Eksodɔs 33
33
AWURADE hyɛ Israel sɛ wɔmfiri Bepɔ Sinai ase nkɔ
1 #
Eks 32.13; Gye 12.7 Na AWURADE ka kyerɛɛ Mose sɛ: Sim firi ha kɔ, wo ne ɔman a wokɔyii wɔn firi Misraim baeɛ no, kɔ asase a mekaa ɛho ntam mekyerɛɛ Abraham, Isak ne Yakob sɛ: W’asefoɔ na mede bɛma wɔn no so. 2#Eks 32.34 Na mɛsoma ɔbɔfoɔ adi w’anim, na matu Kanaanfoɔ, Amorifoɔ, Hetifoɔ, Perisifoɔ, Hewifoɔ ne Yebusifoɔ no. 3#Eks 32.9-10 Kɔ asase a nufosuo ne ɛwoɔ sene soɔ no so; na me deɛ merenni wo mu nkɔ, ɛfiri sɛ woyɛ ɔman a wo kɔn asene, na mammene wo ɔkwan no mu.
4Na ɔman no tee asɛmmɔne yi no, wɔdii abooboo, na obiara anhyɛ n’ahokekadeɛ. 5Na AWURADE ka kyerɛɛ Mose sɛ: Kɔka kyerɛ Israelfoɔ no sɛ: Moyɛ ɔman a mo kɔn asene; sɛ medi mo mu kakraa bi ne mo kɔ a, anka mɛhye mo. Na afei monyi mo ho ahokekadeɛ, na menhunu deɛ mɛyɛ mo. 6#Yona 3.5-6 Ɛnna Israelfoɔ no yiyii wɔn ho ahokekadeɛ firi bepɔ Horeb ho hɔ ara.
Wɔnsi ntamadan
7 #
Eks 29.42
Na Mose taa fa ntomadan no de kɔsi nsraban no akyi akyirikyiri, na ɔfrɛɛ no ahyiaeɛ ntomadan. Na obiara a ɔhwehwɛ AWURADE no firi adi kɔ ahyiaeɛ ntomadan no a ɛwɔ nsraban no akyiri no ho. 8Na sɛ Mose firi kɔ ntomadan no ho a, ɔman no nyinaa sɔresɔre kɔgyinagyina wɔn ntomadan ano, na wɔde Mose akyiri hwɛ ara kɔsi sɛ ɔhyɛne ntomadan no mu.
9 #
Eks 13.21
Na sɛ Mose hyɛne ntomadan no mu a, mununkum dum no siane bɛgyina ntomadan no ano, na AWURADE ne Mose kasa. 10Na ɔman no nyinaa hunu mununkum dum no sɛ ɛgyina ntomadan no ano a, ɔman no nyinaa sɔresɔre, na obiara koto sɔre wɔ ne ntomadan ano. 11#Eks 33.20; Num 12.8; Deut 34.10 Na AWURADE ne Mose di nhwɛanim kasa sɛ onipa ne ne yɔnko kasa. Na ɔsane ba nsraban no mu a, ne somfoɔ Nun ba Yosua a ɔyɛ aberanteɛ no deɛ, ɔmfiri ntomadan no mu.
AWURADE hyɛ bɔ sɛ ɔbɛka ne nkurɔfoɔ ho
12 #
Eks 33.2-5
Na Mose ka kyerɛɛ AWURADE sɛ: Hwɛ, wo ara na woaka akyerɛ me sɛ: Fa ɔman yi kɔ, nanso womma menhunu deɛ wobɛsoma no na ɔne me akorɔ. Nanso wo ara na woaka sɛ: Mede wo din menim wo, na woanya m’anim animuonyam nso. 13#Dwom 103.7 Enti mesrɛ wo, sɛ manya w’anim adom a, ma menhunu wo kwan ɛ, na mahu wo, na hunu sɛ nkurɔfoɔ yi yɛ wo man a! 14Na AWURADE kaa sɛ: Me ara ankasa mɛdi wo anim ne wo akɔ, na mama woakɔhome. 15Na ɔka kyerɛɛ no sɛ: Sɛ wo ankasa ne yɛn ankɔ deɛ a, ɛnneɛ mfa yɛn mfiri ha nkɔ. 16#Deut 4.6-8 Na ɛdeɛn na wɔde bɛhunu wɔ ha sɛ me ne wo man yi anya w’anim adom, ɛnyɛ wo korɔ a wo ne yɛn bɛkorɔ no? Na me ne wo man yi ada nso wɔ aman a wɔwɔ asase ani nyinaa mu. 17#Eks 33.12; 2 Ti 2.19 Na AWURADE ka kyerɛɛ Mose sɛ: Asɛm a woaka yi nso, mɛyɛ, ɛfiri sɛ woanya m’anim adom, na mede wo din menim wo. 18Na Mose kaa sɛ: Ɛnneɛ, ma menhunu w’animuonyam. 19#Rom 9.15 Na ɔse: Mɛma me papa nyinaa asene w’anim, na mɛpae me din YHWH (AWURADE) wɔ w’anim; na medom deɛ medom no, na mehunu deɛ mehu no mmɔbɔ no mmɔbɔ. 20#Gye 32.30; Yes 6.5; 1 Ti 6.16 Na ɔse: Wontumi nhunu m’anim, ɛfiri sɛ onipa renhunu m’anim nnya nkwa. 21#2 Ah 19.8-13 Na AWURADE se: Hwɛ, ɔkwan wɔ me nkyɛn ha, na gyina ɔbotan no so; 22#Eks 34.5-6; 24.11 na sɛ m’animuonyam resene a, mede wo bɛhyɛ ɔboɔ tokuro mu, na mede me nsa makata wo so masene ansa, 23na mayi me nsa, na woahunu m’akyi fam; na m’anim deɛ, worenhunu.
Currently Selected:
Eksodɔs 33: ASWDC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Asante-Twi Bible With Deutero-Canons © The Bible Society of Ghana, 2017.
