Éxodo 10
10
Ti vaclan pava fanjay
1Pa Lhcaanvacle yit'esha pa Moisês:
—Meey ca ajôchiey ja faraón, lhayaash yivaatsha ti jayeetshem jô lhech shi' japi lhcavos ca ninavashaneelh ca jaspa janôclitem nava us isjopyam yivaatsha ca jasnatesh. 2Ca jaspa achayemch'e avaatsha papi acles shi' papi antôclishjes ca lhjunash ti jajuvansha'ne napi egipcios shi' nava us ti jôveshi ti jasnatesh. Pa nôque lhjunash pa natô'yelha jayu avaatsheelh ti yivaatsha ya lhech ti ya Lhcaanvacle.
3Pa Moisês shi' pa Aarón yichey ts'ivee ti yijôchiey pa faraón, pa yit'esha:
—Nôque yit'esh pa Lhcaanvacle, pa lh'Dios napi hebreos: ‘¿Ta t'elhesh ca avô'mesh ti lhnunatyic'oyaan yivaatsha? Avashan ca nôqu'in napi tsitsôt'ajesh ca jaspa nitsôclôj. 4Lhayaash ca alhetipatajeesh ca niavashana ca nôqu'in, lhum'ashi jacheney jayu pava fanjay yiey na avtsaat. 5Pa acloj jayu jumji pa tanca chinvaneshi na cotsjaat. Pa tujqu'e jayu pava napu' yimônlhanich'e java jaclôtuc. Pa tuj jayu shta lhacôm'a nava aacjuy yiey na joot. 6Pa tapooj jayu na ajpôyich shi' nava lhajpôyjey napi acavos, pa shi' lhacôm'a jayu nava lhajpôyjey napi egipcios. ¡Pa lhech lhjunash jayu yiey pan nive'lhaaesh ca lhjunasha ca nivan papi anavot'elh shi' shta papi acchevot'elh yamjey navôque nalhus!’
Meelh ti tifeshch'e pa Moisês ti tasinôy'in pa tatvaych'aclaj pa tay'ôcji pa lhajpôyich pa faraón. 7Pa lhechesh pa yit'eshvatsham'in papi lhcavos pa faraón:
—¿Ta t'elhesh ca nivômeshjoom ca nitôlhjatjoo java tavijatay côcoo nivacle? An'ate na yinvacle japuque nivacle ca nôquey ca jaspa nôclôj pa lh'Dios, pa Lhcaanvacle. ¿Jôjjeclay nataney ninatamp'oyem na yinvacle na Egipto ti palha uj ti chiysasiyan?
8Pa faraón vancacheney shta pa Moisês shi' pa Aarón, pa yit'esha:
—Meelhey ca ôclôjelh pa Lhcaanvacle a'Dioselh. Taj ti nivatjutsa cum ca anfacyam she papi lhech yich'in jayu.
9Pa yicuulh pa Moisês:
—Yalhacôm'aelh jayu ca jôqueelh napi yicleselh shi' napi yicavc'utsjaselh. Pa jacha'jelh jayu shta nava yiclôy tashinshtas shi' nava vôcôc, lhayaash yivaatsheelh ti lhjunashelhjulhyam pa uj lhshamitjayash pa Lhcaanvacle.
10Taj ti yit'esha shta pa faraón:
—¡Yijô' jô ti nôôc nava niysisa lhaychavalhelhey! ¿Lheclôjeshelh avaatsheelh pa Lhcaanvacle ca nivoelh'ach'e, pa shi' yivaatsha ca yivashanelh'am avaatsheelh shi' napi acleselh ca meelh'in? 11Am, tanca lhech lhjunasha. Meelh'in avaatsheelh napi nitaôvclasach'e nivacle, ca ôclôjelhey pa Lhcaanvacle, lhayaash côque ti lhenelh.
Pa vooy pa faraón tayôjijanesh ti chinayjatjop. 12Taj ti yit'esha pa Lhcaanvacle pa Moisês:
—Ôclôj'apee na atuuc na Egipto, ca jaspa ninachey java fanjay shi' ca nitif lhacôm'a nava vatcôjiyanchey yie' na yitsaat. Pa nitifch'e lhacôm'a jayu shta java mônlhach'e ti nôjeshch'e java jaclôtuc.
