Génesis 42
42
Papi lhcheclavot pa Josê ti yichey pa Egipto
1Pa Jacob ti yitô'ya pa Egipto ti caaj pa trigo pa yit'esha papi lhcles: “¿She pa lhech'e ti lhasnatshelh ti lhnôvalhelh? 2Chinfacyam pa Egipto ti caaj lhôn pa trigo. Meelhey pa lhech pa acashayelha pa trigo t'ajuyjoo, ca jaspa casmônlhaasha'ne shta.”*xz*
3Lhechesh pa napunôjesh papi lhcheclavot pa Josê yiechey pa Egipto ca natcasha'ya pa trigo. 4Taj ti pa Jacob ninvashanch'e ca nivoqu'e pa Benjamín pa lhch'inish pa Josê, lhayaash ti yaychavalhey ti niameesh ca navclaneem pa niysa'. 5Papi lhcles pa Israel tanôôycheelh pap'elh papi yichey ti tcashayey, lhayaash ti lhacôm'a pa cotsjaat Canaán ti caaj pa yiyipcu'.
6Pa Josê lhavaatsha lhcaanvacleesh'e pa cotsjaat Egipto pan tcashayeshaan pa trigo papi nivacle tôlhey ts'ivee pav'elh yitsates. C'oya ti yamey papi lhcheclavot pa yiesh'e t'ajuyish ti t'avuyshichamch'e yamja cotsjaat. 7Pa Josê nitôfaclesh papi lhcheclavot ti yi'van, taj ti yijôney ca ninatôfacleesh, pa yifactsenesha ti niy'ôs:
—¡Avaatsheelh! ¿Ta lhtô'lhelhshi?
—Jatô'lhelhey ja cotsjaat Canaán, janachelhey ca jaycasha'yelha pa trigo —yit'esh ti yicuulh.
8Pa Josê nitôfactajesh papi lhcheclavot, lhan'e papi lhech ninantôfa'clesh. 9Lhechesh pa yaychavalhch'e pa Josê pava lhtsamatasesh lhapesh papi lhech,*xa* pa yit'esha:
—Avaatsheelh atuvalhjanjaselh. Tsi'sha ti lhovalhelhey pa yie' papi nincont'as yiey nôque cotsjaat.
10Pa yicuulh papi lhech:
—¡Am, lhcaanvacle! —yicuulh papi lhech—. Yivaatsheelh, acavoselhyish, janachelhey ca jaycasha'yelha pa trigo. 11Yalhacôm'aelh ti ve'lha ja tataelh jatô'lhelha. Yivaatsheelh jataasclaneshelhshi. Nôv'e' ca yatuvalhjanjaseelh.
12—T'ôôlhjônelh'in —yit'esh pa Josê—. Avaatsheelh lhovalhelhey pa yie' papi nincont'as yiey nôque cotsjaat.
13Yicuulh papi lhech:
—Napi acavos yadoceelh, ja ve'lha jatataelh, jatô'lhelhey ja cotsjaat Canaán. Ja yich'inishelh taôvclajesh mônlhajop ja tataelh, vooy jaelh nit'ôyi'sheey ca nôveelhyijop.
14Taj ti ve'lheesh yit'esha shta pa Josê:
—¡Yiey can jayeesh! Avaatsheelh atuvalhjanjaselh. 15Pa jac'alhtaneshelh'am jayu côque: jetônjop ja lhey ja faraón ti yijô' ti tanca ayelh'e nôque, vooy ca namtaj pa taôvclajesh ach'inishelh. 16Istaa ca ve'lhaa avaatsheelh papu ca nôquey ca nanchaaj. Vooy nap'elh vanôôcfasha'ne jayu. Ca nastôye'lha jô ca yijô'a ca lhteetshelh. Ca niyijôtaja, pa yijô' ti atuvalhjanjaselh. ¡Jetônjop ja faraón!
17Pa Josê yôcfa'sha'ne lhacôm'a papi lhech pava pu'jana nalhus. 18Ti yamey pa pu'jana nalhu pa yit'esha:
—Ts'ijovayem pa Dios. Ca entajelh ti amônlheelh pa asnatshelh côque: 19Ca yijô'taja ti lhtaasclaneshelhsha'ne, pa amônlhanitelh'e pa ve'lha avaatsheelh lha vatvanc'ôcfajavte. Vooy nap'elh napecl'in pa nichaaj pa trigo ca nituj jayu papi ajô'jamsha'ne. 20Pa anchajeelhyi pa taôvclajesh ach'inishelh, pa ja'van jayu ti yijô' ca lhteetshelh. Ca niyijô'tajaa, pa lhavafelhsha'ne jayu.
Pa yuesha papi lhech. 21Taj ti yit'eshvane ts'ivee:
—Yijô' ti niysa' ca casfanishesh lhapesh ja caschiniish. Ey ca sht'uesha ti vatants'acalantajeshjoo ca shtacavts'aclayesh, lhama shtavantaj ti uj ti nijovayshi.
