Cenisihs 2
2
1Mii 'iwe kaaishi kiishihcikaatek kiishik, ahki kaye, kahkina kaye kekoonan i'imaa eyaakin. 2#Exo 20.11. Miihsh Kishemanitoo kaaniishwaahsokiishikaanik aasha okii onci kiishihtoon minihk kekoon kaakii oshihtootc. Miitahsh kaaishi aahtehshink kaaniishwaahsokiishikaninik kaaishkwaa oshihtootc minihk kekoon kaakii anohkaatank. #Heb 4.4,10. 3Kishemanitoo tahsh okii inahtoon i'i kaaniishwaahsokiishikaninik ciminwakincikaatenik shikwa cikihci inentaakwaninik i'i kiishikan, aaniihsh mii 'i ahpii Kishemanitoo kaa‑anwehshink kahkina kiikiishihtootc otanohkiiwin.
Kihtikewahkamik Iitin Ehtashintek
4Mii hsa 'i enaatotek ekii oshihcikaatek kiishik, ahki kaye.
Ahpii kaaTipenciketc Kishemanitoo kiioshihtootc ahkiini, kiishik kaye, 5Kaawiin mahshi kiiayaahsinoonan wiikwapiinhsan ahkiink, kaawiin kaye mahshi kiihpi saakahkiihsinoonan ashkipakoonhsan, aaniihsh kaaTipenciketc kaamahshi okii oshihtoohsiin cikimiwaninik ahkiink. Kaawiin kaye mahshi kiiayaahsii inini kepikishka'ahkiitc. 6Kashkawan tahsh ahkiink kiionci ompishkaa kaaonci nipiiwihcikaatek o'o ahki misiwe.
7 #
1Co 15.45. KaaTipenciketc Kishemanitoo tahsh okii onci oshi'aan ininiwan paankwaawank ahkiihkaank kaaonciik. Okiih pakitanaamonotawaan tahsh otenikominiink cionci pimaatisinitc. Mii 'iwe kaaishi'intc a'a inini cipimaatisitc ciahcaahkowitc.
8KaaTipenciketc Kishemanitoo tahsh okii oshihtoon kihtikewahkamik i'imaa waapanonk mino ahkiink Iitin (Eden) kaakii icikaatenik. Miitahsh i'imaa kaaishi ahsaatc ininiwan kaakii oshi'aatc. 9#Rev 2.7; 22.2,14. KaaTipenciketc Kishemanitoo tahsh okii oshi'aa' mihtikoo' cisaakikinitc kahkina kaaminonaakosinitc, kaaonishihshinitc cionci wiihsininitc. Ini kaye pimaatisiwinaahtikoon mekwe kihtikewahkamikonk okii ishi'aan cisaakikinitc. Ini tahsh kaye peshik mihtikoon wenci kihkencikaatenik mino'ishiwepisiwin, i'i kaye maci'ishiwepisiwin.
10Siipi tahsh kiionciciwan i'imaa mino ahkiink Iitin kaakii icikaatek ekiih shaapopacikaatek kihtikewahkamik. Mii 'imaa kaaonci niiwi pahkehtikweyaakin siipiin. 11I'i tahsh peshik ishinihkaate siipi Payishan (Pishon). Mii 'iwe ewiih tetipaahtikweyaak kaapashkwataawankaak ahkiink Haapila (Havilah) kaa'icikaatek. Mii 'imaa eshi'ayaatc osaawi shooniyaawahsin. 12Onishihshi a'a osaawi shooniyaawahsin eonciitc i'imaa ahkiink. A'ahsh kaye pikiw kehci onishihshitc i'imaa ayaa ahkiink. A'ahsh kaye Aanikihs (Onyx) ishinihkaaso epehpehshaapihkisitc ahsin i'imaa ayaa. 13Niishin siipi kaasheciwank Kaaihan (Gihon) ishinihkaate. Mii 'imaa Koohsh (Cush) ahkiink ishi tetipaahtikweyaa. 14Nihsin siipi Taaikarihs (Tigris) ishinihkaate. Waapanonk inahke ishihtikweyaa Ahsiiriya (Assyria) ahkiink. Niiwin siipi kaamankatehtikweyaak Iyoohparetiis (Euphrates) ishinihkaate.
15KaaTipenciketc Kishemanitoo tahsh okii ishiwinaan ininiwan mino ahkiink Iitin kaakii ishinihkaatenik kihtikewahkamikonk ekiih pakitinaatc cikihtikaataminitc, cikanawentaminitc kaye. 16KaaTipenciketc Kishemanitoo tahsh okii'inaan ini ininiwan, “Pisaan iko kika onci wiihsin kahkina oko mihtikook eyaawaatc o'omaa kihtikewahkamikonk. 17A'ahsh wiin peshik mihtik kaaonci kihkentaakwahk mino'ishiwepisiwin, i'i kaye maci'ishiwepisiwin, kaawiin i'imaa kika ontancikehsii. Ahpii hsa i'imaa ontancikeyan, tepwe kika nip,” okii'inaan.
18Miinawaa tahsh kaaTipenciketc Kishemanitoo kii‑ihkito, “Kaawiin taonishihshihsinoon cinihshihke ayaahpan a'a inini. Ninka oshi'imaan kwayahk kewiici'ikotc.” 19Miitahsh kaaishi oshi'aatc kahkina aya'aawihsha', ahkiinaank ekii onci oshi'aatc, i'i kaye pinehshiinsha' kaapimihsenitc newacikiishik. Miitahsh kaaishi ishiwitawaatc ininiwan ciwiinaanitc. Aaniin tahsh iko kaa‑ayishinihkaanaatc a'a inini iniweniwa' aya'aawihsha', mii ko'i kaa‑ayishinihkaasonitc. 20Miitahsh kaaishi wiinaatc a'a inini kahkina awahkaana', minihk kaye pinehshiinsha' kaapimihsenitc newacikiishik, aya'aawihsha' kaye. Kaawiin tahsh mahshi kiimihkawimaahsiiwan kwayahk kewiici'ikotc a'a inini.
21Miitahsh kaaTipenciketc Kishemanitoo okiih kihpakinkwahshimaan ini ininiwan, miihsh kaaishi nipaanitc. Okii otaahpinamawaan tahsh peshik ohpikekanini. Meshkwac tahsh wiiyaahs okiih kipa'ikaaken kaakii onci otaahpinaatc ohpikekanan. 22I'imaa tahsh ohpikekaniniink okii onci oshi'aan ini ihkwewan. Miitahsh kaakii ishi piitamawaatc ini ininiwan. 23Miitahsh o'o inini kaaihkitotc,
“Miiwa'a kekahpii wakiic kaaonciitc nihkanink,
waayaahsiwitc kaye kaaonciitc niwiiyaahsink.
Miitahsh ihkwe taishinihkaaso
aaniihsh mii 'imaa kiionci otaahpinikaniwi ininiink.”
24 #
Mat 19.5; Mrk 10.7,8; 1Co 6.16; Eph 5.31. Miitahsh inini keonci nakanaatc oteten, omaamaan kaye, ewii minciminaatc ini wiiwan. Peshikwan keishi wiiyaahsewaatc. 25A'a tahsh inini, a'a kaye ihkwe minciniish piko kaawiin kiihkikihkonayehsiiwak kaawiin tahsh kiiakacihsiiwak.
Currently Selected:
Cenisihs 2: OJBR
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Ojibwe Shorter Bible (Roman Script) © 2008 Canadian Bible Society
