ምሳሌ 20
20
1የወይን ጠጅ ፌዘኛ፣ ብርቱ መጠጥም ጠበኛ ያደርጋል፤
በእነዚህ የሳተ ሁሉ ጠቢብ አይደለም።
2የንጉሥ ቍጣ እንደ አንበሳ ግሣት ነው፤
የሚያስቈጣውም ሰው ሕይወቱን ለመከራ ይዳርጋል።
3ከጠብ መራቅ ለሰው ክብሩ ነው፤
ተላላ ሁሉ ግን ለጥል ይቸኵላል።
4ሰነፍ ሰው በወቅቱ አያርስም፤
ስለዚህ በመከር ወራት ይፈልጋል፤
አንዳችም አያገኝም።
5የሰው ልብ ሐሳብ እንደ ጥልቅ ውሃ ነው፤
አስተዋይ ሰው ግን ከዚያ ቀድቶ ያወጣዋል።
6ብዙ ሰው ጽኑ ፍቅር እንዳለው ይናገራል፤
ታማኝን ሰው ግን ማን ሊያገኘው ይችላል?
7ጻድቅ ነቀፋ የሌለበት ሕይወት ይመራል፤
ከእርሱም በኋላ የሚከተሉት ልጆቹ ቡሩካን ናቸው።
8ንጉሥ ለፍርድ ዙፋኑ ላይ በሚቀመጥበት ጊዜ፣
ክፉውን ሁሉ በዐይኖቹ አበጥሮ ይለያል።
9ለመሆኑ፣ “ልቤን በንጽሕና ጠብቄአለሁ፤
ንጹሕ ነኝ፤ ኀጢአት የለብኝም” የሚል ማን ነው?
10ሁለት ዐይነት ሚዛን፣ ሁለት ዐይነት መስፈሪያ፣
ሁለቱንም እግዚአብሔር ይጸየፋቸዋል።
11ሕፃን እንኳ ጠባዩ ንጹሕና ቅን መሆኑ፣
ከአድራጎቱ ይታወቃል።
12የሚሰሙ ጆሮዎች፣ የሚያዩ ዐይኖች፣
ሁለቱንም እግዚአብሔር ሠርቷቸዋል።
13እንቅልፍ አትውደድ፤ አለዚያ ድኻ ትሆናለህ፤
ዐይንህን ክፈት፤ የተትረፈረፈ ምግብ ይኖርሃል።
14ዕቃ የሚገዛ፣ “የማይረባ ነው፤ የማይረባ ነው” ብሎ ያራክሳል፤
ሲመለስ ግን በግዥው ይኵራራል።
15ወርቁም አለ፤ ቀዩም ዕንተትረፍርፏል፤
ዕውቀት የሚናገሩ ከንፈሮች ግን ብርቅ ጌጦች ናቸው።
16ለማይታወቅ ሰው ዋስ የሆነውን ልብሱን ግፈፈው፤
ለዘልዛላ ሴት የተዋሰውን በቃሉ ያዘው።
17ሰው በማጭበርበር ያገኘው ምግብ ይጣፍጠዋል፤
በመጨረሻ ግን አፉን ኰረት ሞልቶት ያገኘዋል።
18ምክር ጠይቀህ ዕቅድ አውጣ፤
ጦርነት የምትገጥም ከሆነ መመሪያ ተቀበል።
19ሐሜተኛ ምስጢር ያባክናል፤
ስለዚህ ለፍላፊን ሰው አርቀው።
20አባቱን ወይም እናቱን የሚሰድብ፣
መብራቱ በድቅድቅ ጨለማ ይጠፋል።
21ከጅምሩ ወዲያው የተገኘ ርስት፣
በመጨረሻ በረከት አይኖረውም።
22“ለደረሰብኝ በደል ብድሬን ባልመልስ!” አትበል፤
እግዚአብሔርን ጠብቅ፤ እርሱ ይታደግሃል።
23ሁለት ዐይነት ሚዛን በእግዚአብሔር ዘንድ አስጸያፊ ነው፤
አባይ ሚዛን አይወደድም።
24የሰው አካሄዱ በእግዚአብሔር ይመራል፤
ሰውስ የገዛ መንገዱን እንዴት ማስተዋል ይችላል?
25በችኰላ ስእለት መሳል፣
ከተሳሉም በኋላ ማቅማማት ለሰው ወጥመድ ነው።
26ጠቢብ ንጉሥ ክፉዎችን አበጥሮ ይለያል፤
የመውቂያ መንኰራኵርንም በላያቸው ላይ ይነዳል።
27የሰው መንፈስ ለእግዚአብሔር መብራት ነው፤#20፥27 ወይም የእግዚአብሔር መብራት የሰውን መንፈስ ይመረምራል
ውስጣዊ ማንነቱንም ይፈትሻል።
28ፍቅርና ታማኝነት ንጉሥን ይጠብቁታል፤
በፍቅርም ዙፋኑ ይጸናል።
29የጎልማሶች ክብር ብርታታቸው፣
የሽማግሌዎችም ሞገስ ሽበታቸው ነው።
30የሚያቈስል በትር ክፋትን ያስወግዳል፤
ግርፋትም የውስጥ ሰውነትን ያጠራል።
Currently Selected:
ምሳሌ 20: NASV
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
መጽሐፍ ቅዱስ፣ አዲሱ መደበኛ ትርጕም™
የቅጅ መብት © 2001 በ Biblica, Inc.
ፈቃድ የተገኘባቸው ናቸው። መብቱ በመላው ዓለም በሕግ የተጠበቀ።
Holy Bible, New Amharic Standard Version™ (Addisu Medebegna Tirgum™)
Copyright © 2001 by Biblica, Inc.
Used with permission. All rights reserved worldwide.