13Pa yôclôj'apee pa Moisês pa t'ituuc pa Egipto. Pa vooy pa Lhcaanvacle nichen pa lhaviim lhum'ôcjinucjulh ti namey pa yitsaat yicheshch'e pa nalhuclay shi' ti yitsavalheshch'e pa tulh ti factsejch'e. C'oya ti nalhu pa lhum'ôcjinuc lhaviim nichaaj pava fanjay. 14Pa vooy pava lhech tif'apee lhacôm'a pa yitsaat.*xx* Nive'lhaaesh lhapesh ca lhech lhjunasha pa tanca lhech lhjunasha ca nicaaj shta pava acloj fanjay yiey pa lhjunash pa lhech nalhu. 15Pa yiclajun'e cotsjaat. Pa tuj lhacôm'a pava vatcôvjiyanchey shi' shta lhacôm'a pava lhay pavan mônlhatajshi pava aacjuy pa lhechesh ti caaj pava yiclôtuc. Pa nive'lhaa lhapa ca mônlhaaesh pava lhsashay pava aacjuy yie' pa Egipto shi' lhacôm'a pava yie' pava jotoy.
16Pa faraón vancacheney tatsha pa Moisês shi' pa Aarón, pa yit'esha:
—Ni'nasvoyeshch'e na yifanishyivach pa jayjuyjulh pa Lhcaanvacle a'Dioselh, pa jayjuyelh'ajulh shta avaatsheelh. 17Pa jatants'aclanshelh'a ca tsisha nôqueesh ca avômjatelhch'eyam pa yisasch'e. Pa a'lhelheyam yivaatsha pa Lhcaanvacle pa a'Dioselh ca jaspa nôque lhjunasha ca nayjatyijop côque niysa'.
18C'oya ti tay'ôcji pa Moisês pa lhajpôyich pa faraón, pa t'alhey pa Lhcaanvacle. 19Pa lhechesh pa vooy pa Lhcaanvacle venayichenshi pa lhaviim, pa yalhatajesh ti nam pa factsejch'e lhaviim nuutch'ejulh pa yichaaj pava fanjay pa yu'jam yiey pa uj Yinôôt Yucshi. Pa nive'lha lhapa ca fanjaa ca mônlhaae pa Egipto. 20Taj pa Lhcaanvacle yanshi' pa faraón ti ninteesh pa ninvashan ca nôqu'in papi israelitas.
Ti vaclan pa tulhitaj
21Pa lhechesh pa yit'esha pa Lhcaanvacle pa Moisês:
—Ôclôjeychisham na vôôs na atuuc, ca jaspa lhacôm'aa yiey na cotsjaat Egipto ca nicaaj'e pa uj tulhitaj pan isjop ca chint'ajaya.
22Pa yôclôjeychisham pa Moisês pa t'ituuc pa vôôs pa caaj pa uj tulhitaj'e*xy* lhacôm'a pa Egipto. 23Pa yich'e pava pu'jana nalhus ti ampapu ca ve'lhaa ca nivan pa lhavelh shi' ca nitay'e pa yie'. Pa lhan'e lhacôm'a pava lhajpôyjey papi israelitas ti nalhu'e.
24Pa lhechesh pa vancacheney pa faraón pa Moisês, pa yit'esha:
—Meelh'in ca ôclôjelh pa Lhcaanvacle, pa acha'jelh shta papi acleselh. Taj ti amônlhanitelh'e java aclôyelh tashinshtas shi' java vôcôc.
25Taj ti yicuulh pa Moisês:
—Am t'e apee, avaatsha jayu lhanjuteelhyi pava aclôy pavan jaycufayshelhem jayu ca jalhônelhemsham ca jôclôjeshelh pa Lhcaanvacle yi'Dioselh. 26Pa jô'tajesh ti jacha'jelh jayu lhacôm'a java yiclôyelh yivaatsheelh. Pa tanca ve'lhaa nava lhech lhapa ca mônlhaae, lhayaash ti javoolheyshiin jayu pava nayie'in nava lhech ca jaspa chinôclôjesh pa Lhcaanvacle. Lhayaash ca jamelhey pa lhech'e pa nôstôyeshelh naô pa lhjunash ca yasuyeeshelhshi ca jaspa jôclôjelh pa Lhcaanvacle.
27Taj ti vooy pa Lhcaanvacle yit'eshem pa faraón ca ninteeesh shi' ca ya aj ca nivashan ca nôqu'in papi israelitas. 28Pa yit'esha shta pa faraón pa Moisês:
—Ay'e na nôque, pa anujumatsench'e pa ya aj ca t'ôyisheey ca anachyiy shta pa lhavaf jayu.
29Pa yicuulh pa Moisês:
—Tajulhey ca lhteesh. Tanca tapecl'ay t'oyish'e.
Currently Selected:
Éxodo 10: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.
