Génesis 46
46
Pa Jacob ti yie' pa Egipto
1Pa Israel yichaaj lhacôm'a pavan caajem. Vooy ti yamey pa Beerseba, pa yijutey pa lhcufayjat pa lh'Dios pa lhtata Isaac. 2Pa lhech tulh pa Dios tasinôyshelh pa Israel pa lhtsamat'esh pa yetôn pa lhey pa Jacob. Pa yicuulh:
—Nôque jôv'e'.
3Lhechesh pa yit'esh pa Dios:
—Yivaatsha ya Dios, lh'Diosyish ja atata. Ya aj ca anjova'yey ti lhôquey ja Egipto. Lhayaash ti lhech'e jayu ca jasnatesh papi acles papi acloj lhtachifas. 4Javoach'e jayu yie' ja Egipto. Pa yivaatsha jayjat'e jayu shta ja lhech'e papi acles. Lhayaash ca avaftaj pa shalhaa jayu ja Josê. 5Lhechesh pa tay'e pa Jacob pa Beerseba. Papi lhcles pa Israel yanshi' pa lhtata shi' papi lhcles shi' papi lhjayas pava caletas pavan yicheney pa faraón. 6Pa Jacob shi' lhacôm'a papi yitsôt'ajesh yichey pa Egipto.*xe* Pa yichaaj shta pava lhclôy vôcôc, pava tashinshtas shi' lhacôm'a pava yi'van yiey pa cotsjaat Canaán. 7Lhacôm'a papi lhcles, papi lhantôclishjesh shi' papi lhantôclishchey tanôôycheelh.
8Navôque lheyis papi israelitas papi yichey pa Egipto; yich'e' ti lhech papi lhcles pa Jacob:
Pa Rubên, c'utsa'jesh lhaôs pa Jacob. 9Papi lhcles pa Rubên: pa Hanoc, pa Fabú, pa Hezrón shi' pa Carmi.
10Papi lhcles pa Simeón: pa Jemuel, pa Jamín, pa Ohad, pa Jaquín, pa Zohar shi' pa Saúl, lhavaatsha lhaôs lhpa nivacche cananea.
11Papi lhcles pa Leví: pa Gersón, pa Coat shi' pa Merari.
12Papi lhcles pa Judá: Pa Er, pa Onán, pa Sela, pa Fares shi' pa Zara. (Taj ti pa Er shi' pa Onán apis ti vaf ti yiey pa Canaán.) Papi lhcles pa Fares pa Hezrón shi' pa Hamul.
13Papi lhcles pa Isacar: pa Tola, pa Fúa, pa Job shi' pa Simrón.
14Papi lhcles pa Zabulón: Pa Sered, pa Elón shi' pa Jahleel.
15Papuque lhclesesh lhpa Lea pa Jacob ti yie' pa Padan-aram shi' shta lhpa lhôse Dina. Lhacôm'a papi tô'lha yamvatsham treinta y tres papi yitsjôy shi' papi ôcjeclôy.
16Papi lhcles pa Gad: pa Zifión, pa Hagui, pa Esbón, pa Suni, pa Eri, pa Arodi shi' pa Areli. 17Papi lhcles pa Aser: pa Imna, pa Isúa, pa Isúi, pa Bería shi' lhpa lhch'injô papi lhech lhey Sera. Papi lhcles pa Bería pa Heber shi' pa Malquiel. 18Papuque lhcleselh lhpa Zilpa pa Jacob. Lhpa lhech lhcavoque pa Labán tisesh lhpa lhôse Lea. Papi tôlhesha yamvatsham diecisêis.
19Papi lhcles lhpa Raquel, lhch'acfa pa Jacob: pa Josê shi' pa Benjamín. 20Papi lhcleselh pa Josê lhpa Asenat pa Manasês shi' pa Efraín, nivat'as'e pa Egipto. Lhpa Asenat lhôse pa Potifera, vatasinôc lhavo' yiey pa On.*xf* 21Papi lhcles pa Benjamín: pa Bela, pa Bequer, pa Asbel, pa Gera, pa Naamán, pa Ehi, pa Ros, pa Mupim, pa Hupim shi' pa Ard. 22Papuque tôlhesha lhpa Raquel pa Jacob, catorce yamvatsham.
23Pa lhaôs pa Dan: pa Husim. 24Papi lhcles pa Neftalí: pa Jahzeel, pa Guni, pa Jezer shi' pa Silem. 25Papuque lhcleselh lhpa Bilha pa Jacob. Lhpa lhech lhcavoque pa Labán yijutem lhpa lhôse Raquel. Papi tôlhesha yamvatsham napu'yama.
26Lhacôm'a papi nivacle yamelhey pa Jacob pa Egipto lhavaatsha yitsôtajesh ti lhavelhavot yamvatsham sesenta y seis, taj ti nichinatsjuulh papi lhjayas shi' papi lhcles. 27Papi lhcles pa Josê napu', nivat'as'e pa Egipto. Nôque lhjunash ti yamey pa Egipto yamvatsham setenta papi ve'lheelhsham pa Jacob.*xg*
28Pa Jacob yicheney pa Judá ca nijôchiey pa Josê ca ninachjulh yiey pa cotsjaat Gosên. Meelh ti yamey pa Gosên, 29pa Josê tayôjijanesh ti chitatômjalheshem lhpa lhcaletaj ti yicheshjulh pa lhtata. C'oya ti yamjulh pa lhtata pa yechepjalh pa cajuqu'e ti yip'in ti mônlheeshi lhfatatsiy. 30Lhechesh pa yit'esha pa Israel pa Josê:
—Nôqueesh c'avan jô ti jôjjeclay amônlha, ¡pa isjopyam ca javaf!
31Pa Josê yit'esha papi lhcheclavot shi' pat'ajôôjam pa lhtata:
—Jôquey cum ja faraón ca janfacleem côque. Jayeetshema jayi napi checlavot shi' napi lhavelhavot na tata napin yie' ja cotsjaat Canaán ti nam'in ca amônlhaaelhyijop; 32shi' ti lhanchajeelh nava aclôyelh tashinshtas shi' nava vôcôc shi' nava caajelh'am. Lhayaash ca acumjayashelh lhnujumatseneshelh nava tashinshtas shi' nav'elh. 33Ca naniyôstajeshelh ja faraón pan acumjayashelh, 34pa anfacle'lhem ti yajatesh ti lhclôvalhelh pava tashinshtas nan lhjunash capi catsinavot. Ca jaspa isajop jayu ca veelh'e na cotsjaat Gosên, lhayaash japi Egipto lhavos ninteesh ca shalhaema papi tashinshtas lhavos.
Currently Selected:
Génesis 46: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.
