Éxodo 4
4
1—Vooy papi lhech tanca nueshyi jayu pa tan shta ca nach'anyi —yit'esh ti yicuulh pa Moisês—. Pa vooy jayu jô ca niteeshyi: “Ma lhantaj t'e ca nitônôclit'am pa Lhcaanvacle.”
2—¿She na yi'shi' na apôcôt? —niy'ôsesh pa Lhcaanvacle.
—Vooy na yivcôjat —yit'esh pa Moisês.
3—U'a cotsjaat —yiyôjiesha pa Lhcaanvacle.
Pa Moisês yu'a cotsjaat, pa lhechesh pa tatsha ti yalhatajesh ti tosesh pa lhavcôjat. Pa vacumajc'oya pa Moisês. 4Taj ti vooy pa Lhcaanvacle yit'esha:
—Acumesh'e na apôcôt ca acum'e lhacôôs.
Pa tacum'e pa Moisês pa lhech, pa meelh ti yamat pa tos pa vapecleyjop shta ti vatcôjat'esh.
5—Côque vaclan'am ca jaspa nuesh'a ti yijô' ti tanôclit'am na Lhcaanvacle, lh'Dios papi acchevot, na lh'Dios pa Abraham, pa Isaac shi' pa Jacob 6—yit'esha pa Lhcaanvacle.
Vooy nôqueesh ajayesh'ôcji na apôcôt na ôcjôshi.
Pa t'ajayesh'ôcji pa Moisês pa lhpôcôt. Pa meelh ti niclanshi pa yi'van lhpa lhashtôtaj ti lhayashaesh, pa clim jum lhjunashjulh pa yicleshi. 7Pa lhechesh pa yiyôjiesha shta pa Dios:
—Ajayesh'ôcji cum shta na apôcôt. Pa lhech lhfanishesh pa Moisês, pa meelh ti niclanshi pa lhpôcôt pa tatsha ti vatsjanesh yiey pan lhjunash lhacôm'a pa lhavu'vat. 8Pa lhechesh pa yit'esh pa Lhcaanvacle:
—Ca nacacutajeesh na vatjutsa' lhnôclit shi' ca ninach'antajesh'a; pa vooy na napueyshi pa lhechesh pa nuesh'a. 9Taj ti vooy ca ninutajeesh'a navôque napu' lhnôôclhanitaja pa atô'lhesham pa yinôôt pa tovôc Nilo pa ôtsiy'e cotsjaat. Pa vooy pa yinôôt pan lhtô'lhesham pa tovôc pa yalhatajesh jayu ca vatvoyeye'esh ca ôtsiytajesha'ne.
10—¡Jay, Lhcaanvacle! —Yit'esh ti yicuulh pa Moisês—. Yivaatsha nic'oojlhaayam ca yasinôy. Côque nilhnashaaesh cava nôj nalhus shi' shta cavôque nalhus ti lhtasinôyem na acavo. Pa yinjôt ti lhetlhataj ca yijunash ti meelh ti jayasinôytaj'in pa yaasinômat'in.
11Taj ti vooy pa Lhcaanvacle yiculheshch'e ti yit'esh:
—¿She papi yisnatshem pa nivacle pa lhashi? Yivaatsha jasnatesh pa clishaclayech, pa peeychelhoj, pa tacluuc shi' pa isjop ti yovalh'in. 12Pa nôquen lhayaash, mô, pa vooy yivaatsha jôv'ajop jayu meelh ca asinôytaj, pa qu'eyjatajanesh jayu shta pava ca at'esh.
13Taj pa Moisês ti lhetipa'esh pa yit'esh'in:
—¡Jay, Lhcaanvacle, istaa ca acheney paelh nivacle!
14Pa lhechesh pa suya pa Lhcaanvacle pa Moisês, pa yit'esha:
—¡Caaj ja achecla' Aarón, tôlhshaam ca Leví! Tsitô'ya jô ti is ti tasinôy. Pa vooy ca nachtaj'ajulh jô lhech, pa uj jayu ca nanshamesh ca navantaj. 15Asinô'yelh jô lhech, pa ashinitjatem lhacôm'a pava isjop ca niteesh. Vooy yivaatsha isjopyam jayu ca jôvelh'ajop jô lhech meelh ca asinôytajelh, pa janôôclhanitelhaam jayu pava isjop ca asnatshelh. 16Avaatsha lhtasinôyem jayu ja Aarón pa lha'yasha jayu ca yalhetsha yivaatsha. Pa vooy ja Aarón nifaclem jayu papi lhchifas pava lhteesh avaatsha. 17Achaaj nôque avcôjat, lhayaash na lhech isjop ca avclanjatesh pava isis matas.
