PONGWANG LAIPEX 7

Tinu-mualyem

1 Jowanpae Noa ang thüi: “Hünzom kako pangwüi koplaxle khua mongto noplax; chaxwannu tok ma ku mik-hu ma sukya nang tata tix atakle. 2Zanglom-zom ma tsaokya müi pangwüi oshem anüt pong, ikoxle mama chitsaokya müibu a oshem tuipong nang füi tomle khua ma laxlax toxlax. 3Osabu chuwüi oli pangwüi hanshem anüt pong koplax. Ija a o-jux hia müi ibu pangwüi a chaxwannu tok ma tamchatle oli afikle atsat-atsün angkya hanpakma ile moklax. 4Athax makhange nyix anüt mong ma kue zangwat ajoüi, ilaxle kue zingkya zünmok pangwüi amüt angkya hanpakma ija a nyix-punyi bama zangnak-zangngai chithwonle watngoüi.” 5Ilaxle Jowanpae fakya kaxtom pangwüi Noa-e mok.

6Chaxwannu ma tinu-mualyemle changpongma Noa a zanglao 600 nguile tüikya. 7#Mat 24.38,39; Luk 17.27.Chix üntoxle chix kakonu, ilaxle sasün hwom hia hwom kakonu hwom, khuanu mongto dongle tinu-mualyem ma chimaxle azang. 8Zanglom zom ma chitsaokya hia tsaokya müi üntoxle o-jux oli pangwüi honu-hola honu-hola le, 9Zang kaxtom lailaile Noa füi tomle khuanu mongto dong. 10Nyix anüt füima tinu-mualyemle hüi.

11 # 2 Pit 3.6. Chemtue Noa zangpua 600 changkya hex, lyetkua anyi angkya nyixbün-anüt lükya to haxmong tokya ti chaxwan tok to fuakle lai, ilaxle zangding tokya thokjao-thokle zangwat, 12ilaxle ojao chithwonle chaxwan tok ma nyix-punyi wün-punyi zangwatle ngo. 13Ija nyix wüi Noa hia chix kakonu, sasün Shem, Ham hia Jafet hwom tamchu hwom kakonu hwom füi tomle khuanu mongto dong. 14Hwom füi tomle, tsom-müi hia faomüi, chongkya hixkya pangwüi, tamchu o-jux oli pangwüi dong. 15Zang kaxtom ningle, Noa füi tomle, zünmok pangwüi honu-hola honu-hola le khuanu mongto dong. 16Noa tokfüi ma Jowanpae kotho chito khange khua ka hak.

17Nyix punyi hanpakma chizangle tinu-mualyem ngo, ilaxle khua tinu tok to fuale chang ang müile ti zule hüi. 18Ti a süzu-süzule zule pao, ilaxle khua a tinu tok to chwotle aham. 19Tinu a haxhua atsuakyabu to ngaxchu wüi chwople zule hüi; 20ija tinu a haxhuabu to fakbün onüie jao kaile tsuale hüi. 21Chaxwan tok angkya zünmok pangwüi zile pao: o-jux, müi, üntoxle khünak-mixsa pangwüi. 22Chaxwannu tok ma zakdünle ngokya pangwüi zile pao. 23Chaxwannu tok angkya zünmok pangwüi Jowanpae amüt: khünak-mixsa, müinüjen, ilaxle o-nüjen pangwüi. Noa hia chix füi tomle tüikyabu tata khuanu ding ma chiamütle dantox. 24Hota boma nyixpunyi mong ma ti ojao chizople ngo.

Currently Selected:

PONGWANG LAIPEX 7: WANCBSI

ማድመቅ

Copy

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ

Wancho Naga Bible - OTSAO BAIBEL

ስለ OTSAO BAIBEL (BSI) ተጨማሪ ይወቁ

PONGWANG LAIPEX 7

ከ
{{ምዕራፍ}}
ታዋቂ የመጽሐፍ ቅዱስ ጥቅሶች

Bible:

Wancho Naga

Version: OTSAO BAIBEL (BSI) - WANCBSI