PONGWANG LAIPEX 39
39
Jusep hia Potifar Kakonu Nyi
1Ishmael khünakbue Jusep a Ijip nok to katlaxle Potifar ang hang. Chix a wanghom pa ma alixachong tamchu wanghom hom nyetmix khama lompa tuita changkya. 2#Mwt 7.9.Jowanpa a Jusep füi tüikya ilaxle pangnu lom to chix a tho-lünle chang ang tom. Chix a Ijip nok nwotmix tuita homkha ma ngo. 3Jusep füi Jowanpa womle tüikya makhange chix mwot pangwüi mohiman ang achangle hüikya hopupae ngün ang kop. 4Jusep füi Potifar ang mongzom müi ilaxle mahuak da ang thom. Ma homkha hia tuina pangwüi to chix ang humele chang ang tom. 5Ija makhange, Jusep khokho ma, ija Ijip nok homkha hia haxtok pangwüi to Jowanpae mohiman. 6Ile tütali hünlixchu pangwüi Jusep chak to danlaxle Potifar ang chix wok ma sho angkya süt shokya boma tütali tochu chix khangza ma kak angkya jao chitüile ngole hüi. Jusep a ojung-odün hia osün-ojo pangwüi müikya naosün tuita changkya. 7Ija jaojaole chix hopupa Potifar kakonue chix to mikzalo le hu ilaxle she füi tomle jip angkya atsang. 8Chixe ile münchangpu le ado ilaxle thüi: “Hulax, ku hopunue, homkha ma ku tüikya khoma tütali tochu chix khangza ma kak angkya ojao chitüi. Ija a chixe ku ang pangwüi to hume ang tsankoxle. 9Ija homkha ma ku machu chix füi tomwüile zong tüipu. Chixe ku chak to chidankya a nang tata wüi. Ipongle changkya füima kue büthüikya to iningkya chichang-chizang suale Zang zongto ochax lyenle changüi?” 10Ile nyixfokya to she füi tomle jip ang tsiale ngokoxlechu Jusep she füi chijip. 11Ikoxle nyixta homkha ma mama dabu owachu chitüi pongkhae Jusep chix mwot mok ang homkha to dongle asu.
12She-e chix nyitua ma koplaxle thüi: “Oman, ku füi jip-hax.” Ikoxlechu chix homtho to laile paole azang. Fütle paoüima chix nyi-za she chak to danle tox. 13Chemtue she chak to chix nyi-za toxlaxle homtho to zikle laipuix, 14she-e da mamabu nyak üntoxle thüi: “Ija to hulax! Ku kakopae apüikya Ibri Süne kem adale. Chix ku nui to donglaxle ku to shing ang azongle. 15Ku azaxle akhongkya thoto, chix nyi ku hama dantoxlaxle chix homtho to laile paole.”
16She-e ija Jusep nyi ma kakopa nguikya kople she chak to thom. 17Ofüima she-e ija zangwün otyatya wüi ma kakopa hama wünle thüi: “Ija Ibri naosa, nange hom ma apüilaxle thomkya mixsüne ku nui to donglaxle ku adale. 18Ikoxlechu ku akhongkya thoto, chix nyi ku hama danle toxlaxle homtho to laile paole.”
19Ija atatlaxle Potifar ang tüle mongtsik. 20Chixe koplaxle Jusep a wanghom dabu shole thomkya kun ma shole thom. 21#Mwt 7.9.Ikoxlechu Jusep füi Jowanpa tüile ngokya daile ikhatochu Zang-e chix to mohiman. Kun nyele ngokya alixachong tuita chix füi tüle müi. 22Chixe Jusep a, kun ma shole tüikya khama akhokya achang tamchu hwome chempang mokpuix ibu pangwüi to humele chang angkya hünlix chix ang kox. 23Jusep-e humele chang angkya hünlit koxle thomdaokya mwot tütali to chu nyetmixe tamchatle hungo angkya mwot chiatsat. Chemthüikoxle, Jowanpa chix füi tüile ngokya khoma, chixe amokmok mwot pangwüi tsuakle hüi ang tom.
Currently Selected:
PONGWANG LAIPEX 39: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.