5“Na Simeón shi' na lhch'inish Leví;
nava ac'uclelh uj ti suyjulh.
6¡Niyit'esh ca yamey pa ti
lhtayelh'evane,
lhayaash ti yielh'atshi papi ojiyis!
Pa meelh ti lhatvacô'yelh pa lhclônelhsha'ne
papi nivacle,*xm*
pa afanisheshelh'in ti lhpôcjetelhsha'ne
pava vôcôc jayanjas.
7¡Chiypôfiyu, jech chiypôfiyu
pa asuyeelh ti uj ti naancôtsitayelh'in!
¡Yivaatsha c'acatsônjatelh'in jayu a'lhacôm'a'elh
alhtachifaselh Israel avoselh!
8“Na Judá, nôclôj jayu napi ach'injavot.
Lhatcumey jayu lhavo' papi naac'utsfasa,
vooy napi ach'injavot pa t'avuy'aan jayu.
9¡Avaatsha, Judá, tsitsôt'ajesh yaôs!
Avaatsha ajunashjulh pa jump'uvalhjetaj lhaôs
ti vômeshjop pa lhayjô':
ti vanu'esha'ne pa yôôtjatesha cotsjaat
jan lhjunash pa uj jump'uvalhjetaj.
¿She papu ca nifiy'am jayu ca naclôqui?*xn*
10Ampapu ca nanjôclesh jayu
pa t'unaj na Judá
shi' na lhavcôjat nan yichaj'in,
yamjey jayu ca namtaj pan yitsôt'ajesh na
lhavcôjat, pa lhech niqu'ishamem jayu papi
yiey na cotsjaat.
11Pa lhech yôcfashi' jayu pa cuvôyutaj
pa ôtjayetachat,
pa yicleshesh jayu lhpa t'uyjatshi
pa ôtjayetas t'i',
¡pan tô'lha pava ôtjayetas!
12Pava lhtôsjey ya'sheshc'oya ti
tulhshi pa ôtjayetas t'i';
vooy pava lhtsevtey ya'sheshc'oya ti climsha'ne
pa vôcô lhts'oos.
13“Na Zabulón yie' jayu lhavôôj pa uj yinôôt,
yiey pa lhashi'esh jayu ca chinantajfach'eeen
pava yi'shi' pava vatôvjatshiyis.
Pa lhcootsjat yamey jayu pa cotsjaat Sidón.*xñ*
14“Na Isacar cuvôyutaj yooy ti
t'ichay'e pa lhajpôyich.
15Ti yi'van pa cotsjaat ti ampa ca naaan
papi yie' pa is ti chit'ichay,
pa yinesh'e lhfatas pa ti tilhooj
pa nintaniyôytanesh ti vatcavoesh.
16“Na Dan lhcaanvacleeshc'oya jayu
papi lhchifas pa tc'a'sham papi tô'lha
jayu na Israel.
17Na Dan lhjunashjulh jayu pa tos
ti yi'shi' pa nôyish,
ti yijuujam lhp'ic'o pa cuvôyu
pa nicôtjatesha'ne pan yi'apee.
18“¡Pa Lhcaanvacle, jaych'anesh'ajop
ca ats'ilhjen!
19“Na Gad t'ajuyjulh jayu papi c'afoquelhay,
taj ti yash'apee jayu pa yijôyjan
jayu shta.
20“Na Aser uj jayu pa lhôc;
yijutem jayu pa is lhôc papi caanvacles.
21“Na Neftalí lhjunashjulh jayu
pa tashinsha ti amem pa na pa nashch'een,
ti isis pava lhcles.
22“Na Josê lhjunashjulh lhpa
vatcôvjiyancheyuc ti shalheema pa yinôôt
pa acloj jayu pava lhay,
vooy pava t'oy yam'apee jayu
pa vatashclôfech.
23Papi clutshenjas yicônitshi jayu,
pa tiyô'jesh'in pava lhc'ôjey;
pa yajatesh jayu ca ninan'atea;
24taj na Josê t'unch'esha'ne nava t'itjuy
pa t'unesh'in pa lhclutsesh;
¡shtanshamitjat pa lh'Dios na Jacob
pan ampa ca nintô'yeesh!,
¡shtanshamitjat ca lhey pa Vancaclôvalh,
pan vanujumatsenesh na Israel!,
25¡shtanshamitjat pa lh'Dios na atata,
ti nefen jayu;
pa Dios ampa ca nintô'yeesh
yit'esh'am jayu pa is!
¡Pava isis ti yit'eshaam tôlhey pa vôôs!
¡Pava isis ti yit'eshaam pava vat'ajtey
shi' pa vatacachi'!
26Na atata ya'shesh ti yit'esh'am
pava isis nilhjunashajulh capi yinavot
ti yit'eshyam pa is.
Yamja nava uticuy ôyjôlhôyjes
navôque isis chiyit'eshem,
na Josê chiyeneyshi yiey napi lhcheclavot.*xo*
27“Na Benjamín, lhavaatsha
jump'uvalhjetaj suy,
ti nich'a nalhu tuj pa lhayjô'
vooy ti nuut pa yicatsônjat'in
pava lhqu'iyas.”
28Papuque doce ve'lheelhsham pa Israel, côque yit'esha pa lhtata papi lhcles ti ve'lha ts'ivee ti yit'eshem pa is.
Ti vaf pa Jacob
29Pa nijooylha ti yijutem côque lhayôjijat: “Pa lha yujeey ca javaf. Astishelh'ec'oya yiey capi jatô'lha yiey ja cotsjaat Efrón hitita, 30yiey ja cotsjaat Canaán. Yich'e' ti yiey ja nivalhech yiey ja Macpela, shalheema ja Mamre, yiey pan tcashaya ca Abraham yijpôclônesh pa lhcac'ovat ca Efrón, ca lhnivalhjeyaesh pa t'ajôj'esha'ne.*xp* 31Lhech chitish'ec'oya ca Abraham shi' lhca lhch'acfa Sara;*xq* ca Isaac*xr* shi' lhca lhch'acfa Rebeca. Pa lhech jatish'ec'oya shta lhca Lea. 32Pa vatcac'ovat shi' pa nivalhech pa lhech yie' tcashayesha papi hetitas.”
33C'oya ti yivaclhitesh pa Jacob pava yiyôjiesha papi lhcles, pa yicheyshi pa lhmojôvat pa vaf.*xs*
Currently Selected:
Génesis 49: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.