Pa Moisês vapecley pa Egipto
18Pa Moisês vapecley pa lhajpôyich pa lhcact'ech Jetro, pa yit'esha:
—Japecley jayu ja Egipto, yiey jan yie' japi yichifas, jen ca javan pa lhjunash ca lhetipaa ca mônlhaasha'ne.
—Tajulhey meey, ca isa' ca mô' —yit'esh pa Jetro.
19Meelh ti jôjjeclay mônlheeem pa Moisês pa Madián, pa yit'esha pa Lhcaanvacle:
—Mapecley ja Egipto, lhayaash ti apis ti vafsha'ne lhacôm'a capin yentaj ca naclôn.
20Pa lhechesh pa t'acum'e pa Moisês lhpa lhch'acfa shi' papi lhcles pa yan'apee pa ve'lha cuvôyutaj pa yichey pa Egipto. Pa yichaaj shta pa lhavcôjat'em pa Dios. 21Pa nijooylha ti yit'esha pa Lhcaanvacle pa Moisês:
—Meelh ca amtajey ja Egipto, pa asclaneshi ca asnatajesh lhacôm'a java nimatasa papu ca nitô'yish ca vi'tajesh'e t'ajuyish ja faraón javan jajut'ay'ajop pa unaj ca asnatesh. Pa vooy yivaatsha jiyitsjayanesh jayu jô lhech ca jaspa ya aj ca nivashan ca nitay'e japi israelitas. 22Pa lhecheesh pa at'eshem ja faraón: “Nôque yit'esh pa Lhcaanvacle: Na Israel, lhech ti c'utsa'jesh yaôs. 23Apis ti jayeetajesh'a ca avashan na yaôs ca nitay'e ca jaspa nitsôclôj. Taj ti vooy nôqueesh ti naat'esh ca nitay'e, pa lhechesh pa jaclôn jayu ja c'utsa'jesh aôs.”*xñ*
24Yiey pa nôyish pan t'ichay'e jayu pa Moisês shi' pant'ajôôjam, pa tulh pa namey pa Lhcaanvacle pa Moisês pa yeetajesh ca niclôn. 25Pa lhechesh pa t'acum'e lhpa Sêfora pa utej clesaesh pa yise'jey pa yôj'eshane pa t'ôj pa lhavanach pa lhaôs. Pa nijooylha ti t'ajayaan pa t'ôj pa taôvclaj pava lhafoc pa Moisês, pa yit'esha: “Yijô' jô avaatsha ti alhech ti c'ach'acfaesh ti casvoyiniyashvatjulh.” 26Pa lhechesh pa yin'atech'e pa Lhcaanvacle ti yich pa Moisês. Pa yit'esha lhpa Sêfora pa Moisês ti lhech ti lhavoyiniyashjulh ti lhch'acfaesh tôlh'ejop pa lhansejchevash pa lhaôs.
27Pa lhan'e pa Lhcaanvacle pa yiyôjaan pa Aarón pa yit'esh: “Meey ja ampa ca nôv'e' ca avatvanelh ja Moisês.” Pa yich pa Aarón pa yi'van pa Moisês yiey lhpa lh'utiyuc pa Dios. Pa lhech'e ti vaneecjuelh ti vatfinelhsha'ne. 28Pa lhech'e ti chayemch'e pa Moisês pa Aarón lhacôm'a pava matas pavan yiyôjiesha pa Lhcaanvacle ca niteetsha. Pa nifaclem shta pava nimatasa papu ca nitô'yish pavan yiyôjiesha ca nasnatesh.
29Pa nijooylha pa yichey ts'ivee papi lhech napu' ca ninayjatvane papi nitaôvclasaesh papi Israel. 30Pa lhech'e ti nifaclem pa Aarón lhacôm'a pava chiyit'eshem pa Moisês. Pa jô'tajesh ti nôclitem shta papi lhchifas pava nimatasa papu ca nitô'yish pavan palha ti yinôôclhanitema pa Dios ca navclanjat. 31Pa lhechesh pa yijô'em jô papi lhchifas. Pa meelh papi lhech ti yitô'ya pa Lhcaanvacle ti jôjjeclay lhetipa ti tcavts'aclaysheyshicham'in shi' ti yivanesh pa lhanclôyitsjayash, pa lhechesh pa tanjuyshichamch'e ti yôclôjey ts'ivee.
Currently Selected:
Éxodo 4: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.