22Pa yicuulh pa Rubên:
—Yivaatsha jayeetajesh ca ya aj pa ca afanisheeshelh ja nich'ayech,*xb* taj ti naanujelhyi. Pa nôqueesh caajjoom na tavijatay tôlh'ejop pa lhavafjayash.
23Papi lhech nintôôysha pa Josê ti yitôyc'oya pava yit'esh'in, lhayaash ti vooy ti chinôyôjeshch'een ti tasinôyelh. 24Pa Josê pa yichc'oya papi lhech pa yip'in. C'oya ti tapecley pa yie' papi lhech pa isjop ti tasinôyelh. Pa tac'uyesh pa Simeón pa yivanesh ti chiyôcfa'. 25Pa nijooylha ti tayôjijanesh ca chinponteshemch'e pava lhvônsac pa trigo. Pa nachajey lhacôm'a pava lhpesôc ca nineyshi pava lhvônsac. Shi' ca nijutem pa lhôc t'ajuya pa nôyish. Pa lhech lhfanishesh. 26Lhechesh pa yinesh'apee pava lhclôy cuvôyutas pa yich'in.
27C'oya ti yamey pa t'ichay'e ti tulh'in, pa ve'lha papi lhech pa nic'ach'e lhpa lhvonsa ca nijutey pa lhôc pa cuvôyutaj, pa yi'van lhpa lhpesô yich'e' lhpa lhvonsa. 28Lhechesh pa nifaclem pap'elh:
—¡A'va, chinachajyiy lha yipesô! ¡Yich'e' lha yivonsa!
Pa lhacôm'a pa uj ti nijovayshi, pa ts'anananvatsham'in ti nijovayshi pa yit'eshvatsham'in:
—¿She pa yisnateshjoom pa Dios?
29C'oya ti yamey pa cotsjaat Canaán pa nifaclemch'e pa lhtata Jacob lhacôm'a pa lhjunash pava vaclanem, pa yit'esha:
30—Ja nivacle, lhcaanvacleesh'e jô lhech cotsjaat, uj ti nintsiisclanelhsha'ne. Pa tsilheclôjtajeshelh ca yituvalhelhey ja lhavtsaat. 31Taj ti jayeetshelhem ti yivaatsheelh jataasclaneshelhshi ti nôv'e' ca yatuvalhjanjaseelh. 32Pa janfacle'lhem shta ti yadoceelh ti ve'lha jatataelh, ti ve'lha na nit'ôyisheey ca nôvelhyijop, pa vooy na taôvclajesh mônlhaajop yiey na Canaán. 33Lhechesh pa yit'eshelhyi jô lhech: ‘Côque jac'alhtaneshelh'am jayu ca yijô'taja ca ataasclaneshelhshi. Anô'yelhnee papi ve'lha pa ca nôôvtaj'e avaatsheelh pa mapeclelh ca acha'jelhey pa tiqu'in trigo pa ajô'jelhshamsha'ne. 34Taj ti anchajeelhyiy pa taôvclajesh ach'inishelh. Pa nôque lhjunash pa nastôyelh'a jô ti lhtaasclaneshelhshi pa tanca atuvalhjanjaseelh. Lhecheesh pa januqueesh jayu naelh avelhelh pa jaspa isa' ca achajelhshiin na cotsjaat Egipto.
35Ti nic'ach'esha'ne pava lhvosac papi lhcheclavot pa Josê pa yivanch'e lhacôm'a pava lhvonsac pava pesoc chiyôcfashaam. Ti yivanch'e pava pesoc pava lhvonsac pa uj ti nijovayelhshi pa lhtata. 36Lhechesh pa yit'esha pa Jacob:
—Avaatsheelh lh'aminatelhyam japi yicles. Ca Josê apis ti ampa, ja Simeón ampa shta ¡pa nôqueesh pa lhchajelhyic'oya shta na Benjamín! ¡Lhacôm'a côque ti t'ajuyeshyijulh!
37Lhechesh pa yit'esha pa Rubên pa lhtata:
—Atsan'ateesh ca janujumatsenesh na Benjamín, yivaatsha janachaj jayu. Ca ninachajtaja pa istaa ca aclônyic'oya napi napu' yicles.
38Taj ti yicuulh pa Jacob:
—Na yaôs tanca nivoelh'ach'e jayu. Ca lhchecla' Josê apis ti vaf, pa ve'lha na lhech mônlhayijop. Lhayaash ca nicaaj pa niysa' pa ôtayjayashelh pa ta lhjunash jayu. Pa avaatsheelh tôlhelh'aajop ti yivômjat jayu nôque c'utsaaj pa lhtacshinjayash.
Currently Selected:
Génesis 42: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.