MARKKC 15
15
Jisumc Pilatkc Kcra:dop Boma:nam
(Met 27.1-2,11-14; Lu:k 23.1-5; Jo:n 18.28-38)
1Odokkc rokomdannamci dormo ager gernckvdv:dok bottarya:nc kvdv:dc, bottcnc tani:kvdv:dc odokkc ainc agom luyirnckvdv:dc, odokkc kcbang appv:dc ru:supa:suto; odokkc bulu Jisumc ycnggapge:la gvlenboto odokkc Pilatkolo togc:lvgto. 2Odokkc Pilatbv bvm tawuto, “No Jiwukvdv:dok migomdci?” Odo Bv bvm lubito, “No:na cdcmpc ludu:nc.” 3Odokkc dormo ager gergcnc kvdv:dok bottarya:nckvdv:dc Bvm bojcrungko okkoi okkoiycm aima:pc luto. 4Odo Pilatbv lckoda Bvm tawuto, “Nokkc lupcnam kama:nci? Kangkvtoka cddvko bulu nom lujcmna ludu:nc.”
5Cmpige:la Jisubv oko agomcmsin odokkc lulatsutoma:bong, cdcmpila Pilatbv mc:la mcngapla:tomang.
Jisumc Mokedopc Lulvgnam
(Met 27.15-26; Lu:k 23.13-25; Jo:n 18.39—19.16)
6Cdcmpinamc bv donam tv:nam porobdo bv bulum makana:lo lvgnam tani:ako mclennvgbidoku sc:kom bulu koycji. 7Makana:do lvgnam imur ager inckvdv:dok, migom agom tadma:pc tani:mokencko, Barabbas cmnam tani:ko dungai. 8Odokkc cdc yadkumsunc tani:kvdv:dc Pilatmc korobbomkang bvk aginpc iyit-gvyitnamdcmpc bulum ibidopc. 9Odokkc Bv bulum lubito, “Nolu Jiwukvdv:dok migomdcm nolukkcpc mclennvgteikuk cmna mc:dagnci?” 10Kapila:nc bv kindagai jc ncla:yam dormo ager gernckvdv:dok bottarya:nckvdv:dc Bvm yc:lvgto.
11Cmpige:la dormo ager gernclok bottarya:nckvdv:dc yadkumsunc tani:kvdv:dcm Bvmma:pc Barabbasmcdan mclennvgdokupc luurlvgto. 12Odokkc Pilatbv lckoda bulum tawuto, “Cmpcmvlo nolu sc:kom Jiwukvdv:dok Migom cmna ludu:nc cdc tani:dcm ngo kapc iycn?”
13Odokkc bulu jc:robbomkang lckoda, “Bvm Kuruslo pvtketok.”
14Odo Pilatbv bulum luto, “Kapila, oko aima:n agerko bv iton?” Ckvdaggom bulu jc:baddanna jc:to, “Bvm kuruslo pvtketok.”
15Cdcmpila Pilatbv, yadkumsunc tani:kvdv:dcm mc:lvgsumopc cmna, buluk lcga:pc Barabbasmc mclennvgbitoku; odokkc Jisumc sabukkokki dcmage:la kuruslo pctkedopc tolvgto.
Jisumc Mimagmonckvdv:dc Moki:moatnam
(Met 27.27-31; Jo:n 19.2-3)
16Odokkc sipaikvdv:dc migom dungko okum ara:dok kcbang bangkodo:pc Bvm gva:boto; odokkc bulu sipai appvngcm gokkumsuto. 17Odokkc bulu Bvm ba:yomcmpc yalv:nc migom gcnam olubnc attarcm molvgto; odokkc bulu ta:ng dumlupko poge:la bulu Bvm molvgto. 18Odokkc bulu Bvm selam-bomrobkang, “Motcngo:pc dungge:la, Jiwukvdv:dok Migoma cmna jc:yosuto?” 19Odokkc bulu Bvk mittukdok dorbumko langge:la dcmto, odokkc Bvm takircm sukkamto, odokkc bulu Bvm lcbv:tuma:la mcnggcsula kumto. 20Odokkc Bvm bulu moki:moatge:la, bulu ba:yomcmpc yalv:nc migom gcnam olubnc galugdcm pvtpakto, odokkc Bvk avkc gcnam attarkvdv:dcm molvgtoku. Odokkc bulu Bvm kuruslo pvtkekapc gvlenbokang.
