Éxodo 20
20
1Tasinôy pa Dios pa yit'esh lhacôm'a navôque lhclishay:
2“Yivaatsha ya Lhcaanvacle a'Dios'yishelh, pa c'ayjatelh'e ja Egipto, yiey jan lhôvelh'e ti alhancumteselh.
3“Ya aj ca acaatjat pav'elh diosec ca anyijulh.
4“Pa ya aj ca asnatesh pa ca ve'lhaa pa ca asjônch'e pava yi'chishamnee yiey pa nalhuyish, nilhecha shta pava ca nôv'e' na cotsjaat, pa nilhecha shta pava yi'shi' pa tovôc shi' pava ca nôv'ôcji' na cotsjaat. 5Ya aj ca anjuy'eshicham t'ajuyish pava lhech, pa ya aj ca ôclôj.*xg* Lhayaash ti vooy yivaatsha ya Lhcaanvacle a'Dios'yish. Ya chavatjanaj pa jivalheshac'oya jayu pa niysa' lhfanishlhavach papi vatanavot papin tsapun, papi lhcles, shi' papi lhantôclishjes shi' shta papi nijooylha lhantôclishjes. 6Taj ti jasnatshem pa yicavtsaclajayash papi mil lhcles papi tôlha papi tsen papin yôfisjatch'e'yam nava yiyôjijates.*xh*
7“Ya aj ca etônesh atesha pa niysa' na lhey na Lhcaanvacle na a'Dios.*xi* Na lhech tanca nan'ateesh ca ninclôyita'apee papi yetônesh pa niysa' na lhey.
8“Avôntôyitey pa nalhu ti chit'ichayshi pa aisinatem pa Lhcaanvacle.*xj* 9Pa acum'in pava ve'lhayama nalhus pa asnatesh lhacôm'a pava lhen ca acum'e. 10Taj ti vooy pa napu'yama nalhu pa lhech chit'ichayshi pa chiy'isinatem pa Lhcaanvacle a'Dios. Pa ya aj ca asnatesh pa ca ve'lhaa ca acum'e pa lhech nalhu,*xk* pa tanca lhecha pa aôs, shi' lhpa ôse, shi' pa lhancumeet shi' shta lhpa lhancumte, nilhecha shta pava aclôy, pa nilhecha shta pa naachifaa pan yi'ajop. 11Lhayaash pa Lhcaanvacle yisnatesh pava ve'lhayama nalhus na nalhuyish, na cotsjaat, na tovôc shi' lhacôm'a pant'ajôôj pava caaj, pa t'ichayshi pa nalhu ti napu'yama. Pa lhe'naa pa Lhcaanvacle ti yiisiyan pa nalhu ti chit'ichayshi, pa yinôôclhanita pa nalhu ti chiy'isiyan.*xl*
12“Avijatanjulh pa atata shi' lhpa amimi,*xm* jaspa caju'ach'e ca veesh'e pa amônlhajayash na cotsjaat pan yijut'ay na lhech Lhcaanvacle a'Dios.*xn*
13“Ya aj ca avôncaclôn.*xñ*
14“Ya aj ca anvômcavômjatsuelh.*xo*
15“Ya aj ca acut.*xp*
16“Ya aj ca anôôlhjônchatesh pa avelh pa'na.*xq*
17“Ya aj ca ajuctsenesh*xr* pa lhajpôyich pa avelh: pa ya aj ca ajuctsenesh lhpa lhch'acfa, tanca lhecha shta pa lhancumeet, nilhecha shta lhpa lhancumte, nilhecha shta pa lhclô' vôcô, nilhecha shta pa cuvôyutaj, ya aj na shta lhacôm'a pava yitsôt'ajesh.”
Papi israelitas nijovayem pa Dios
(Dt 5.22-33)
18Lhacôm'a papi israelitas yiclôvalh pava tachinshi pa yipe'ya shta pa cuucten shi' pa t'ôjôj lhpa vat'ônjanche, yi'van shta lhpa utiyuc ti tajtiy'apee. Taj ti nijova'yem papi lhech pa ninamey ts'ivee. 19Pa lhechesh pa yit'esha ts'ivee pa Moisês:
—Asinô'yelhyam avaatsha, pa tsiqu'ishameshelh'am jayu, pa ya aj na ca nitasinô'yelhyam pa Dios, lhayaash ti tsivômjatelh jayu.*xs*
20Pa yicuulh pa Moisês:
—Ya aj ca anjova'yelhem. Pa Dios nachjooy jaspa nac'alhtaneshelh jayu ca jaspa yajateesh ca anjova'yelhem pa lhech, pa ya aj ca asnatshelh pa sasch'e.
21Lhan'e papi lhchifas pa tojey pa mônlhee, vooy pa Moisês tac'uya lhpa vôse' tjonshajayshi yiey pan yie' pa Dios.
Pa vatyôjijat t'ajuya pa vatcufayjavat
22Pa Lhech Lhcaanvacle yit'esha pa Moisês:
“Istaa ca anfacleem napi israelitas: ‘Apis ti lhavanelh avaatsheelh ti jayasinô'yelh'am ti jatô'lheyjop na vôôs. 23Ya aj ca asnatshelh pa vatajpec clesanilh cojiyaj ja't'ajesha pa clesanilh ts'ayôji, pa jaspa ôclôjelh ca asjône'lha. 24Asnateshyam pa ve'lha vatcufayjavat cotsjaat, pa lhech alhônelh'eshamyam pava aclôyelh tashinshtas shi' pava vôcôc pa jaspa anaychavalhshelhyiy pava acufayjateselh pa jaspa shtamjelhvatjulh. Pa janamelh'ay jayu pa jajutelh'ay jayu pa is yiey pan yie' papi jenem ca naychavalhey ca yey. 25Ca eetajesh ca asnateshyam pa vatcufayjavat utinilh, pa ya ja ca chinfaasha'nejop pava utes,*xt* lhayaash ca chinfaashtajesha'ne pava utes pava t'ajuya, pa nintajulheyam. 26Ca asnatajesh pa yicufayjavat, pa ya aj ca asnatesh pa vatvôôt, lhayaash ca avôôlhtajch'e avaatsha pa chiyvan avôcji jayu ti atsishaan.’
Nava vatyôjijates t'ajuya papi lhancashac
(Dt 15.12-18)
Currently Selected:
Éxodo 20: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.
