Éxodo 1
1
Pa lhanclôyitsjayash papi israelitas yiey pa Egipto
1Navôque lheyis papi israelitas papi yamelhey pa Jacob pa Egipto, ve'lhee ts'ivee pa t'ajô'jamsha'ne: 2Pa Rubên, pa Simeón, pa Leví, pa Judá, 3pa Isacar, pa Zabulón, pa Benjamín, 4pa Dan, pa Neftali, pa Gad shi' pa Aser. 5Papi tôlhshaam pa Jacob yamvatsham pant'ajôôj setenta. Pa Josê apis ti yie' pa Egipto.*xa*
6Pa Josê shi' papi lhcheclavot, pa lhacôm'a ti vafsha'ne. 7Taj ti nôque lhjunash papi israelitas caaj papi acloj lhcles pa yamey ti uj ti t'unvatsham'in. Pa acloj'e pa lhavtsaat papi lhech.
8Pa lhech t'aplhuqu'e ti caaj pa nich'a lhcaanvacle yiey pa Egipto. Pa lhech ninantôfa'clesh ca Josê. Pa yit'esha papi lhchifas: 9“Ava, napi israelitas nôqueesh acloj pa yaashjac'oya casvaatsha. 10Pa nôque lhjunash tajulhey ca nicaaj pa casfanisheesh ca jaspa ya aj ca lhetipaa ca nivatclonat'e, lhayaash ti ameesh ca nicaaj pa vatvatclônjayash ca lhtsavot'eesh papi nicatsic'utsfasa ca shtavatclônelhsha'ne pa shinayjat'e jayu na catsivtsat.”*xb*
11Pa lhenaa papi egipcios ti yicaatjat papi lhavosesh ca jaspa niyôjiesha papi israelitas pa caclec lhcumjayash. Pa yisnatchiyinesh pava yitsates pa Pitón shi' pa Ramsês, pan yijuyjata pa faraón, lhcaanvacleesh pa Egipto, ti yan'ôcjiin pava vatcos. 12Taj ti c'oya ti ujesh ti chiycômcloqui pa jô' pa yijô' ti vatclônat'e. Pa nôque lhjunash papi egipcios ti uj ti caaj pa t'ajovayeem.
13Papi egipcios yicômclôqui jum papi israelitas. 14Pa yicômclôquiesh pa lhamônlhajayash ti yicumjat'e pa caclec vatcumjayash ti yisclanshi pa t'ôôlhshi shi' ti yisnatesh pava cotsjatis. Pa yisnatesh shta lhacôm'a pa vatcumjayash'e yiey pava vatcac'ovtes. Cavôque lhacôm'a chiyclôyitesh jumje papi israelitas. 15Jô'tajesh pa lhcaanvacleesh pa Egipto ti tasinôyelh lhpa Sifra shi' lhpa Fúa, papin lhavoqueyesh ti yiclôvalhesh'in ti nicavat'as'in papi hebreas, pa yit'esha:
16—Meelh ca aclôvalhtajeshelh napi hebreas ca nancavat'astaj pa ovalhelhsha'ne pa nich'a nivat'aj. Ca ôcjeclôtaja pa amônlhanitelh, taj vooy ca yitsuujtaja, ¡pa aclônelh!
17E'ana jô papi lhavoqueyesh ti nijovayeshem pa Dios pa ninôfisjach'e pan t'ônashtajem pa lhcaanvacleesh pa Egipto, pa yimônlhanitsha'ne shta papi taôvclas yitsjôy. 18Pa lhechesh pa vooy pa lhcaanvacleesh pa Egipto vancacheney papi lhech ca nachey pa yit'esha:
—¿Ta lhayaash t'em ti lhmônlhanitelhsha'ne papi yitsjôy taôvclas?
19—Lhayaash japi ôcjeclôy hebreas nilhjunashajulh japi ôcjeclôy egipcias —yit'esh ts'ivee ti yicuulh—. Teya ti p'alha'in ti nicavat'as'in ti jôjjeclay ti yamelhey'in ca yiclôvalheshelh.
20-21Pa nôque lhjunash papi lhtachifas israelitas lhetipa ti vatclônat'e pa t'ajôôj. Pa yajatesh ti jô' pa yijô ti t'unvatsham'in. Jô'tajesh ti yiey pa lhjunash papi lhavoqueyesh ti caajem pa t'ijovayeem pa Dios, pa yefenesh pa lhech pa yijutem ti caaj papi acloj pant'ajôôjamsha'ne. 22Pa lhan'e pa faraón pa yiyôjiesha lhacôm'a papi lhchifas: “U'elhsham ja tovôc lhacôm'a papi yitsjôy taôvclas hebreos ca nanvat'astaj,*xc* taj ti vooy papi ôcjeclôy amônlhanitelhsha'ne.”
Currently Selected:
Éxodo 1: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.