Jisum Kuruslo Pvtkenam
(Met 27.32-44; Lu:k 23.26-43; Jo:n 19.17-27)
21Odokkc bulu lambclok gvpatnc tani: ako, Sirene dok Simonmc do:lu:dokkc gvddom, Alekjandarkclang Rupuskc abudcm, Kurusdcm jo:dopc lujcmlvgto, 22Odokkc bulu Bvm Golgatha cmnam mo:di:do:pc gvboto okodcm tublong dungko cmdagnc. 23Odokkc bulu Bvm gondok alangcm molusunam angur alangcm bito; cmpige:la Bv cdcm tv:tomang. 24Odokkc bulu Bvm Kuruslo pvtketo, odokkc Bvk gcnam attardcm bulu orpansuto, bulukkolok sc:ko pa:ycji cmna do:jvgki kungka:mvnsuto, sc:ko okodcm la:mvlo aiycji cmna. 25Odokkc odo awumko ayirc idagaboi, Bvm kuruslo pvtkedodo. 26Odokkc Bvk agomcm aimang cmna adlvgnamdc scmpc podagai, “Jiwukvdv:dok Migomdc.” 27Odokkc Bvk lcdulo rodkutnnc anyiko moketc:to, akoncm Bvk lagbvgpc odokkc akoncm Bvk lakkepc. 28Odokkc Ru:nckc agom jvggabla lc:namdcmpci ikang okodc ludagji, “Bvm imur-gvmurnc tani:kvdv:dok lcdulo kvtc:to.”
29Odokkc odok gvpatnckvdv:dc Bvm yvrka:to, buluk mittuk kvdv:dcm dumkv dumkvla, odokkc scmpc lula: lula, “C:i kumko okumdcm mopenge:la cdcm lowumno mokuncdci, 30no avycm motursutoka, odokkc kurusdokkc gvitokuka?”
31Cdcmv:pc dormo ager gernckvdv:dok bottarya:nckvdv:dc:sin akonc akonki Bvm yvrka:to ainc agom poyirnc kvdv:dokki lckopc, scmpc lula: lula, “Bv ammem moturto; Bv avdcm motursula:mang. 32Kristodcm, Israel dok Migomdcm Kurus talc:dokkcm gvimoteikupcn, ngolu ka:begdopc odokkc mc:jvgdopc.” Bvk lcdulo Kuruslo pvtkenam kvdv:dc:sin Bvm aima:pc luto.
Jisukc Sinam
(Met 27.45-56; Lu:k 23.44-49; Jo:n 19.28-30)
33Odokkc ayir akkcngko inamc, among appv:do kcmokang ayir konangko ima:dodo:pc. 34Odokkc ayir konangko idodcm Jisubv bottaru:pc bc:dopc jcngkang, “Eloi, Eloi lama sabakta:ni?” Odok agomdc, “O ngok Ru:ncpvnc, ngok Ru:cpvnc, Kapila no ngom mcpakton?”
35Odokkc ru:yidok dagla du:nckvdv:dok akke cdcm tadge:la luto, “Ka:tok, Bv Elija:mc gogdung.” 36Odokkc akonc dugla asi mu:nc sponjakolo bi:ncko sirokangcm dorbumkolo nvggablvgge:la bvm tv:dopc bito, scmpc lula, “Toya:po:toka, Elija:bv Bvm gva:la la:yi:yckuji: la:yi:kuma:ycji.” 37Odokkc Jisubv bottcru:pc jcngkang, odokkc Bv topvnkang. 38Odo kumko okumdok tonkomnam gasordc tagnyikopc betkekang, tayc:tokkc kcyvgbo:pc. 39Odokkc sipai lvngkolok ru:tumdc, ru:yido Bvkkolo:pc ka:la du:namc, Bv topvnkang odo, bv luto, “Aroru:pc sc tani:sc Ru:ncpvnckc Aowai!”
40Odo mo:tc:lokkc ka:la du:nc nc:ngckkcsin dungai, odokbuluk ara:do dungai Magdalini Meri:bv:lang Jakobkclang Josepkc anc Meri:bv, Salomi:bv, sc:ko, 41Bv Galilolo du:dodcm lcdulo gvmvnkanc, odokkc Bvm ka:svmosvngkanc; odokkc bojcrungko nc:ngc sc:kobulu Bvk lcdulo Jerusalempc gvmvnkaji.
Jisumc Agolo Lc:nam
(Met 27.57-61; Lu:k 23.50-56; Jo:n 19.38-42)
42Odokkc yumc ayir a:namc, cdc Mosv:sunamlok longcla:yam, cdc, Yodladu:namdok po:pckc longcdo, 43Arimatiadok Josepbv, kcba:ba:ncdok mcnggcnam memborkvdv:dc, sc:kobulu Ru:ncpvnckc migom donamdcm mago:la dunganc, saktapla Pilatkolo:pc gva:to, odokkc Jisukc sima:dcm koto. 44Odo Pilatbv mc:la mcngkintomang bv aropc sidanka:bo:nci cmna; odokkc sipai lvngkolok ru:tumdcm gogangge:la, bv bvm tawuto bulu sima:dcm ka:toibo:nci cmna. 45Odokkc mimag monclok lvngkolok ru:tumdokkcm Bv sika:bong cmnamdcm kinto bv Josepmc sima:dcm bito. 46Odokkc bv hon onnoki sumnam simang takkomnanc gasorko rcto, odokkc Bvm la:yi:ge:la, Bvm sima:yennanc hon gasordokki yetto, odokkc agokolo lc:to okodcm vlvngcm pvtkorangge:la nguntungaji; odokkc agodok yabgodcm kcdkapdopc vlvng apvko kctkaplvgto. 47Magdalini Meri:bv odokkc Josepkc anc Meri:bv okolo lc:toji cdcm ka:to.
Currently Selected:
MARKKC 15: MISIBSI
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
